​ភ្នំពេញ​៖ នា​ព្រឹក​ថ្ងៃទី ២៦ ខែ មករា ឆ្នាំ​២០១៦ លោក ឌី រ​ត្ន័​ខេ​ម​រុណ អភិបាលរង​ខណ្ឌមានជ័យ បាន​សហការ​ជាមួយ​លោក ងិន ពេជ្រ ព្រះរាជអាជ្ញារង​នៃ​អយ្យការ​អម​សាលាដំបូង​រា​ធានី​ភ្នំពេញ​និង ជា​មន្ត្រី​ទទួលបន្ទុក​កិច្ចការ​អាជ្ញាសាលា​បាន​ចុះ​អនុវត្តន៍​ដីកា​សំរេច​ចាត់ចែង​ជា​បណ្តោះអាសន្ន​លេខ ៧៨១ ក​១​ភ​.​ព​.​កា ចុះ​ថ្ងៃទី ៣១ ខែធ្នូ ឆ្នាំ ២០១៥ របស់​សាលាដំបូង​រាជធានី​ភ្នំពេញ​។​

​ក្នុង​ការចុះ​អនុវត្តន៍​ដីកា​នេះ ក៏មាន​ការចូលរួម​ពី លោក យស វាសនា ក្រឡាបញ្ជី​សាលាដំបូង​រាជធានី​ភ្នំពេញ លោក សន ណា​រ៉ាត់ អនុប្រធាន​ការិយាល័យ​អន្តរ​វិស័យ​ខណ្ឌ លោក លាវ វិចិត្រ ប្រធាន​សេវាកម្ម​មណ្ឌល​យុត្តិធម៌ លោក ម៉េង ស៊ី​នឿន តំណាង​អាវុធហត្ថ​ខណ្ឌ លោក ហ៊ួ​រ ម៉េង​វ៉ាង អធិការរង​ខណ្ឌ លោក សុខ សេរី អនុប្រធាន​ការិយាល័យ​ដែនដី​សំណង់​ភូមិបាល​ខណ្ឌមានជ័យ លោក កែវ សុខន សមាជិក​ក្រុមប្រឹក្សា​សង្កាត់​ស្ទឹងមានជ័យ លោក ប៊ិច សំណាង មេភូមិ​ទី​២ និង​លោកស្រី យិន​សុភាព ម្ចាស់បំណុល​នៃ​ការសាងសង់​របង​ថ្ម​ដែល​រៀប​អំពី​ឥដ្ឋ​ហ៊ុំ​ព​ទ្ធ័​។

​នាឱកាស​នោះ​លោក ឌី រ​ត្ន័​ខេ​ម​រុណ អភិបាលរង​ខណ្ឌមានជ័យ បាន​អាន​នូវ​ខ្លឹមសារ​នៃ​ដីកា​សំរេច​ចាត់ចែង​ជា​បណ្តោះអាសន្ន​លេខ ៧៨១ ក​១​ភ​.​ព​.​កា ចុះ​ថ្ងៃទី ៣១ ខែធ្នូ ឆ្នាំ ២០១៥ របស់​សាលាដំបូង​រាជធានី​ភ្នំពេញ ដោយ​អនុញ្ញាតិ​អោយ​ម្ចាស់បំណុល​នៃ​ការអនុវត្ត ឈ្មោះ យិន សុភាព សាងសង់​របង​ថ្ម​ដែល​រៀប​អំពី​ឥដ្ឋ​ហ៊ុំ​ព​ទ្ធ័ ជុំវិញ​តាម​ព្រំ​ចាស់​ដែលមាន​ស្រាប់​ប្រវែង ៦៦,៧៧​ម៉ែត្រ ដូច​មាន​លិខិត​អនុញ្ញាតិ​សាងសង់​លេខ ១០៣ ល​.​អ​.​ស​.​ណ​.​ម​ជ ចុះ​ថ្ងៃទី​៣០ ខែវិច្ឆិកា ឆ្នាំ ២០១៥ ខណ្ឌមានជ័យ​។

​បន្ទាប់ពី​បាន​អាន​ចប់​លោកស្រី យិន សុភាព ដែលជា​ភាគី​ម្ចាស់បំណុល នៃ​ការអនុវត្ត សាងសង់​របង​ថ្ម ដែលមាន​ការរៀប​ឥដ្ឋ​ហ៊ុំព័ទ្ធ បាន​យល់ព្រម​និង​អនុវត្តន៍​តាម​ដីកា​នេះ​ឲ្យ​បានល្អ​និង​មាន​ប្រសិទ្ធភាព​ខ្ពស់​៕ ដោយ មែន កំសត់​
​