អង្គការមូលនិធិ ឆឺជី-កម្ពុជា ចែកអំណោយជូនប្រជាពលរដ្ឋក្រីក្រ៣៣៩គ្រួសារ
08-January-2016 | ដោយ មួយឡា
ភ្នំពេញ៖ នៅព្រឹកថ្ងៃទី០៧ ខែមករា ឆ្នាំ២០១៦ ប្រជាពលរដ្ឋក្រីក្រចំនួន ៣៣៩ គ្រួសារ រស់នៅក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ បានទទួលអំណោយសប្បុរសធម៌ពីអង្គការមូលនិធិ ឆឺជី-កម្ពុជា ។ អង្គពិធីខាងលើធ្វើឡើងនៅចំណុចមជ្ឈមណ្ឌល មង្គលឧត្តម ស្ថិតតាមបណ្តោយផ្លូវលេខ ៣៧១ ក្នុងភូមិក្បាលទំនប់ សង្កាត់បឹងទំពុន ខណ្ឌមានជ័យ ក្រោមវត្តមានលោក ឡុង ង៉ែត អភិបាលរង នៃគណៈ អភិបាលខណ្ឌមានជ័យ និងលោកកែវ សាវឿន ចៅសង្កាត់ចាក់អង្រែលើ និងមានការចូលរួមពីក្រុមយុវជន សសយក ខណ្ឌ និងសង្កាត់ប្រមាណជាង ១០០នាក់ ផងដែរ ។
លោក ឆុង មីងជឺ ប្រធានអង្គការមូលនិធិ ឆឺជី-កម្ពុជា បានអោយដឹងថា នេះគឺជាលើកទី២ហើយ ដែលអង្គការរបស់យើង សហការជាមួយអាជ្ញាធរខណ្ឌមានជ័យ ចុះពាំនាំយកអំណោយសប្បុរសមកចែកជូនបងប្អូនក្រីក្រ ក្នុងមូលដ្ឋានខណ្ឌមានជ័យ ដែលលើកទី១ មានប្រជាពលរដ្ឋជួបការលំបាកចំនួន ៧៦៦គ្រួសារ ត្រូវបានទទួល អំណោយសប្បុរសម្តងរួចមកហើយ ។ លោកឆុង មីងជឺ បន្តថា អង្គការមូលនិធិពុទ្ធសាសនា ឆឺជី-កម្ពុជា ចូលមកដល់កម្ពុជាក្នុងដើមឆ្នាំ ២០១១ ហើយគិតមកត្រឹមពេលនេះ ឆឺជី មានអាយុកាល ៥ឆ្នាំហើយនៅក្នុងប្រទេសមួយនេះ ។ មូលនិធិ ឆឺជី បង្កើតឡើង ក្នុងគោលបំណងសំដៅទៅរកដំណោះស្រាយក្នុងការដោះទុក្ខលំបាករបស់ ប្រជាជន មិនថា ក្នុងតំបន់អាស៊ី ឬ អឺរ៉ុបឡើយ ។ អង្គការមូលនិធិពុទ្ធសាសនា ឆឺជី-កម្ពុជា អាចដំណើរការ ជួយបងប្អូនទៅបាន គឺដោយមានការចាំផ្គត់ផ្គង់ជំនួយជាបន្តបន្ទាប់ពី ភិក្ខុនេយ្យ ដែលរស់នៅក្រៅប្រទេស ដូចជា តៃវ៉ាន់ និងចិនជាដើម ។
ឆ្លៀតក្នុងឱកាសខាងលើនេះ លោក ឡុង ង៉ែត អភិបាលរងខណ្ឌមានជ័យ តំណាងលោកអភិបាលខណ្ឌ បានឡើងមានប្រសាសន៍អោយដឹងថា ក្នុងនាមអាជ្ញាធរខណ្ឌ លោកពិតជាមានក្តីសោមនោសរីករាយយ៉ាងក្រៃលែង ចំពោះអង្គការមូលនិធិពុទ្ធសាសនា ឆឺជី-កម្ពុជា ដែលបានយកចិត្តទុកដាក់គិតគូពីសុខទុក្ខលំបាករបស់ ប្រជាពលរដ្ឋក្នុងមូលដ្ឋានខណ្ឌមានជ័យរបស់យើង ។ ហើយអំណោយដែលត្រូវបានចែកជូនបងប្អូនប្រជាពលរដ្ឋ យើងនៅពេលនេះ គឺជាសក្ខីភាព មួយដែល សបញ្ជាក់អោយឃើញថា ជាការជួយសង្គ្រោះដោយគ្មានការ ប្រកាន់ទៅលើពណ៌សប្បុរ ឬ សាសនាឡើយ ពោលគឺធ្វើឡើងដោយទឹកចិត្តអាណិត ស្រាលាញ់ រាប់អាន ជាទីបំផុត។
សូមបញ្ជាក់ថា អំណោយដែលទទួលបាន ក្នុងមួយគ្រួសារៗ រួមមាន ៖ មុង០១ អង្គរ ៤០គីឡូក្រាម ក្រមា០១ ប្រេងឆា០១ ស្ករស ០២គីឡូក្រាម និងអំបិល ១គីឡូក្រាម ៕
ចំនួនអ្នកទស្សនា
- ថ្ងៃនេះ4941
- ម្សិលមិញ2941
- សប្តាហ៍នេះ7891
- ខែនេះ27941
- ឆ្នាំនេះ1011161
- សរុប20238607