ឯកឧត្ដម ប្រាជ្ញ ចន្ទ និងលោក ជំទាវ អញ្ជើញកាន់បិណ្ឌទី៨ នៅវត្តបុញ្ញេត្តារាម ខេត្តត្បូងឃ្មុំ
07-October-2015 | ដោយ ខ្លុយខ្មែរ-ID-1
ត្បូងឃ្មុំ៖ ឯកឧត្ដម ប្រាជ្ញ ចន្ទ អភិបាលនៃគណៈអភិបាលខេត្តត្បូងឃ្មុំ និងលោកជំទាវ រួមដំណើរជាមួយ ឯកឧត្ដមអភិបាលរងខេត្ត ព្រមទាំងថ្នាក់ដឹកនាំមន្ទីរ អង្គភាព ស្ថាប័ននានា និងមន្ដ្រីរាជការក្រោមឱវាទជុំវិញខេត្ត និងអាជ្ញាធរមូលដ្ឋាន បានអញ្ជើញកាន់បិណ្ឌ៨ ថ្ងៃទី០៥ ខែតុលា ឆ្នាំ២០១៥ នៅវត្តបុញ្ញេត្តារាម ហៅវត្តទួលទ្រាត្បូងឃ្មុំ ស្ថិតនៅភូមិទួលទ្រាត្បូង ឃុំជុប ស្រុកត្បូងឃ្មុំ ខេត្តត្បូងឃ្មុំ ។
ក្នុងឱកាសថ្ងៃកាន់បិណ្ឌនៅវត្តបុញ្ញេត្តារាម ហៅវត្តទួលទ្រាត្បូង ស្ថិតនៅស្រុកត្បូងឃ្មុំ ខេត្តត្បូងឃ្មុំ នោះដែរ ឯកឧត្ដមអភិបាលខេត្ត និងលោកជំទាវ ព្រមទាំងប្រតិភូអមដំណើរ អញ្ជើញរាប់បាត្រ ដើម្បីឧទិ្ទសកុសល ផលបុណ្យ ជូនដល់អ្នកមានគុណ ព្រមទាំងបុព្វការីជន និងវិញ្ញាណខ័ន្ធអ្នកស្នេហាជាតិ ដែលបានទទួលមរណភាពទៅកាន់លោកខាងមុខ។ តមកព្រះសង្ឃក៏បានចំរើនព្រះបរិត បង្សុកូល និងវេប្រគេនព្រះសង្ឃ ទៅតាមគន្លងប្រពៃណីព្រះពុទ្ធ សាសនានៃយើង។
បន្ទាប់ពីបានប្រារព្ធពិធីវេរនូវទេយ្យទាន ប្រគេនដល់ព្រះសង្ឃ ទៅតាមគន្លងប្រពៃណីព្រះពុទ្ធសាសនារួចមក ឯកឧត្ដម ប្រាជ្ញ ចន្ទ មានប្រសាសន៍សំណេះសំណាលជាមួយប្រជាពលរដ្ឋ ពុទ្ធបរិស័ទចំណុះជើងវត្ត បានបញ្ជាក់ថា តាមប្រពៃណីរបស់ខ្មែរយើងតាំងពីដូនតាមកបានកំណត់ថា ចាប់ពីថ្ងៃ១រោច ដល់១៤រោច ខែភទ្របទ គឺជាថ្ងៃកាន់បិណ្ឌឬថ្ងៃដាក់បិណ្ឌចំណែកឯថ្ងៃ១៥រោច ខែភទ្របទ ជាថ្ងៃភ្ជុំបិណ្ឌ ។
ឯកឧត្ដម អភិបាលខេត្ត បានរំលឹកថា តាមទំនៀមទំលាប់ប្រជាពលរដ្ឋពុទ្ធបរិស័ទជិតឆ្ងាយ បានជួបជុំគ្នានៅតាមទីវត្តអារាម ធ្វើចង្ហាន់ប្រគេនព្រះសង្ឃ ដើម្បីឧទ្ទិមគ្គផលសកុសលផលបុណ្យ ជូនដល់មាតា បិតា ព្រមទាំងញ្ញាតិការទាំង៧សន្ដាន ដែលបានចែកដ្ឋានទៅលោកខាងមុខ និងបុព្វការីជន ដែលបានពលីជីវិត ដើម្បីជាតិមាតុភូមិ ។ ផ្ទុយស្រឡះ កាលពីរបបប្រល័យពូជសាសន៍ ៣ឆ្នាំ ៨ខែ និង ២០ថ្ងៃ គ្រប់ វិស័យត្រូវបាន ទមិឡ អត់សាសនាបំផ្លាញចោលទាំងស្រុង រាប់ទាំងវិស័យព្រះពុទ្ធសាសនាផងដែរ ។
ឯកឧត្ដម បានបន្តទៀតថា បច្ចុប្បន្នរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានខិតខំកសាង និងធ្វើឲ្យប្រទេសជាតិមានការអភិវឌ្ឍន៍មានការរីកចម្រើនលើគ្រប់វិស័យ ទាំងផ្នែកពុទ្ធចក្រ និងផ្នែកអាណាចក្រ ក្នុងនោះក៏បានធ្វើឲ្យប្រទេសជាតិមានសុខសន្តិភាព ផ្ដល់ឱកាសងាយស្រួលទៅដល់ប្រជាពលរដ្ឋ ប្រកបរបបទទួលទាន មានជីវភាពកាន់តែប្រសើរឡើង ។
ស្ថិតនៅក្នុងឱកាសនោះដែរ ឯកឧត្តម ប្រាជ្ញ ចន្ទ និងលោកជំទាវ រួមជាមួយសប្បុរសជន និងមន្ត្រីរាជការក្នុងខេត្តត្បូងឃ្មុំ បាននាំយកបច្ច័យរួមមាន ៖ អង្ករ២០០គីឡូក្រាម ទឹកសុទ្ធ ១០កេះ ទឹកក្រូច ០៥កេះ មី ៤កេះធំ តែ ៥០កញ្ចប់ ស្ករ ៥០គីឡូក្រាម ទឹកដោះគោ ០២កេះ ប្រគេនព្រះសង្ឃសរុបចំនួន១៣៧អង្គ ក្នុង០១អង្គ ទទួលបានថវិការចំនួន ២០.០០០រៀល យាយជី តាជី ទទួលបានថវិការចំនួន១០.០០០រៀល និងបច្ច័យចំនួន ៤,០០០,០០០រៀល ដើម្បីរួមចំណែកក៏សាងសមិទ្ធិផល ក្នុងវត្តបុញ្ញេត្តារាម(ទួលទ្រាត្បូង) ផងដែរ៕
ប្រភព៖ ទំព័ររដ្ឋបាលខេត្តត្បូងឃ្មុំ
ចំនួនអ្នកទស្សនា
- ថ្ងៃនេះ8071
- ម្សិលមិញ10901
- សប្តាហ៍នេះ23451
- ខែនេះ45331
- ឆ្នាំនេះ45331
- សរុប20487787