ព្រះមេគណខេត្តកំពង់ស្ពឺ ឌូ វណ្ណឌឿនត្រូវគណៈសង្ឃនាយក បានសម្រេចដកតំណែង
21-April-2016 | ដោយ មែន កំសត់
កំពង់ស្ពឺ៖ ក្រោយពីមានការបែកធ្លាយឃ្លីបវីដេអូ របស់ព្រះមេគណខេត្តកំពង់ស្ពឺ ព្រះនាម ឌូ វណ្ណឌឿនដែលបានឡើងច្រៀង សប្បាយ នាឱកាសពិធីបុណ្យចូលឆ្នាំកន្លងមក គណៈសង្ឃនាយក នៃព្រះរាជាណាចក្រកម្ពុជា បានសម្រេចដកតំណែងព្រះមេគណខេត្តកំពង់ស្ពឺ ព្រះនាម ឌូ វណ្ណឌឿន ដែលបានប្រព្រឹត្តខុសធម៌វិន័យរបស់ព្រះពុទ្ធសាសនា ដោយសារព្រះអង្គឡើងច្រៀងចម្រៀងលើឆាកតន្ត្រីឲ្យពុទ្ធបរិស័ទរាំក្នុងអំឡុងពេលចូលឆ្នាំកន្លងទៅ ។
ការសម្រេចនេះ ធ្វើឡើងនៅក្នុងកិច្ចប្រជុំគណៈសង្ឃនាយក និងមន្ត្រីក្រសួងធម្មការ កាលពីយប់ថ្ងៃទី ២០ ខែមេសា ។គណៈសង្ឃនាយក បានកោះប្រជុំទាំងយប់ នៅថ្ងៃទី ២០ ខែមេសា ក្រោយពីវីដេអូនៃការច្រៀងចម្រៀងលើឆាកតន្ត្រីរបស់មេគុណខេត្តកំពង់ស្ពឺ ដែលត្រូវបានគេបង្ហោះនៅលើបណ្តាញសង្គមហ្វេសប៊ុក ហើយធ្វើឲ្យមានការរិះគន់យ៉ាងខ្លាំងពីអ្នកប្រើប្រាស់បណ្តាញសង្គមមួយនេះ។
កិច្ចប្រជុំគណៈសង្ឃនាយក កាលពីយប់មិញនេះ ដឹកនាំដោយសម្តេចសង្ឃនាយក នន្ទ ងែត តែម្តង នៅក្នុងវត្តបទុមវត្តី ហើយក៏មានវត្តមានសាមីខ្លួនដែលជាអ្នកប្រព្រឹត្តប្រាសចាកធម៌វិន័យ គឺមេគុណខេត្តកំពង់ស្ពឺ ព្រះអង្គ ឌូ វណ្ឌឌឿន ផងដែរ ។
នៅចំពោះមុខគណៈសង្ឃនាយក ព្រះអង្គ ឌូ វណ្ឌឌឿន បានទទួលស្គាល់កំហុសរបស់ខ្លួន ហើយគណៈសង្ឃនាយក ក៏សម្រេចដកតំណែងរបស់ព្រះអង្គជាមេគុណខេត្តកំពង់ស្ពឺចោលតែម្តង ដើម្បីប្រគល់ឲ្យព្រះសង្ឃដែលគង់នៅវត្តផ្សេងទៀតនៅខេត្តកំពង់ស្ពឺកាន់តំណែងជំនួស ។
គណៈសង្ឃនាយក ចាត់ទុកការច្រៀងរបស់ព្រះតេជគុណ ឌូ វណ្ណឌឿន ថា ជាសកម្មភាពផ្ទុយធម៌វិន័យព្រះពុទ្ធសាសនាជាម្ចាស់ ហើយនិងធ្វើឲ្យប៉ះពាល់ដល់កិត្តិយសព្រះពុទ្ធសាសនា ជាពិសេសគឺកិត្តិយសព្រះសង្ឃ ដែលជាស្រែបុណ្យរបស់ពុទ្ធបរិស័ទ ៕
ចំនួនអ្នកទស្សនា
- ថ្ងៃនេះ3681
- ម្សិលមិញ4461
- សប្តាហ៍នេះ8151
- ខែនេះ30031
- ឆ្នាំនេះ30031
- សរុប20472487