សុគន្ធ នីសា វិលរកទ្រនំចាស់វិញ ព្រោះអ្វី?
09-December-2015 | ដោយ ពល រាជសី
ភ្នំពេញ៖ បន្ទាប់ពី ពេជ្រ សោភា ប្រកាសចាកចេញពីហង្សមាសនោះ ថ្មីៗនេះក៏មានដំណឹងទម្លាយចេញពីមាត់អតីតគូស្នេហ៍តារាចម្រៀង សុគន្ធ នីសា ក៏ដូចជាមហាជនថា តារាស្រីរូបនេះក៏គ្រោងវិលទៅរកទ្រនំចាស់នៅហង្សមាសវិញ។
យ៉ាងណាដំណឹងនេះមិនត្រូវបានអ្នកគ្រប់គ្រងនៅផលិតកម្មថោនជាទ្រនំ បច្ចុប្បន្នរបស់ សុគន្ធ នីសា បដិសេធ ឬទទួលស្គាល់ទេ ខណៈនាងមិនទាន់បានដាក់លិខិតលាឈប់នៅឡើយ។
នេះជាសម្តីអះអាងរបស់លោក មាស សុខរតនៈ ដែលជាអ្នកគ្រប់គ្រងរបស់ផលិតកម្មថោន «ផលិតកម្មថោន មិនទាន់បានទទួលពាក្យ ឬលិខិតសុំលាឈប់របស់ កញ្ញា សុគន្ធ នីសា នៅឡើយទេមកទល់នឹងពេលនេះ។ ម្យ៉ាងទៀតថ្មីៗនេះខាង ថោន ក៏ទើបតែនឹងចេញអាល់ប៊ុម VCD Vol ៨៤ ឲ្យនាងតែម្នាក់ឯងដែរ។ តែប្រសិនបើ សុគន្ធ នីសា មានបំណងចង់ចេញពីថោនមែននោះ នាងមានសិទ្ធិសម្រេចព្រោះនាងមិនបានជាប់កុងត្រានឹងថោនទេ ព្រោះការចូលមកច្រៀងនៅក្នុងផលិតកម្មថោននោះ គឺនាងក្នុងនាមជាតារាចម្រៀងមិនធ្វើកុងត្រាឡើយ»។
ប្រភពក្រៅផ្លូវការនេះ បានលើកឡើងថា សុគន្ធ នីសា នឹងវិលចូលវិញ ព្រោះថាកាលពេលចាកចេញពីហង្សមាសរបស់នាងក៏មិនមានបញ្ហាវិវាទអ្វីជាមួយហង្សមាសដែរ គឺពេលនោះគ្រាន់តែនាងចង់បែកពីលោក សុខ ជំនោរ ប៉ុណ្ណោះ ព្រោះមិនចង់នៅធ្វើការឃើញមុខគ្នា ហើយពេលនេះលោក សុខ ជំនោរ ក៏បានចេញពីហង្សមាសដែរ ដូច្នេះនាងក៏ចង់វិលមករកទ្រនំចាស់វិញ។
ព័ត៌មានខាងលើនេះយើងមិនទទួលបានការឆ្លើយតបពី សុគន្ធ នីសា ទេ ព្រោះលេខទូរស័ព្ទដែលនាងធ្លាប់ប្រើមិនអាចទាក់ទងបាន។
រឿងរ៉ាវដ៏ក្ដៅគគុកនៅក្នុងពិភពសិល្បៈ បានកើតឡើងជាបន្ដបន្ទាប់ និងកំពុងតែធ្វើឲ្យមហាជននិយាយដេញដោលគ្នា ដោយអ្នកគាំទ្រខ្លះកំពុងតែជ្រួលច្របល់ និងតាមដានយ៉ាងយកចិត្តទុកដាក់ពីដំណើរវិវត្តន៍យ៉ាងណាសម្រាប់កញ្ញា សុគន្ធ នីសា វិលចូលផលិតកម្មហង្សមាស និងការចាកចេញពីហង្សមាសរបស់អ្នកនាង ពេជ្រ សោភា នោះ។
មានប្រភពមួយបានទម្លាយមកថា តារាចម្រៀងប្ដូរទ្រនំថ្មីចូលចាស់វិញ កញ្ញា សុគន្ធ នីសា កំពុងតែត្រៀមខ្លួនត្រឡប់ មកជម្រកចាស់វិញ គឺផលិតកម្មហង្សមាស ជាថ្នូរនឹងតំណែងថ្មីគឺធ្វើជាគណៈកម្មការកម្មវិធី «X FACTOR» ដែលទូរទស្សន៍ហង្សមាសកំពុងតែត្រៀមផលិតនោះ។
ពាក់ព័ន្ធនឹងព័ត៌មានខាងលើនេះ អតីតគូស្នេហ៍របស់នាងលោក សុខ ជំនោរ បានចេញមុខទទួលស្គាល់តាមរយៈសំឡេងនៅក្នុងYoutube ថា៖ «ខ្ញុំហ៊ានថា ៩០ ភាគរយ ដែលគាត់ត្រឡប់រកទ្រនំចាស់ ហើយការដឹងនេះគឺខ្ញុំ ដឹងពីម្ចាស់សាមីខ្លួន នីសា ផ្ទាល់គាត់បានប្រាប់ខ្ញុំថា ខាងហង្សមាសបានចែចូវគាត់ តែខ្ញុំមិនបានដឹងថា នីសា គាត់គិតបែបណានោះទេ ហើយខ្ញុំសុំច្រានចោលនូវការដែលថា នីសា វិលចូលផលិតកម្មចាស់នេះ មិនមែន ដោយសារ មូល ហេតុមានការផ្លាស់ប្តូរ ឬក៏ដោយសារខ្ញុំឈប់ពីហង្សមាស ទើប នីសា ចូលទេ។ តាមពិតទៅខ្ញុំក៏បានឈប់ពីហង្សមាសយូរហើយ ប្រមាណជិត ៥ ខែទៅហើយ ខណៈរឿងដែល នីសា វិលរកទ្រនំចាស់នេះគឺទើបតែលេចនាពេលថ្មីៗនេះ»៕
ចំនួនអ្នកទស្សនា
- ថ្ងៃនេះ5671
- ម្សិលមិញ12561
- សប្តាហ៍នេះ33621
- ខែនេះ55501
- ឆ្នាំនេះ55501
- សរុប20497957