​ភ្នំពេញ​៖ នៅ​ព្រឹក​ថ្ងៃទី​១៧ ខែវិច្ឆិកា ឆ្នាំ​២០១៥ សាលាខណ្ឌ​ព្រែក​ព្នៅ បាន រៀបចំ​ពិធីបើកការដ្ឋាន​ស្ថាបនា​ផ្លូវ​បេតុង​ចំនួន ០២​ខ្សែ មាន​ប្រវែង ៧៩៦​ម៉ែត្រ ស្ថិតនៅ​ភូមិ​សំរោង​កណ្តាល សង្កាត់​សំរោង ខណ្ឌ​ព្រែក​ព្នៅ រាជធានី​ភ្នំពេញ​។​

​ពិធីបើកការដ្ឋាន​នេះ ប្រារព្ធ​ធ្វើឡើង​ដោយមាន​ការអញ្ជើញ​ចូលរួម​យ៉ាងច្រើន​កុះករ​ពី​សំណាក់​មន្ត្រី​ពាក់ព័ន្ធ និង​បងប្អូន​ប្រជាពលរដ្ឋ​ក្នុង​មូលដ្ឋាន ក្រោម​អធិបតីភាព ​លោក សុខ សម្បត្តិ អភិបាល​នៃ​គណៈ​អភិបាលខណ្ឌ​ព្រែក​ព្នៅ និង​លោក ម៉ៅ បូរ៉ា ប្រធាន​ក្រុមប្រឹក្សា​ខណ្ឌ​ព្រែក​ព្នៅ ។​

​សូម​បញ្ជក់​ផងដែរ​ថា ផ្លូវ​បេតុង​ដែល​បានធ្វើ​ពិធីបើកការដ្ឋាន​នាពេលនេះ គឺជា​ថវិកា​ផ្ទាល់​របស់​មូលនិធិ​អភិវឌ្ឍន៍​របស់​ខណ្ឌ ដែល​ត្រូវបាន​ចំណាយ​អស់​ទឹកប្រាក់​ចំនួន ៧៤៥,១៤៧,០០០​រៀល ។​

​ឆ្លៀត​ក្នុងឱកាស​នេះ លោក សុខ សម្បត្តិ អភិបាលខណ្ឌ​ព្រែក​ព្នៅ បាន​ថ្លែង​ឲ្យ​បងប្អូន​ប្រជាពលរដ្ឋ​ទាំងអស់ ចូលរួម​ថែរក្សា​ការពារ​ទ្រព្យសម្បត្តិ​សាធារណៈ ឲ្យ​បាន​គង់វង្ស​យូរអង្វែង ដើម្បី​ទុក​បម្រើ​ប្រយោជន៍​ដល់​យើង​គ្រប់គ្នា​៕

​ប្រភព​៖ ទំព័រ​សាលាខណ្ឌ​ព្រែក​ព្នៅ​

​