ឯកឧត្តម នូ ភឿង ប្រធានក្រុមប្រឹក្សាខេត្តក្រចេះ ប្រារព្ធពិធីអបអរសាទរថ្ងៃបុណ្យឯករាជ្យជាតិ
09-November-2015 | ដោយ មួយឡា
ក្រចេះ៖ នៅព្រឹកថ្ងៃទី០៩ ខែវិច្ឆិកា ឆ្នាំ២០១៥ បានប្រារព្ធពិធីអបអរសាទរ ថ្ងៃបុណ្យឯករាជ្យជាតិលើកទី ៦២ (៩ វិច្ឆិកា ឆ្នាំ១៩៥៣ ~ ៩ វិច្ឆិកា ឆ្នាំ២០១៥) និងទិវាកំណើតនៃកងយោធពលខេមរភូមិន្ទ ក្រោមអធិបតីភាពដ៏ខ្ពង់ខ្ពស់ ឯកឧត្តម នូ ភឿង ប្រធានក្រុមប្រឹក្សាខេត្តក្រចេះ និង ឯកឧត្តម សរ ចំរុង អភិបាលនៃគណៈអភិបាលខេត្តក្រចេះ ។
ក្នុងពិធីនេះដែរ មានការអញ្ជើញចូលរួមពីថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ ដើម្បីគោរពវិញ្ញាណក្ខ័ន្ធ ចំពោះបុព្វបុរស វិរៈយុទ្ធជន យុទ្ធនារី ដែលពលីជីវិតដើម្បីជាតិមាតុភូមិ ។
ឯកឧត្តម សរ ចំរុង អភិបាលខេត្តមានប្រសាសន៍ ពិតណាស់ គឺប្រជារាស្រ្តខ្មែរទូទាំងប្រទេសចងចាំជានិច្ចនូវព្រះរាជបូជនីយកិច្ចដ៏ថ្លៃថ្លាបំផុតរបស់ ព្រះករុណា ព្រះមហាវីរក្សត្រ សម្តេចព្រះ នរោត្តម សីហនុ ព្រះបរមរតនកោដ្ឋ ដែលព្រះអង្គបានតស៊ូ និងលះបង់គ្រប់យ៉ាងក្នុងការទាមទារឯករាជ្យ ពីបារាំងជូនជាតិមាតុភូមិ។
ចាប់តាំងពី ព្រះរាជាណាចក្រកម្ពុជា បានទទួលឯករាជ្យពេញលេញ នៅថ្ងៃទី៩ វិច្ឆិកា ឆ្នាំ១៩៥៣ គឺអតីត ព្រះមហាក្សត្រ សម្តេចព្រះ នរោត្តម សីហនុ ព្រះបរមរតនកោដ្ឋ ព្រះអង្គបានស្ថាបនា និងអភិវឌ្ឍន៍កម្ពុជាឥតឈប់ឈរ ដែលបានធ្វើអោយប្រទេសយើងរីកចម្រើនគ្រប់វិស័យ។
នៅពេលនោះ ព្រះរាជាណាចក្រកម្ពុជា បានក្លាយជាប្រទេសដែលមានឥទ្ឋិពលមួយនៅអាស៊ី ដែលប្រជារាស្រ្ត រស់នៅដោយសុខសាន្តបំផុតក្រោមការដឹកនាំរបស់ព្រះអង្គ។
ជាអកុសលនៅថ្ងៃទី ១៨ មិនា ឆ្នាំ ១៩៧០ លន់ នុល បានធ្វើរដ្ឋប្រហារផ្តួលរំលំអតីតព្រះប្រមុខរដ្ឋ ហើយបន្ទាប់មកបាននាំកម្ពុជាទាំងមូលអោយធ្លាក់ក្នុងរណ្តៅវាលពិឃាតតែម្តង។ នេះគឺជាមេរៀនគំរូស្រាប់ ដែលបានបន្សល់ទុកនូវសោកនាដកម្មជាលទ្ឋផលនៃការផ្លាស់ប្តូរទម្លាក់ប្រមុខដឹកនាំតាមការផ្តួលរំលំដើម្បីអំណាច។
ពេលនេះ កម្ពុជាត្រូវតែចៀសអោយឆ្ងាយពីផ្លូវដ៏សែនគ្រោះថ្នាក់បំផុតនោះ។ ជាពិសេស គណបក្សប្រជាជន និងយើងខ្ញុំព្រះករុណាទាំងអស់គ្នា គឺប្តេជ្ញាការពាររដ្ឋធម្មនុញ្ញ ការពារព្រះមហាក្សត្រ និងការពារសុខសន្តិភាពជូនកម្ពុជាអោយខានតែបាន។
ព្រះរាជបូជនីយកិច្ច និងគុណូបការៈដ៏ធំធេងដែល ព្រះបរមរតនកោដ្ឋ បានបន្សល់ទុកអោយកម្ពុជា គឺយើងខ្ញុំព្រះករុណាទាំងអស់គ្នាប្តេជ្ញាបន្តនូវមរតកជាតិដ៏ឧត្តុង្គឧត្តមនេះ ដើម្បីចូលរួមដឹកនាំអភិវឌ្ឍន៍ប្រទេសស្របតាមព្រះរាជតម្រិះដ៏ខ្ពង់ខ្ពស់ បំផុតរបស់ព្រះអង្គ ដើម្បីធ្វើអោយកម្ពុជាទាំងមូលរីកលូតលាស់ខ្លាំងឡើង។
នៅក្នុងខួបឯករាជ្យជាតិ និងក៏ជាថ្ងៃខួបកំណើតកងទ័ពគំរប់ ៦២ឆ្នាំ (៩ វិច្ចកា ១៩៥៣-៩វិច្ចកា ២០១៥) ដ៏វិសេសវិសាលថ្ងៃនេះ យើងខ្ញុំព្រះករុណា សូមជូនពរដល់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ ជួបប្រទះតែសេចក្តីសុខ និងទទួលនូវពុទ្ឋពរទាំង៤ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕
ប្រភព៖ ទំព័រការិយាល័យសាលាខេត្តក្រចេះ
ចំនួនអ្នកទស្សនា
- ថ្ងៃនេះ3061
- ម្សិលមិញ12561
- សប្តាហ៍នេះ31011
- ខែនេះ52891
- ឆ្នាំនេះ52891
- សរុប20495347