លោក ឃ្លាំង ហួត អញ្ជើញចុះទៅសម្របសម្រួល និងសំណេះសំណាលជាមួយប្រជាពលរដ្ឋ អំពីបញ្ហាការជីកដីស្តារបឹងតាតុ
22-February-2016 | ដោយ មែន កំសត់
ភ្នំពេញ ៖ លោក ឃ្លាំង ហួត អភិបាលនៃគណៈអភិបាលខណ្ឌជ្រោយចង្វារ និងមន្ត្រីរាជការក្រោមឱវាទសាលាខណ្ឌ និងសង្កាត់កោះដាច់ បានអញ្ជើញចុះធ្វើការសម្របសម្រួល និងសំណេះសំណាលជាមួយប្រជាពលរដ្ឋ និងពិនិត្យមើលស្ថានភាពបឹងតាតុក ស្ថិតនៅភូមិរនះ សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ កាលពីរសៀលថ្ងៃទី១៩ ខែកុម្ភៈ ឆ្នាំ២០១៦ បន្ទាប់ពីមានប្រតិកម្មពីសំណាក់ប្រជាពលរដ្ឋ ធ្វើការតវ៉ាដោយសារឡានដឹកដីហុយប៉ះពាល់ដល់ការរស់នៅរបស់ពួកគាត់ និងមានការចោទប្រកាន់ទៅលើអាជ្ញាធរភូមិ សង្កាត់ ថាបានយកថវិកាដែលបានមកពីការលក់អាចម៍ដីបឹងតាតុកនេះ ទៅចាយផ្តេសផ្តាសផងដែរ។
នាឱកាសនោះដែរ លោក គក់ សុគន្ធ មេភូមិរនះ សង្កាត់កោះដាច់ បានមានប្រសាសន៍ថា បច្ចុប្បន្នបឹងតាតុកនេះរីងហួតគ្មានទឹកប្រើប្រាស់នោះទេ ព្រោះបឹងមានទំហំតូច និងរាក់ទៀតផង ហើយការជីកដីស្តារបឹងតាតុកនេះ គឺមិនមែនអាជ្ញាធរសង្កាត់ ភូមិធ្វើការសម្រេចចិត្តដោយខ្លួនឯងនោះដែរ គឺបានប្រជុំពិភាក្សាគ្នារវាងអាជ្ញាធរសង្កាត់ ភូមិ និងប្រជាពលរដ្ឋប្រមាណ ១៥៣គ្រួសារ ហើយបានឯកភាពគ្នាឲ្យធ្វើការស្តារបឹងតាតុកនេះឲ្យមានជម្រៅជ្រៅ និងទំហំធំជាងមុន ដើម្បីធ្វើជាអាងស្តុកទឹកនារដូវវស្សា និងមានទឹកប្រើប្រាស់នៅរដូវប្រាំង ដើម្បីយកមកស្រោចស្របផលដំណាំ បន្ថែបង្កា និងស្រូវប្រាំងរបស់ប្រជាកសិករក្នុងតំបន់នេះជាដើម ចំណែកឯថវិកាដែលបានមកពីការលក់អាចម៌ដីនោះ គឺយកទៅកសាងរបងសាលារៀនបឋមសិក្សាភូមិរនះ និងរបងសាលាបុណ្យ នេះមិនមានអ្នកណាយកទៅចាយផ្តេសផ្តាសនោះទេ។
បន្ទាប់ពីបានស្តាប់ការបកស្រាយរបស់លោកមេភូមិរួច លោក ឃ្លាំង ហួត ក៏បានអនុញ្ញាតឲ្យប្រជាពលរដ្ឋធ្វើការមានមតិ ឬលើកឡើងនូវសំណូមពរផងដែរ ដោយក្នុងនោះប្រជាពលរដ្ឋបានចូលរួមសំណូមពរដូចខាងក្រោម៖
១-សូមឲ្យធ្វើការស្តារបឹងត្រឹមទំហំ ៣០ម៉ែត្រ ដើម្បីកុំឲ្យប៉ះដល់ដីប្រជាពលរដ្ឋ
២-បញ្ហាការដឹកដីបណ្តាលឲ្យហុយរំខានដល់ការរស់នៅរបស់ពួកគាត់
