អភិបាលខណ្ឌពោធិ៍សែនជ័យ បញ្ជាឲ្យជីកកកាយដី បើកប្រឡាយឡើងវិញ ក្រោយមានការជីកលុបធ្វើផ្លូវនៅសង្កាត់កំបូល
24-February-2016 | ដោយ មែន កំសត់
ភ្នំពេញ៖ អភិបាលខណ្ឌពោធិ៍សែនជ័យ លោក ហែម ដារិទ្ធ នៅរសៀលថ្ងៃទី២៤ ខែកុម្ភៈ ឆ្នាំ២០១៦នេះ បានបញ្ជាឲ្យជីកកាយដី បើកប្រឡាយឡើងវិញ ដែលតភ្ជាប់ពីភូមិស្នួលខ្ពស់ និងភូមិតាភេម នៅក្នុងសង្កាត់កំបូល ក្រោយពីប្រជាពលរដ្ឋរស់នៅតំបន់នោះ បាននាំគ្នាជួលរថយន្តដឹកដី ចាក់លុបប្រឡាយដើម្បីធ្វើផ្លូវដោយគ្មានការអនុញ្ញាតពីអាជ្ញាធរ និងមន្ត្រីជំនាញ។
ការចេញបញ្ជាឲ្យកាយដីបើកប្រឡាយឡើងវិញរបស់អភិបាលខណ្ឌពោធិ៍សែនជ័យខាងលើនេះ បានធ្វើឡើងភ្លាមៗ ក្រោយពីមានការចុះផ្សាយព័ត៌មានថា លោកបានឃុបឃិតជាមួយក្រុមឈ្មួញចាក់ដីលុបប្រឡាយមួយនេះ។ លោក ហែម ដារិទ្ធ ក៏បានលើងឡើងថា ការចុះផ្សាយព័ត៌មានថា លោកឃុបឃិតជាមួយឈ្មួញឲ្យចាក់លុបប្រឡាយទឹក (ប្រឡាយតូចមានភ្លឺស្រែអមសងខាង) ស្រោចស្រពស្រូវប្រវែង៤៥៨ម៉ែត្រ តភ្ជាប់ពីភូមិស្នួលខ្ពស់ និងភូមិតាភេម នៅក្នុងសង្កាត់កំបូល គឺដោយសារអ្នករកស៊ីបកដី និងជីកដីលក់កាច់កុងគ្នា ហើយផ្តល់ព័ត៌មានខុសទៅអ្នកសារព័ត៌មាន។
លោកអភិបាលខណ្ឌ បានប្រាប់ការសែតថា «ចំពោះការលុបប្រឡាយទឹកនេះ ខ្ញុំក៏មិនបានដឹងដែរ តែក្រោយពីទទួលព័ត៌មានភ្លាម ខ្ញុំបានស្រាវជ្រាវមើលទើបដឹងថា ប្រជាពលរដ្ឋនៅក្នុងភូមិទាំងពីរ ជាអ្នកឯកភាពគ្នាឲ្យចាក់លុបប្រឡាយដើម្បីធ្វើផ្លូវភ្ជាប់ភូមិទាំងពីរនេះ ដោយពួកគាត់បានទាំងចំណាយដីជាប់ និងប្រឡាយនោះបន្ថែមទៀតផង»។
លោក ហែម ដារិទ្ធិបន្តទៀត ថា «បន្ទាប់ពីទទួលព័ត៌មាននៃការចាក់លុបនោះ ខ្ញុំបានបញ្ជាឲ្យលោក សេង គន្ធ អភិបាលរង ចុះទៅពិនិត្យ និងដឹកនាំកម្លាំងចុះកាយរួចរាល់អស់ហើយ ដោយអនុវត្តន៍តាមបទបញ្ជារបស់ឯកឧត្តមអភិបាលរាជធានីភ្នំពេញ ប៉ា សុជាតិវង្ស»។
លោកបានបន្តថា អាជ្ញាធររបស់លោកបានយកចិត្តទុកដាក់ណាស់ចំពោះប្រឡាយទឹកនេះណាស់ ពោលចង់ទាញទឹកពីតំបន់ផ្សេងៗ យកមកស្រោចស្រពដំណាំកសិកម្មររបស់ប្រជាពលរដ្ឋផងដែរ ប៉ុន្តែចំពោះសង្កាត់កំបូលនេះ គឺគ្មានប្រភពទឹកនោះទេ ទើបយើងពិបាកក្នុងទាញយកប្រភពទឹកឲ្យបងប្អូនប្រើប្រាស់។
ពាក់ព័ន្ធការចោទប្រកាន់នេះដែរ លោក ហ៊ួ សៀ មេភូមិតាភេម បាននិយាយថា ប្រឡាយទឹកមួយខ្សែនេះមានប្រវែង៦០០ម៉ែត្រ ដោយតភ្ជាប់ពីភូមិតាភេមទៅភូមិស្នួលខ្ពស់ ដែលមានទទឹង៤ម៉ែត្រ ហើយការចាក់លុបប្រឡាយនេះ ដោយសារតែមានអ្នករកស៊ីជីកដី នៅចំណុចនោះ ហើយប្រជាពលរដ្ឋបានសំណូមពរឲ្យចាក់លុបធ្វើផ្លូវ ដោយពួកគាត់បានចូលរួមដោយចំណាយដីរបស់គាត់នៅជាប់និងផ្លូវ១ម៉ែត្របន្ថែមទៀតផង ដើម្បីឲ្យអ្នករកស៊ីជីកដីជួយធ្វើជាប្រឡាយទឹកអមសងខាងផ្លូវជូន ពួកគាត់ផងដែរ និងបានហាមប្រាមមិនឲ្យជីកជារណ្តៅនោះទេ ៕
ចំនួនអ្នកទស្សនា
- ថ្ងៃនេះ1661
- ម្សិលមិញ8301
- សប្តាហ៍នេះ29441
- ខែនេះ17251
- ឆ្នាំនេះ1000471
- សរុប20227917