​ភ្នំពេញ​៖ មជ្ឈមណ្ឌល​កម្សាន្ត Rock ក៏ដូចជា Zeus ក្លឹប បានរៀបចំ​ព្រឹត្តិការណ៍ ប្រកួតប្រជែង​សមត្ថភាព DJ ក្នុងប្រទេស​កម្ពុជា (Cambodian Djs Champion Ship 2016) ជា​លើកដំបូង​បង្អស់​ដើម្បី​ស្វែងរក​អ្នក​ដែលមាន​ទេពកោសល្យ និង​ជំនាញ DJ ពិតប្រាកដ​តំណាង​ឲ្យ​ប្រទេស​ខ្មែរ ទៅ​ចូលរួម​ប្រកួត ជាមួយនឹង DJ នៅក្នុង​បណ្ដា​ប្រទេស​ក្នុង​តំបន់​អាស៊ី និង​អឺរ៉ុប ហើយក៏​មានឱកាស​ឈ្នះ​ប្រាក់​ប្រមាណ​ជិត​៥​ពាន់​ដុល្លារ​ផងដែរ​ពី​កម្មវិធី​ប្រកួត​ពុំ​ធ្លាប់មាន​នេះ​។​

​ពិធី​ប្រកាស​ទទួល​ពាក្យ អ្នកចូលរួម​ប្រកួត ត្រូវបាន​ធ្វើឡើង កាលពី​រសៀល​ថ្ងៃទី​២៩ ខែធ្នូ ឆ្នាំ​២០១៥ នៅ​មជ្ឈមណ្ឌល​កម្សាន្ត រ៉ក់ ដោយមាន​ការចូលរួម​ពី​សំណាក់​អ្នកមាន​ទេពកោសល្យ​ខាង DJ និង​គណៈកម្មការ​នៃ​ការរៀបចំ​ប្រកួត​ដែល​ព្រឹត្តិការណ៍​នេះ​ធ្វើឡើង ក្នុង​គោលបំណង​ដើម្បី​ឲ្យ​ដឹងថា ក្នុងប្រទេស​កម្ពុជា​ក៏មាន​កូន​ខ្មែរ មាន​ទេពកោសល្យ​ខាង DJ មិន​ចាញ់​ប្រទេសជិតខាង​ឡើយ ទោះបីជា​ការប្រកួត​ជ្រើសរើស ទើបតែ​មាន​ជា​លើកដំបូង​ក្ដី ប៉ុន្តែ​ភាព​រីកចម្រើន​ខាង​ជំនាញ DJ មានការ​កើនឡើង​គួរ​ឲ្យ​កត់សម្គាល់​។​

​លោក Raindy នាយក​គ្រប់គ្រង​ទីផ្សារ​នៃ​មជ្ឈមណ្ឌល​កម្សាន្ត Rock និង Zeus ក្លឹប បាន​ថ្លែង​ឲ្យ​ដឹងថា ដោយ​មើលឃើញ​ពី​ភាព​រីកចម្រើន​នៃ​សមត្ថភាព DJ របស់​កូន​ខ្មែរ​និង​ពុំ​ធ្លាប់មាន​ការប្រកួត​ជ្រើសរើស​នេះ ទើប​មជ្ឈមណ្ឌល​កម្សាន្ត Rock ក៏ដូចជា Zeus បាន​សហការ​ជាមួយ​ស្ថាប័ន​អ្នកមាន​ជំនាញ DJ មកពី​ក្រៅប្រទេស ក្រោម​ការណែនាំ​ពី​អ្នកឧកញ៉ា គិត ធាង រៀបចំ​កម្មវិធី​នេះ​ឡើង​ក្នុង​គោលបំណង​លើក​កំពស់​លើ​ផ្នែក DJ ប្រទេស​កម្ពុជា និង​ផ្ដល់ឱកាស ស្វែងរក​កូន​ខ្មែរ​ដែលមាន​សមត្ថភាព​ពិតប្រាកដ ដើម្បី​ចូលរួម​ប្រកួត នៅលើ​ឆាក​អន្តរជាតិ​ទាំង​ក្នុង​តំបន់​អាស៊ី និង​អឺរ៉ុប​។​

​លោក​បន្តថា នេះ​ជា​លើក​ទី​១​ដែល​មជ្ឈមណ្ឌល​រ៉ក់ រៀបចំ​កម្មវិធី​នោះ​ឡើង ខណៈ​កាលពីមុន​យើង​ធ្លាប់​បានរៀបចំ​កម្មវិធី Rock Star បន្ទាប់មក​ក៏​ឃើញ​មាន​ក្រុមហ៊ុន​ជាច្រើន​រៀបចំ​កម្មវិធី ប្រកួតប្រជែង​ស្រដៀង​គ្នា​នេះដែរ ។ ជាមួយគ្នានេះ​មជ្ឈមណ្ឌល​កម្សាន្ត Rock ក្នុង​គោលបំណង​ស្វែងរក​កំពូល DJ ប្រចាំ​ប្រទេស​កម្ពុជា ហើយ​ពេល​រកឃើញ យើង​នឹង​ដឹកនាំ DJ ដែល​ទទួល​ជ័យលាភី​ទៅ​ចូលរួម​ប្រកួតប្រជែង​នៅក្រៅ​ប្រទេស ដែល​យើង​បានធ្វើ​ការសហការ​ជាមួយ​បណ្ដា​ប្រទេស​ជាច្រើន ដូចជា អាហ្វ្រិក អាមេរិក ថៃ ហុងកុង​និង​សឹង្ហ​បុរី​ជាដើម​។​

​សូមបញ្ជាក់ថា បេក្ខជន​-​បេ​ក្ខ​នារី​ដែល​ទទួលបាន​ជ័យជំនះ ក្នុង​កម្មវិធី​ប្រកួតប្រជែង​សមត្ថភាព DJ នេះ​នឹង​មានឱកាស​ឈ្នះ​ប្រាក់រង្វាន់​ជា​ទឹកប្រាក់​១០ លាន​រៀល និង​ក្លាយជា DJ ប្រចាំ​មជ្ឈមណ្ឌល​កម្សាន្ត Rock និង Zeus Club ។ បេក្ខជន​-​បេ​ក្ខ​នារី​មាន​ចំណាប់អារម្មណ៍​អាចដាក់​ពាក្យ​ចូលរួម​ប្រកួត តាមរយៈ​គេហទំព័រ www.cambodianDjs.com ឬ​ទៅ​ទទួល​ពាក្យ​នៅ មជ្ឈមណ្ឌល​កម្សាន្ត Rock និង Zeus ក្លឹប​ចាប់ពី​ថ្ងៃ​ផ្សាយដំណឹង​រហូតដល់​ថ្ងៃទី​១៣ ខែមករា និង​ប្រកួត​ជម្រុះ​ដំបូង​នៅ​ថ្ងៃទី​១៥ ខែមករា ឆ្នាំ​២០១៦ នៅ​មជ្ឈមណ្ឌល​កម្សាន្ត Rock​។

​ដោយឡែក​គណៈកម្មការ​ក្នុង​កម្មវិធី​នេះ គឺមាន​ជនជាតិខ្មែរ​ចំនួន​២​រូប មាន​លោក Raindy និង ឌី​ជេ Cake និង ឌី​ជេ​បរទេស ២​រូប ផងដែរ​៕

​