ជំនួបរវាង ឯកឧត្តម ខៀវ មុត រដ្ឋលេខាធិការក្រសួងបរិស្ថាន ជាមួយប្រតិភូសាធារណរដ្ឋកូរ៉េ
02-December-2015 | ដោយ មួយឡា
ភ្នំពេញ៖ នៅទីស្តីការក្រសួងបរិស្ថាន នាព្រឹកថ្ងៃទី០១ ខែ ធ្នូ ឆ្នាំ ២០១៥ ឯកឧត្តម ខៀវ មុត រដ្ឋលេខាធិការក្រសួងបរិស្ថាន បានអនុញ្ញាតអោយប្រតិភូសាធារណរដ្ឋកូរ៉េ ដែលមានតំណាងមកពីក្រសួងពាណិជ្ជកម្ម ឧស្សាហកម្ម និងថាមពល ក្រសួងបរិស្ថាន និងវិទ្យាស្ថានកូរ៉េដើម្បីអភិឌ្ឍន៍បចេ្ចកវិទ្យា បានជួបពិភាក្សាអំពីកិច្ចសហការរៀបចំគម្រោងហេដ្ឋរចនាសម្ពន្ធ័គ្រប់គ្រងសំណល់រឹងសម្រាប់ការកែឆ្នៃនិងប្រព្រិត្តកម្ម។
នៅក្នុងជំនួបនេះ ឯកឧត្តមរដ្ឋលេខាធិការ បានស្វាគមន៍និងគាំទ្រលើកិច្ចសហការរៀបចំនិងអនុវត្តគម្រោងខាងលើ ប៉ុន្តែស្នើសុំអោយភាគីកូរ៉េធ្វើការពិភាក្សាបន្ថែមជាមួយអគ្គនាយកដ្ឋានគាំពារបរិស្ថានដើម្បីកំណត់ទីកន្លែងដើម្បីអនុវត្តគម្រោងអោយមានប្រសិទ្ធភាព និងទទួលបានជោគជ័យ។
ឯកឧត្តម ក៏បានស្នើសុំអោយភាគីកូរ៉េជួយកសាងមជ្ឈមណ្ឌលបរិស្ថាននៅខេត្តសៀមរាប សម្រាប់លើកកម្ពស់សមត្ថភាពមន្ត្រីរាជការថ្នាក់ក្រោមជាតិ និងជានិមិត្តរូបនៃការពង្រឹងពង្រីកកិច្ចសហប្រតិបិត្តការរវាងកម្ពុជា និងសាធារណរដ្ឋកូរ៉េអោយកាន់តែរឹងមាំថែមទៀតក្នុងវិស័យបរិស្ថាន។
ជាមួយគ្នានេះផងដែរ ភាគីកូរ៉េបានថ្លែងអំណរគុណដល់ឯកឧត្តមរដ្ឋលេខាធិការ ដែលបានអនុញ្ញាតិអោយប្រតិភូកូរ៉េជួបពិភាក្សា និងផ្តល់កិច្ចសហការលើការរៀបចំគម្រោងហេដ្ឋរចនាសម្ពន្ធ័គ្រប់គ្រងសំណល់រឹងសម្រាប់ការកែឆ្នៃនិងប្រព្រិត្តកម្មនៅក្នុងប្រទេសកម្ពុជា ។
ភាគីកូរ៉េ សង្ឍឹមថាការរៀបចំនិងអនុវត្តគម្រោងក្នុងក្របខណ្ឌកិច្ចសហប្រតិបត្តិការរវាងប្រទេសកម្ពុជា និងសាធារណរដ្ឋកូរ៉េ នឹងចូលរួមចំណែក ក្នុងការជួយដោះស្រាយបញ្ហាប្រឈមរបស់ក្រសួងបរិស្ថានកម្ពុជាក្នុងគ្រប់គ្រងបរិស្ថាន ជាពិសេសការកាត់បន្ថយសំណល់រឹងទីក្រុង៕
ប្រភព៖ ទំព័រក្រសួងបរិស្ថាន
ចំនួនអ្នកទស្សនា
- ថ្ងៃនេះ5011
- ម្សិលមិញ2941
- សប្តាហ៍នេះ7961
- ខែនេះ28011
- ឆ្នាំនេះ1011231
- សរុប20238677