សាលាសង្កាត់មនោរម្យ បើកកិច្ចប្រជុំបូកសរុបការងារប្រចាំខែធ្នូ ឆ្នាំ២០១៥ និងលើកទិសដៅអនុវត្តន៍បន្តនាខែបន្ទាប់
29-December-2015 | ដោយ មួយឡា
ភ្នំពេញ៖ នាព្រឹកថ្ងៃទី២៨ ខែធ្នូ ឆ្នាំ២០១៥ សាលាសង្កាត់មនោរម្យបានបើកកិច្ចប្រជុំបូកសរុបការងារប្រចាំខែធ្នូ ឆ្នាំ២០១៥ និងលើកទិសដៅអនុវត្តន៍បន្តនាខែបន្ទាប់ ក្រោមអធិបតីភាពលោក ចិក សាវឿន ប្រធានក្រុមប្រឹក្សាសង្កាត់និងជាចៅសង្កាត់មនោរម្យ ដែលមានការចូលរួមពីលោក លោកស្រីសមាជិកក្រុមប្រឹក្សាសង្កាត់ នាយប៉ុស្តិ៍នគរបាលសង្កាត់ មេភូមិ សរុបចំនួន២៩រូប។
កិច្ចប្រជុំនេះ មានរបៀបវារៈមួយចំនួនមានដូចជា៖ ១-ពិនិត្យនិងអនុម័តកំណត់ហេតុកិច្ចប្រជុំលើកមុន ២-សេចក្ដីព្រាងរបាយការណ៍សកម្មភាពការងារប្រចាំខែធ្នូ ៣-មតិចូលរួមរបស់សមាជិកសមាជិកានៃអង្គប្រជុំ និងទី៤- មតិផ្ដាំផ្ញើរបស់គណៈអធិបតីនិងបិទអង្គប្រជុំ ។
លោក ចិក សាវឿន ចៅសង្កាត់មនោរម្យបានមានមតិស្វាគមន៍និងសំណេះសំណាលទៅកាន់សមាជិកសមាជិកាដោយបានគូសបញ្ជាក់ថា យោងទៅតាមបទបញ្ជាផ្ទៃក្នុងរបស់ក្រុមប្រឹក្សាសង្កាត់ គឺសង្កាត់ត្រូវធ្វើការប្រជុំ១ដងក្នុង១ខែ យ៉ាងតិច ហើយថ្ងៃនេះសង្កាត់យើងត្រូវធ្វើការប្រជុំបូកសរុបការងារប្រចាំខែធ្នូ និងលើកផែនការអនុវត្តន៍នាខែបន្ទាប់។
បន្ទាប់មកស្មៀនសង្កាត់បានឡើងអាននូវសេច្ដីព្រាងកំណត់ហេតុកិច្ចប្រជុំលើកមុនដែលពុំទាន់អនុម័ត ដាក់ជូនអង្គប្រជុំដើម្បីពិភាក្សានិងអនុម័ត ក្រោយពីពិនិត្យរួចក្រុមប្រឹក្សាសង្គាត់បានឯកភាពសំរេចគាំទ្រពុំមានជំទាស់ឡើយ បន្ទាប់មកលោកក៏បានអាននូវសេច្ដីព្រាងរបាយការណ៍សកម្មភាពការងាររបស់សង្កាត់ប្រចាំខែធ្នូ ដោយរួមមាន ការងាររដ្ឋបាលដែនដី ការងារសន្តិសុខសណ្ដាប់ធ្នាប់ ការងារចុះបញ្ជីអត្រានូកូលដ្ឋាន កាងារហិរញ្ញវត្ថុ ការងារអភិវឌ្ឍ និងសកម្មភាពផ្សេងៗរបស់សង្កាត់ដែលបានបំពេញក្នុងខែធ្នូនេះ។
ក្រោយពីស្ដាប់និងពិនិត្យរបាយការណ៍ប្រចាំខែរួចមកក្រុមប្រឹក្សាសង្កាត់បានឯកភាពលើរបាយការណ៍នេះដោយពុំមានការជំទាស់អ្វីឡើយ។
លោក ចិក សាវឿន ចៅសង្កាត់បានមានមតិបន្ថែមជុំវិញ លើការប្រជុំបូកសរុបការងារថ្ងៃនេះដោយបានលើកឡើងថា ក្នុងនាមគណៈបញ្ជាការឯកភាពរដ្ឋបាលសង្កាត់ស្នើសមាជិកក្រុមប្រឹក្សាសង្កាត់ សហការជាមួយប៉ុស្តិ៍នគរបាលរដ្ឋបាល មេភូមិ ប្រជាការពារត្រូវបង្កើនការយកចិត្តទុកដាក់ថែរក្សាសន្តិសុខសុវត្ថិភាពនៅតាមគោលដៅសំខាន់ៗ ហើយបើមានករណីបទល្មើសកើតឡើង ត្រូវរាយការណ៍ឲ្យបានទាន់ពេលដើម្បីងាយស្រួលមានវិធានការបង្ក្រាបទប់ស្កាត់និងរក្សាសុវត្ថិភាពជូនព្រជាពលរដ្ឋបានល្អប្រសើរ។
លោកចៅសង្កាត់បានមានមតិថ្លែងអំណរគុណយ៉ាងជ្រាលជ្រៅចំពោះសមាជិកសមាជិកា ដែលបានចូលរួមកិច្ចប្រជុំនាថ្ងៃនេះនិងសូមជូនពរមានសំណាងល្អ សុខភាពមាំមួនរកទទួលទានមានបានក្នុងឱកាសចូលឆ្នាំថ្មី ឆ្នាំសកល២០១៦នេះ ហើយសូមប្រកាសបិទអង្គប្រជុំចាប់ពីពេលនេះទៅ៕ ដោយ មែន កំសត់
ចំនួនអ្នកទស្សនា
- ថ្ងៃនេះ3671
- ម្សិលមិញ2941
- សប្តាហ៍នេះ6621
- ខែនេះ26671
- ឆ្នាំនេះ1009891
- សរុប20237337