៣-សូមឲ្យយកដីនេះលក់យកលុយចែកប្រជាជន
៤-បញ្ហាទាមទារដី ៤ម៉ែត្រពីសាលាបុណ្យ របស់លោកយាយ បេតុន
ក្រោយពីបានស្តាប់នូវសំណូមពររបស់ប្រជាពលរដ្ឋរួច លោក ឃ្លាំង ហួត បានមានប្រសាសន៍យ៉ាងដូច្នេះថា «ខ្ញុំមកថ្ងៃនេះ មិនមែនមកកាន់ជើងខាងណានោះទេ គឺមកដើម្បីធ្វើការសម្របសម្រួលដោះស្រាយបញ្ហាការជីកដីស្តារបឹងនេះ និងដោះស្រាយនូវរាល់ទុក្ខលំបាករបស់បងប្អូនប្រជាពលរដ្ឋ ដោយប្រកាន់ខ្ជាប់នូវនយោបាយឈ្នះ ឈ្នះ មានន័យថាយើងឈ្នះទាំងអស់គ្នា អត់មានអ្នកចាញ់ទេ ដោះស្រាយដោយសន្តិវិធី ប្រកបដោយតម្លាភាព សមភាព សមធម៌ ត្រឹមត្រូវ និងយុត្តិធម៌ថែមទៀតផង»។
លោក ឃ្លាំង ហួត បានធ្វើការសម្របសម្រួលជូនប្រជាពលរដ្ឋ ដោយបញ្ឈប់ការជីកដីបឹងតាតុកចាប់ពីពេលនេះតទៅតាមសំណូមពរ និងចំណាយថវិកាផ្ទាល់ខ្លួនក្នុងការជួលគ្រឿងចក្រមកតម្រឹមមាត់បឹង ដែលក្រហីងក្រហូងឲ្យក្លាយជាបឹងអាងទឹកសម្រាប់ជាប្រយោជន៍បានប្រើប្រាស់ជាប្រចាំទាំងអស់គ្នា ដោយយកអាចម៍ដីទាំងនោះមកចាក់បំពេញជួសជុលផ្លូវលំក្នុងភូមិបន្ថែមទៀត។
លោកបានបន្តថា ចំពោះសំណូមពរឲ្យយកដីនេះលក់ចែកលុយប្រជាជន គឺមិនអាចទៅរួចនោះទេ ព្រោះថាដីបឹងគឺជាសម្បត្តិសាធារណៈរបស់រដ្ឋ ដែលពុំមានបុគ្គលរូបណាមានសិទ្ធិលក់ ដូរ ជួល បញ្ចាំ ឬចាត់ចែងធ្វើអ្វីផ្សេងបានឡើយបូករួមទាំងខ្លួនលោកផ្ទាល់ គឺរដ្ឋហាមឃាត់ជាដាច់ខាត។
ដោយឡែកការទាមទារដី ៤ម៉ែត្រពីសាលាបុណ្យនោះ លោកអភិបាលខណ្ឌ សុំពន្យាពេលដើម្បីធ្វើការសិក្សាជាមុនសិន។ ជាមួយគ្នានោះដែរ លោកអភិបាលខណ្ឌក៏បានប្តេជ្ញាចិត្តនឹងធ្វើផ្លូវនៅក្នុងសង្កាត់កោះដាច់លែងឲ្យមានដីហុយផងដែរ។
ក្រោយពីបានស្តាប់នូវដំណោះស្រាយរបស់លោកអភិបាលខណ្ឌរួច ប្រជាពលរដ្ឋមានការសប្បាយរីករាយ និងសាទរចំពោះចំណាត់ការដ៏ល្អប្រសើរខាងលើនេះយ៉ាងខ្លាំងផងដែរ។ បន្ទាប់ពីបានធ្វើការដោះស្រាយចប់សព្វគ្រប់ លោកអភិបាលខណ្ឌ និងក្រុមការងារ ព្រមទាំងប្រជាពលរដ្ឋក៏បានអញ្ជើញចុះទៅពិនិត្យមើលស្ថានភាពបឹងតាតុកទាំងអស់គ្នាផ្ទាល់តែម្តង៕
ចំនួនអ្នកទស្សនា
- ថ្ងៃនេះ221
- ម្សិលមិញ2941
- សប្តាហ៍នេះ3171
- ខែនេះ23221
- ឆ្នាំនេះ1006441
- សរុប20233887