ដោយសារស្មាតហ្វូន​កំពុង​មាន​ការ​ពេញ​និយម​ប្រើប្រាស់​ច្រើន​នៅ​លើ​សកលលោក ដូច្នេះ​ហើយ​អ្នក​អភិវឌ្ឍ​កម្មវិធី (developer) ជាច្រើន​បាន​បង្កើត app ល្អ​ប្រើ​ជាច្រើន ក្នុង​នោះ​ហ្គេម​ទូរស័ព្ទ​កំពុង​មាន​ការ​គាំទ្រ​ពី​អ្នក​ប្រើ​យ៉ាង​ខ្លាំង។ ខុស​ពី​ជំនាន់​មុនៗ​ដែល​ហ្គេម​នៅ​លើ​ទូរស័ព្ទ​ដៃ​ធុន​មធ្យម​ពុំ​មាន​ហ្គេម​ល្អ​លេង ដូច​ជា​ហ្គេម​មាន​ក្រាហ្វិក​ស្អាតៗ ខូល័រ​ភ្លឺ​ច្បាស់​លេង​បាន​នៅ​លើ​ស្មាតហ្វូន​ទំនើប​បច្ចុប្បន្ន​នោះ​ទេ។

ចំពោះ​លោក​អ្នក​ដែល​មិន​មាន​ស្មាតហ្វូន​ប្រើ ឬ​មាន​បំណង​ចង់​ប្រើ Android app នៅ​លើ​កុំព្យូទ័រ ដូច្នេះ​អាច​សាកល្បង​ប្រើ​កម្មវិធី​ទាំង៤ ខាង​ក្រោម៖

១. ​ប្រើ​កម្មវិធី BlueStacks ដើម្បី​ដំណើរការ Android app នៅ​លើ Windows

BlueStacks គឺ​ជា​កម្មវិធី​កំពុង​ពេញ​និយម​ប្រើ​ច្រើន​សម្រាប់​ដំណើរការ​កម្មវិធី Android app នៅ​លើ​កុំព្យូទ័រ​ប្រើ Windows OS។ សូម​បញ្ជាក់​ថា កម្មវិធី​នេះ​មិន​ជំនួស​ប្រព័ន្ធ​ប្រតិបត្តិការ​កុំព្យូទ័រ​របស់​អ្នក​នោះ​ ទេ តែ​វា​នឹង​អាច​ឱ្យ​អ្នក​ដំណើរការ​កម្មវិធី Android app ជាមួយ Windows នៅ​លើ Desktop កុំព្យូទ័រ​របស់​អ្នក​បាន។ មាន​ន័យ​ថា BlueStacks ក៏​ដូច​ជា​កម្មវិធី​ទូទៅ​ដែល​ដំណើរការ​នៅ​លើ​កុំព្យូទ័រ​អីចឹង​ដែរ។

កម្មវិធី BlueStacks ថែមទាំង​គាំទ្រ​ការ​ដំឡើង (install) នូវ​កម្មវិធី (app) ពី Google Play ដូច​ជា​នៅ​លើ​ស្មាតហ្វូន​ដែរ ប៉ុន្តែ app ដែល​ដំណើរការ​នៅ​ក្នុង​កម្មវិធី BlueStacks គឺ​មាន​ភាព​រលូន​ស្រួល​ជាង​នៅ​លើ​ស្មាតហ្វូន ដោយសារ​វា​ស្ថិត​នៅ​លើ​កុំព្យូទ័រ មាន​លក្ខណៈ​សម្បត្តិ​ខ្ពស់​ជាង​ទូរស័ព្ទ។

២. ប្រើ​កម្មវិធី Android Emulator

Google បាន​ដាក់​ចេញ​កម្មវិធី Android emulator ដែល​ជា​ផ្នែក​មួយ​នៃ Android SDK។ អ្នក​អាច​ប្រើ​កម្មវិធី​នេះ​ដើម្បី​ដំណើរការ​ប្រព័ន្ធ​ប្រតិបត្តិការ Android នៅ​លើ windows បាន។ កម្មវិធី​នេះ ត្រូវ​បាន​បង្កើត​ឡើង​សម្រាប់​ផ្ដល់​ភាព​ងាយស្រួល​ក្នុង​ការ​ធ្វើតេស្ត​ កម្មវិធី Android។ ក៏ប៉ុន្តែ​ជំនាន់​កម្មវិធី Android emulator ផ្លូវការ បែរ​ជា​ដំណើរការ​យឺត ហើយ​ពុំ​ជា​ជម្រើស​ល្អ​ក្នុង​ការ​ដំណើរការ​សម្រាប់​ប្រើ Android OS ជាមួយ​កុំព្យូទ័រ Windows ឡើយ។ ជំនាញ​របស់​កម្មវិធី​នេះ គឺ​សម្រាប់​តែ​ធ្វើតេស្ត​ជាមួយ​ជំនាន់ Android ចុងក្រោយ ប៉ុន្តែ​អ្នក​អាច​មិន​ចូលចិត្ត​ប្រើ​វា​សម្រាប់​ដំណើរការ​កម្មវិធី (app) និង​ហ្គេម Android នោះ​ឡើយ។

