ស្រុកស៊ីធរកណ្ដាលមានភ័ព្វសំណាង ដោយសារមានអភិបាលស្រុកប្រកបដោយគុណធម៌និងអភិបាលកិច្ចល្អ

04-February-2016 | ដោយ មែន កំសត់

ព្រៃវែង៖ រាជរដ្ឋាភិបាល ក្រសួងមហាផ្ទៃបានសម្រេចតែងតាំងលោក ម៉ននី បណ្ឌិត ជាអភិបាលស្រុកស៊ីធរកណ្ដាល ពិតជាមិនខុសឡើយ ពោលគិតចាប់ពីពេលប្រកាសចូលកាន់តំណែងកាលពី(ថ្ងៃទី០២ខែវិច្ឆិកាឆ្នាំ២០១៥)មកទល់ពេលនេះបានតែ៣ខែនិង២ថ្ងៃប៉ុណ្ណោះ ឃើញថា ថ្នាក់ដឹកនាំស្រុករូបនេះបានខិតខំលះបង់ចិត្តកាយមិនគិតពីការនឿយហត់ឡើយ គឺលោកធ្វើការអភិវឌ្ឍគ្រប់រូបភាព ខុសពីថ្នាក់ដឹកនាំស្រុកមុនៗដែលសូម្បីតែឈ្មោះអ្នកស្រុកមិនបានស្គាល់ផង។

ជុំវិញសកម្មភាពនេះបើយោងតាមមន្ត្រីសាលាស្រុកស៊ីធរកណ្ដាល បានបង្ហើបឲ្យដឹងថា ចាប់តាំងពីលោកម៉ននី បណ្ឌិត មកកាន់តំណែងជាអភិបាលស្រុក មកឃើញថា ស្ថានភាពស្រុកមានការវិវត្តន៍ប្រែមុខមាត់ សន្តិសុខសណ្ដាប់ធ្នាប់ល្អ ប្រសើរមានការពេញចិត្តពីប្រជាពលរដ្ឋ ស្ទើរតែគ្រប់មូលដ្ឋាន ហើយលោកដោះស្រាយនូវសំណូមពរជូនប្រជាពលរដ្ឋ លើវិស័យសំខាន់ៗ ដូចជាសេដ្ឋកិច្ច ធារាសាស្ត្រ នយោបាយទឹក កសិកម្ម អនាម័យ ការងារសង្គមសប្បុរសធម៌ ការសាកសួរចុះដល់មូលដ្ឋានផ្ទាល់និងបានរៀបចំការិយាល័យធ្វើការសាលាស្រុកបានល្អ មានវិន័យ មានផែនការច្បាស់លាស់សមស្រប ហើយលោកចុះពិនិត្យកន្លែងធ្វើការផ្ទាល់ដូចជា ៖សាលាឃុំ ប៉ុស្តិ៍នគរបាល ណែនាំមន្ត្រីឲ្យបង្កើនការយកចិត្តទុកដាក់មានទំនាក់ទំនងសាមគ្គីភាពផ្ទៃក្នុង យកគំនិតប្រជាពលរដ្ឋ ហើយរាល់ចំណុចអសកម្មទាំងឡាយធ្វើការកែតម្រូវ។

មន្ត្រីរូបនោះបានបន្តទៀតថា លោកតែងតែមានការយកចិត្តទុកដាក់ពីប្រជាពលរដ្ឋ គឺមានផែនការចុះមូលដ្ឋានក្នុងរាល់សប្ដាហ៍ដោយខានមិនបានឡើយ សកម្មភាពទាំងនេះគឺជាសកម្មភាពសមញ្ញជនមិនរើសអើង អត់ធ្មត់ការងារមិនប្រកាន់ខ្លួនមានគំនិតសុភវិនិច្ឆ័យ អភិបាលកិច្ចល្អស័ក្ដិសមជាអភិបាលដ៏វ័យក្មេងនិងមានការគោរពស្រឡាញ់ពីប្រជាពលរដ្ឋនិងមន្ត្រីរាជការក្នុងស្រុកនិងស្ថាប័នថ្នាក់ជាតិ។

លោកមន្ត្រីសាលាស្រុករូបនេះបានបញ្ជាក់ទៀតដែរថា ផែនការរបស់លោកអភិបាលស្រុកវ័យក្មេងសំរាប់កិច្ចការអភិវឌ្ឍសង្គមនិងរដ្ឋបាលស្រុកនៅក្នុងការគ្រប់គ្រងរបស់លោកអភិបាលគឺ លោកចង់បានសន្តិសុខសណ្ដាប់ធ្នាប់ល្អប្រសើរ ធានាបានសន្តិសុខស្បៀង ប្រជាពលរដ្ឋមានជីវភាពធូធារស្ថេរភាពនយោបាយល្អ និយាយឲ្យរួមគឺមិនមានកើតអំពើសន្តិសុខនៅក្នុងស្រុកឡើយ ដើម្បីរួមចំណែកកាត់បន្ថយភាពក្រីក្រ និងអភិវឌ្ឍន៍សង្គមជាតិគ្រប់រូបភាព តាមយុទ្ធសាស្ត្រចតុកោណរបស់ប្រមុខរាជរដ្ឋាភិបាលកម្ពុជាដែលមានសម្ដេចតេជោហ៊ុន សែនជានាយករដ្ឋមន្ត្រី៕