អាជ្ញាធរខណ្ឌសែនសុខបានចុះឃាត់ និងរុះរើទីតាំងសំណង់រោង ដែក ដែលសង់រំលោភចូលប្រឡាយសាធារណៈ
26-February-2016 | ដោយ មែន កំសត់
ភ្នំពេញ៖ ដោយទទួលបានបទបញ្ជាដឹកនាំបន្ទាន់ពីលោក លី សាវេត អភិបាល នៃគណៈអភិបាលខណ្ឌសែនសុខ នៅរសៀលថ្ងៃទី២៥ ខែកុម្ភៈ ឆ្នាំ២០១៦ ក្រុមការងារជំនាញរបស់គណៈបញ្ជាការឯកភាព រដ្ឋបាលខណ្ឌបានចុះពិនិត្យហាមឃាត់ទីតាំងសំណង់រោងដែកដាក់សម្ភារទំហំ ២៥ x ១០ម ដែលគ្មានលិខិតអនុញ្ញាតសាងសង់ពីសាលា រាជធានីភ្នំពេញ និងសាងសង់រំលោភចូលប្រឡាយអូរអាគុជ ស្ថិតនៅផ្លូវលេខ១៩៨០ ភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ការចុះត្រួតពិនិត្យនេះមានការចូលរួម ពីកំលាំងចម្រុះគណៈបញ្ជាការឯកភាពខណ្ឌសែនសុខ និងមន្ត្រីផ្សេងៗ ជាច្រើនរូបទៀត។
តាមប្រភពពីមន្ត្រីសាលាខណ្ឌសែនសុខបានឲ្យដឹងដែរថា៖ ដោយមានបទបញ្ជារបស់លោកលី សាវេតប្រធានគណៈបញ្ជាការឯកភាពខណ្ឌ មន្ត្រីយើងបានណែនាំអោយម្ចាស់សំណង់បញ្ឈប់ការសាងសង់ និងធ្វើការរុះរើរោងដែកដែលសង់រំលោភលើប្រឡាយសាធារណៈចេញវិញជាបន្ទាន់ ដោយរក្សាទុកស្ថានភាពដើម ព្រោះថាកម្មសិទ្ធិសាធារណៈមិនអាចបុគ្គលណាយកមកធ្វើឬរំលោភបំពានជាកម្មសិទ្ធិផ្ទាល់ខ្លួនបានឡើយនិងគ្មានអាជ្ញាធរណាបញ្ជាក់ចេញបណ្ណកម្មសិទ្ធិទទួលស្គាល់ឡើយ។
ជាមួយនេះ អាជ្ញាធរខណ្ឌសែនសុខ សូមអំពាវនាវដល់ប្រជាពលរដ្ឋទាំងអស់ ចូលរួមសហការជាមួយ អាជ្ញាធរខណ្ឌក្នុងការរក្សាសណ្តាប់ធ្នាប់ របៀបរៀបរយសាធារណៈ អោយបានល្អស្អាត ដើម្បីអភិវឌ្ឍក្នុងមូលដ្ឋានខណ្ឌរបស់យើង ៕
ចំនួនអ្នកទស្សនា
- ថ្ងៃនេះ1641
- ម្សិលមិញ8301
- សប្តាហ៍នេះ29421
- ខែនេះ17231
- ឆ្នាំនេះ1000451
- សរុប20227897