ដើម្បី​បាន​កម្មវិធី Android Emulator អ្នក​អាច​ទាញ​យក (download) នូវ Android SDK របស់ Google រួច​ហើយ​បើក​កម្មវិធី SDK Manager ហើយ​ចូល​ទៅ Tool → Manage AVDs។ ចុច​លើ​ប៊ូតុង New ហើយ​បង្កើត Android Virtual Device (AVD) មួយ​ជាមួយ​ការ​កំណត់ configuration តាម​តម្រូវការ​របស់​អ្នក។ បន្ទាប់​មក​ចុច​លើ​ប៊ូតុង Start ដើម្បី​ដំណើរការ​ជា​ការ​ស្រេច។

៣. Android-X86

Android-X86 គឺ​ជា​គម្រោង​នៃ​ការ​ច្របាច់​បញ្ចូល​ឱ្យ​ប្រព័ន្ធ​ប្រតិបត្តិការ Android អាច​ប្រើ​ជា​ទម្រង់ X86 platform បាន ដូច្នេះ​វា​ក៏​អាច​ដំណើរការ​បាន​ជា​លក្ខណៈ​ដើម​ស្រាប់ៗ​នៅ​លើ​អង្គ​ ប្រតិបត្តិ Intel និង AMD ក៏​អាច​ឱ្យ​អ្នក​ដំឡើង Android ចូល​ទៅ​ក្នុង​កុំព្យូទ័រ Laptop ឬ​ថេប្លេត​បាន។ ​បច្ចុប្បន្ន​មាន​តែ​ឧបករណ៍​ប៉ុន្មាន​ម៉ូដែល​ប៉ុណ្ណោះ​ដែល​ទទួល​បាន​ការ​ ដាក់​ឱ្យ​គាំទ្រ​នូវ Android-X86 នេះ ជាក់ស្ដែង​មាន​ដូច​ជា ASUS Eee PCs, Viewsonic Viewpad 10, Dell Inspiron Mini Duo, Samsung Q1U, Viliv V5 និង​ថេប្លេត Lenovo ThinkPad X61។

ទោះជា​យ៉ាងណា អ្នក​ក៏​អាច​​ដំឡើង VirtualBox ជំនួស ដើម្បី​អាច​ដំឡើង Android ទៅ​ក្នុង Virtual machine នេះ​ក៏​បាន។

៤. Android នៅ​លើ​ Intel Architecture

ក្រុមហ៊ុន Intel បាន​អភិវឌ្ឍ software ‘distribution’ នៃ​ប្រព័ន្ធ​ប្រតិបត្តិការ Android សម្រាប់​កុំព្យូទ័រ​បំពាក់​អង្គ​ប្រតិបត្តិ Intel-base PCs ជាមួយ UEFI firmware។ Software នេះ​ត្រូវ​បាន​ហៅ​ឈ្មោះ​ថា Android on Intel Architecture ឬ Android-IA។ ក្រុមហ៊ុន​អាមេរិក​នេះ ក៏​បាន​ផ្ដល់​នូវ installer ដែល​អាច​ឱ្យ​អ្នក​ធ្វើការ​ដំឡើង Android ចូល​ទៅ​ម៉ាស៊ីន​កុំព្យូទ័រ និង​ថេប្លេត​ដែល​ប្រើ Windows 8 ផង​ដែរ។

Installer នឹង​សួរ​អ្នក​ប្រសិនជា​អ្នក​ចង់​ទុក Windows ដើម្បី​ផ្ដល់​ជម្រើស dual-boot នៅ​លើ​កុំព្យូទ៧រ និង​ថេប្លេត។ ទោះជាយ៉ាងណា គម្រោង​នេះ​ពុំ​ទាន់​ដំណើរការ​ស្រួលបួល​ទៀងទាត់​នៅ​លើ​ឧបករណ៍​អេឡិចត្រូនិក​ នៅ​ឡើយ​ទេ។ ​បច្ចុប្បន្ន​ឧបករណ៍​ដូច​ជា Samsung XE700T, Acer Iconia W700 និង Lenovo X220T និង X230T កំពុង​ត្រូវ​គេ​ផ្ដល់​ការ​គាំទ្រ Android -IA នេះ៕

ប្រភព៖ howtogeek , bizkhmer