លោក គួច ចំរើន បើកកិច្ចប្រជុំគណៈបញ្ជាការឯកភាពរដ្ឋបាលខណ្ឌដូនពេញ
18-January-2016 | ដោយ មួយឡា
ភ្នំពេញ៖ នាព្រឹកថ្ងៃទី១៨ ខែមករា ឆ្នាំ២០១៦ នៅសាលាខណ្ឌដូនពេញបានរៀបចំកិច្ចប្រជុំគណៈបញ្ជាការឯកភាពរដ្ឋបាល ក្រោមអធិបតីភាពលោក គួច ចំរើន អភិបាលនៃគណៈអភិបាលខណ្ឌដូនពេញ នៅខណ្ឌដូនពេញ រាជធានីភ្នំពេញ។
កិច្ចប្រជុំនេះដែរ មានវត្តមានចូលរួមពីលោក ស៊ិន វីរៈ ព្រះរាជអាជ្ញារងរាជធានីភ្នំពេញ-សមាជិកក្រុមប្រឹក្សាខណ្ឌ លោកមេបញ្ជាការ អាវុធហត្ថខណ្ឌ លោកអធិការនគរបាលខណ្ឌ លោក លោកស្រីចៅសង្កាត់ទាំង១១ មន្ត្រីការិយាល័យពាក់ព័ន្ធ នាយប៉ុស្តិ៍នគរបាលទាំង១១ ព្រមទាំង លោក លោកស្រីប្រធានផ្សារនៅក្នុងខណ្ឌ ប្រធានសន្តិសុខខណ្ឌសង្កាត់ កម្លាំងប្រជាកាពារខណ្ឌ ។
អង្គប្រជុំនេះ បានពិភាក្សាលើរបៀបវារៈដូចជា៖ ដាក់បទបញ្ជាឱសានវាទបញ្ឈប់និងបង្ក្រាបល្បែងហ្គេមទូទាំងខណ្ឌដូនពេញ និងដាក់ឱសានវាទ បង្ក្រាបកន្ទុយលេខ (ឆ្នោត) និងល្បែងស៊ីសងគ្រប់ប្រភេទនៅក្នុងខណ្ឌដូនពេញ។
នាឱកាសនោះ លោក គួច ចំរើន អភិបាលខណ្ឌបានមានមតិបញ្ជាក់នៅក្នុងកិច្ចប្រជុំថា៖ ល្បែងហ្គេមធ្វើឲ្យប៉ះពាល់ដល់សណ្តាប់ធ្នាប់សាធារណៈ មានគ្រឿងញៀន ពង្វក់ក្មេងសិស្សសាលាមិនឲ្យចូលសាលារៀន។ ទាំងនេះជាកង្វល់របស់ប្រជាពលរដ្ឋ និងការយកចិត្តទុកដាក់ពីប្រមុខរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន ដែលបានក្រើនរំលឹកជារឿយៗ លោកអភិបាលក៏បានបន្តថាល្បែងហ្គេមនេះ ពេលថ្ងៃមិនមានសកម្មភាពទេ តែនៅពេលយប់មានសកម្មភាពសឹងទល់ភ្លឺ «ស្ងាត់ពេលថ្ងៃអ៊ូអរពេលយប់» សូមអ្នកសារព័ត៌មានមេត្តាផ្តល់ព័ត៌មានទាំងយប់ទាំងថ្ងៃ ផ្តល់មកយប់ចាប់ទាំងយប់ ផ្តល់ព័ត៌មានមកពេលថ្ងៃចាប់ពេលថ្ងៃ។
បន្ទាប់មកលោក ស៊ិន វីរៈ ព្រះរាជអាជ្ញារងបានសំដែងការគាំទ្រនូវចំណាត់ការដែលលោកអភិបាលខណ្ឌបានលើកឡើង។ លោកនឹងសហការដោយរីករាយ ដើម្បីបញ្ចប់ល្បែងស៊ីសងទាំងស្រុងនៅក្នុងខណ្ឌដូនពេញ «មិនថាយប់ថ្ងៃទេឲ្យតែបទល្មើសជាក់ស្តែង» រូបលោកចូលរួមក្នុងការបង្ក្រាបជានិច្ចឲ្យតែសាលាខណ្ឌផ្ដលព័ត៌មាន។
លោកអភិបាលខណ្ឌបានបញ្ជាក់និងសំណូមពរដល់លោកចៅសង្កាត់ ប៉ុស្តិ៍នគរបាលរដ្ឋបាលសង្កាត់ ដែលជាមន្ត្រីមូលដ្ឋានចំបង ស្នើលោកចុះពិនិត្យក្នុងដែនសមត្ថកិច្ចគ្រប់គ្រងរបស់អស់លោក បើមានល្បែងស៊ីសង កន្ទុយលេខ (ឆ្នោត) និងនិយាយឲ្យចំល្បែងគ្រប់ប្រភេទកើត នៅកន្លែងណា ផ្តល់ព័ត៌មានមកកំលាំងនឹងចេញទៅបង្ក្រាបទីតាំងនោះទាំងយប់ទាំងថ្ងៃដោយមានមន្ត្រីច្បាប់ និងព្រះរាជអាជ្ញារងនៅប្រចាំការ ហើយការបង្ក្រាបនេះគឺលែងអប់រំហើយព្រោះវាស៊ាំដដែលៗពេក បើចាប់បានគឺបញ្ជូនមកផ្តន្ទាទោសទៅតាមច្បាប់ជាធរមានតែម្ដង៕ ដោយ មែន កំសត់
ចំនួនអ្នកទស្សនា
- ថ្ងៃនេះ3271
- ម្សិលមិញ2941
- សប្តាហ៍នេះ6221
- ខែនេះ26271
- ឆ្នាំនេះ1009491
- សរុប20236937