​ភាពយន្ត​បន្ត​របស់​កំពូល​តារា​ក្បាច់គុន​ហុងកុង Jackie Chan មាន​ចំណងជើង​ថា “Kung Fu Yoga”​។ នេះ​ជា​សមិទ្ធផល​រួម​របស់​ផលិតកម្ម​ភាពយន្ត​ចិន​និង​ឥណ្ឌា​ចូលរួម​ផលិត​។​

​តាម​គេហទំព័រ Variety បាន​ឲ្យ​ដឹងថា អ្នកដឹកនាំ​សម្ដែង Stanley Tong និង តារា​សម្ដែង Jackie Chan បានចាប់ផ្ដើម​ថត​រឿង​ក្បាច់គុន “Kung Fu Yoga” នៅ​ទីក្រុង​ឌុយ​បៃ ប្រទេស​អារ៉ាប់​រួម កាលពី​ថ្ងៃទី ២៨ ខែ កញ្ញា​កន្លងមក​។ ភាពយន្ត​នេះ​នឹងត្រូវ​ថត​ចប់​នៅ​ថ្ងៃទី ៣០ ខែតុលា មានន័យថា​ត្រូវ​ចំណាយ​រយៈពេល ៣៣ ថ្ងៃ​ដើម្បី​ថត ហើយនឹង​មាន​ឈុត​ឆាក​មួយចំនួនទៀត​នឹងត្រូវ​បាន​ថត​នៅក្នុង​ប្រទេស​ឥណ្ឌា​។​
 
“Kung Fu Yoga” គឺជា​ការ​ចាប់ដៃ​លើកទីមួយ​រវាង​ផលិតកម្ម​ចិន Taihe Entertainment និង Shinework Media ជាមួយ​ផលិតកម្ម​ឥណ្ឌា Viacom 18 បន្ទាប់ពី​បាន​ចុះកិច្ចសន្យា​សហការគ្នា​កាលពី​ខែ កញ្ញា ឆ្នាំ ២០១៤​។ អ្នកដឹកនាំ​សម្ដែង Stanley Tong បាន​ឲ្យ​ដឹងថា​លោក​នឹង​ប្រើប្រាស់​កម្លាំង​ពលកម្ម​ដែលមាន​ស្រាប់​នៅ ឌុយ​បៃ ក៏ដូចជា​នឹង​យក​បុគ្គលិក​ពី​បណ្ដា​ប្រទេស​ផ្សេងទៀត ១០០ នាក់​ជា​ជំនួយ​។​
 
​ដូចគ្នា​នឹង​រឿង “Fast & Furious 7” ដែរ “Kung Fu Yoga” នឹងមាន​ឈុត​ឆាក​ប្រដេញ​គ្នា​ដោយ​ឡាន​ទំនើប​នៅ​កណ្ដាល​ទីក្រុង​ដែលមាន អាគារ​ខ្ពស់កប់ពពក​របស់​ឌុយ​បៃ​។ បន្ទាប់ពី​រឿង​ក្បាច់គុន​នេះ រឿង​ដែល​បាន​បោះទុន​យ៉ាងច្រើន​របស់​ហូលីវូដ​មួយទៀត​គឺ​រឿង “Star Trek Beyond” របស់​អ្នកដឹកនាំ​សម្ដែង Justin Lin ក៏​នឹង​មក​ថត​នៅ​ទីក្រុង​ស៊ី​វិ​ល័យ​នេះដែរ​៕

​ប្រភព​៖ variety , sabay
​