សាលារាជធានី គ្រោងស្នើឱ្យរាជរដ្ឋាភិបាលផ្តល់ដីតំបន់ជ្រោយចង្វារ ជាសម្បត្តិរបស់ខ្លួន
03-March-2016 | ដោយ មែន កំសត់
ភ្នំពេញ៖ សាលា រាជធានីភ្នំពេញ នៅថ្ងៃទី០២ ខែមីនា ឆ្នាំ២០១៦ បានពិភាក្សាអំពីសេចក្តីព្រាងអនុក្រឹត្យ ដើម្បីស្នើឱ្យរាជរដ្ឋាភិបាលផ្តល់ដីតំបន់ជ្រោយចង្វារ ទុកជាសម្បត្តិរបស់រាជធានីភ្នំពេញ ដើម្បីងាយស្រួលដល់ការអភិវឌ្ឍបន្ថែម។ នេះបើតាមការផ្សព្វផ្សាយនៅលើទំព័រ Facebook របស់ឯកឧត្តម ប៉ា សុជាតិវង្ស អភិបាល រាជធានីភ្នំពេញ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានប្រាប់ ឱ្យដឹងថា តំបន់នោះដំបូងឡើងមានទំហំជាង៣០០ហិកតា ប៉ុន្តែបន្ទាប់ពីឆ្វេលដីរួចនៅសល់ប្រមាណ២៨០ហិកតាប៉ុណ្ណោះ ហើយសាលារាជធានីភ្នំពេញ មានគម្រោងដើម្បីជួលដីតំបន់នោះ ទៅឱ្យក្រុមហ៊ុន OCIC ដើម្បីអភិវឌ្ឍន៍។
ឯកឧត្តម ប៉ា សុជាតិវង្ស អភិបាល រាជធានីភ្នំពេញ បានផ្សព្វផ្សាយនៅលើទំព័រ Facebook របស់លោក នាល្ងាចថ្ងៃទី០២ ខែមីនា ឆ្នាំ២០១៦ថា សាលារាជធានីភ្នំពេញ មិនទុកតំបន់ជ្រោយចង្វារនោះ ឱ្យនៅជាតំបន់អនាធិបតេយ្យនោះទេ ហើយថាការអភិវឌ្ឍខាងមុខនេះ ជាការចូលរួមក្នុងការដោះស្រាយទុក្ខលំបាក់ប្រជាពលរដ្ឋ។
ឯកឧត្តមក៏លើកឡើងថា «យើងត្រូវដោះស្រាយជូនប្រជាពលរដ្ឋការស្រុះស្រួល មិនត្រូវឲ្យប្រជាពលរដ្ឋមានទុក្ខលំបាកឡើយ ប៉ុន្តែការដោះស្រាយបញ្ហាម្តងទាំងអស់ក៏មិនកើតដែរ»។«យើងមិនអាចទុកឲ្យតំបន់នោះ ទៅជាអនាធិបតេយ្យបាននោះទេ យើងត្រូវតែធ្វើការអភិវឌ្ឍជាកញ្ចប់ ដោយមានទាំងទឹក ភ្លើង ហេដ្ឋារចនាសម្ព័ន្ធ ទីផ្សារ មន្ទីរពេទ្យ សាលារៀន សម្រាប់ប្រជាពលរដ្ឋ រស់នៅប្រកបដោយផាសុខភាព»៕
ចំនួនអ្នកទស្សនា
- ថ្ងៃនេះ751
- ម្សិលមិញ8301
- សប្តាហ៍នេះ28531
- ខែនេះ16341
- ឆ្នាំនេះ999561
- សរុប20227007