ក្រុមហ៊ុន  Microsoft បានប្រកាស​កំពូល​ស្មា​ត​ហ្វូ​ន​ជំនាន់​ថ្មី​របស់ខ្លួន​ពីរ​ម៉ូ​ដែល នៅក្នុង​ព្រឹត្តិការ​ដ៏​ធំ​របស់ខ្លួន​ដែល​ប្រព្រឹត្តទៅ​នៅ​ថ្ងៃទី​០៦ ខែតុលា ម្សិលមិញ ក្នុង​ទីក្រុង New York សហរដ្ឋអាមេរិក​។​

​ទូរ​សព្ទ ស្មា​ត​ហ្វូ​ន​ដែល​ក្រុមហ៊ុន​បានប្រកាស​នោះ​មានដូចជា Lumia 950 និង 950XL​។ ចំពោះ​លក្ខណៈសម្បត្តិ​របស់ Lumia 950 វិញ​គឺមាន​អេក្រង់ ៥,២ ប្រភេទ  QHD OLED , CPU ប្រភេទ Qualcomm’s Snapdragon 808 ។ ចំណែកឯ Lumia 950 XL បំពាក់​ដោយ​អេក្រង់​ទំហំ ៥,៧ អ៊ី​ញ ប្រភេទ  QHD OLED និង​មាន CPU ប្រភេទ Snapdragon 810​។​

​ស្មា​ត​ហ្វូ​ន​ទាំងពីរ​គឺ​ត្រូវបាន​បំពាក់ ដោយ​កាមេរ៉ា​ក្រោយ​ទំហំ 20 MP ជាមួយ​មុខងារ  Triple-LED Naural flash, OIS ជំនាន់​ទី​ប្រាំ មាន​ប៊ូ​តុង​កាមេរ៉ា អាច​ចាប់យក​រូបភាព​ក្នុង​កម្រិត 4K និង​មាន​កាមេរ៉ា​មុខ​ទំហំ 5MP ដូចគ្នា​។​
 

​ចំពោះ​ទំហំ RAM វិញ​គឺមាន​ទំហំ 3GB, ម៉េ​មូ​រី 32GB និង​អាច​បន្ថែម​ទំហំ​ខាងក្រៅ​បាន​រហូតដល់​ទៅ 2TB ។ ក្រៅពីនេះ Microsoft បាន​បន្ថែម​រន្ធ USB Type-C ដើម្បី​បង្កើនល្បឿន​នៃ​ការ​សាក​ថាមពល​ថ្ម និង​ល្បឿន​ផ្ទេរ​ទិន្នន័យ​ឲ្យ​កាន់តែ​លឿន និង​មាន​មុខងារ​សុវត្ថិភាព​ថ្មី​មួយ​ឈ្មោះថា Windows Hello ដោយ​អាច Unlock ទូរ​សព្ទ​បាន​ដោយ​ប្រើតែ​សំឡេង​។​
 

​កាន់តែ​ពិសេស​ទៅទៀត​នោះ​ទូរ​សព្ទ​ស្មា​ត​ហ្វូ​ន Lumia ទាំងពីរ​ម៉ូ​ដែល​នេះ​អាច​ប្រើ​បានជា​កុំព្យូទ័រ PC បាន​ថែម​ទៀតផង​។ Lumia 950 និង 950XL គឺ​ដំណើរការ​ដោយ​ប្រព័ន្ធ​ប្រតិបត្តិការ Windows 10 ដូចគ្នា​។​
 
​ចំពោះ​ការដាក់​លក់​វិញ​នឹង​ចាប់ផ្ដើម​នៅ​ខែក្រោយ ដោយ​តម្លៃ​គឺ ៥៤៩ ដុល្លារ សម្រាប់  Lumia 950  និង ៦៤៩ ដុល្លារ​សម្រាប់ Lumia 950 XL ជា​តម្លៃ​នៅ​សហរដ្ឋអាមេរិក​៕
 
​ប្រភព​៖ digitaltrends , sabay
​