លោកជា ពិសី ដឹកនាំមន្ត្រីចុះណែនាំដល់ ប្រជាពលរដ្ឋតាមមូលដ្ឋាន ចំពោះការថែទាំសុខភាព
09-March-2016 | ដោយ មែន កំសត់
ភ្នំពេញ៖ នាព្រឹកថ្ងៃទី៨ ខែមីនា ឆ្នាំ២០១៦នេះ គឺជាថ្ងៃអបអរសាទរខួបលើកទី១០៥ សិទ្ធនារីអន្តរជាតិ៨មីនា លោក ជា ពិសី អភិបាលខណ្ឌឫស្សីកែវថ្មី ដែលទើបប្រកាសតែងតាំងថ្មីៗនេះ បានដឹកនាំកម្លាំងយុវជនខណ្ឌ និងសង្កាត់ឫស្សីកែវ សហការជាមួយក្រុមសមាគមគ្រូពេទ្យស្ម័គ្រចិត្តសម្ដេចតេជោ រួមនិងសមាគមសិស្ស និស្សិតអាហារូបករណ៍ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន (អ.ម.ក) បានចុះសួរសុខទុក្ខពិនិត្យជំងឺ និងផ្ដល់ការណែនាំឲ្យប្រជាពលរដ្ឋចេះថែទាំសុខភាពដោយរស់នៅស្អាត ហូបស្អាត ព្រមទាំងផ្ដល់ថ្នាំបង្ការជំងឺរាគរុះផ្សេងៗជូនដល់ប្រជាពលរដ្ឋនៅ តាមបន្ទប់ជួល ចំនួន៣០០បន្ទប់ក្នុង សង្កាត់ឫស្សីកែវ។
អភិបាលខណ្ឌឫស្សីកែវថ្មី លោក ជា ពិសី បានលើកឡើងពីការយកចិត្តទុកដាក់ចំពោះប្រជាពលរដ្ឋតាមលំនៅដ្ឋានបន្ទប់ជួលនីមួយៗ ដោយឲ្យប្រជាពលរដ្ឋត្រូវរាយការណ៍មកអាជ្ញាធរសង្កាត់ភ្លាម ដែលមានលោក មូល វិរៈ ជាចៅសង្កាត់ឫស្សីកែវ ប្រសិនបើបងប្អូនជួប បញ្ហា ឫជំងឺឈឺថ្កាត់ផ្សេងដែលមិនអាចដោះស្រាយបាន ដោយសំខាន់បងប្អូនត្រូវចេះថែទាំសុខភាពក្នុងការរស់នៅស្អាត និងហូបស្អាត ដើម្បីជាសវាងឆ្លងជំងឺដង្កាត់ផ្សេងៗ រាគរុះជាដើម។ លោកអភិបាលខណ្ឌឫស្សីកែវ បានថ្លែងទៀតថា «សុខទុក្ខលំបាករបស់ប្រជាពលរដ្ឋ គឺជាទុក្ខលំបាករបស់អាជ្ញាធរថ្នាក់មូលដ្ឋាន ក៏ដូចជាទុក្ខលំបាករបស់ថ្នាក់ដឹកនាំកំពូល ដែលមានសម្ដេចតេជោ ហ៊ុន សែន ជានាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិតដែលលោកទាំង២ តែងតែគិតគូរាល់ទុកលំបាករបស់ប្រជាពលរដ្ឋជានិច្ចជាកាល»។
ជាមួយគ្នានោះដោយមានការចង្អុលបង្ហាញ ដ៏យកចិត្តទុកដាក់បំផុតពីលោកបណ្ឌិត ហ៊ុន ម៉ាណែត ប្រធានសមាគមគ្រូពេទ្យស្ម័គ្រចិត្តសម្ដេចតេជោ រួចមកលោកវិជ្ជបណ្ឌិត សឹម សូយេង បានដឹកនាំក្រុមយុវជនប្រមាណជា២០នាក់ សហការនិងក្រុមយុវជន(ស ស យ ក) របស់សាលាសង្កាត់ឫស្សីកែវ ខណ្ឌឫស្សីកែវ ចុះមកទីនេះ ហើយនេះជាលើកទី១ហើយ ដែលសមាគមគ្រូពេទ្យស្ម័គ្រចិត្តសម្ដេចតេជោ និងសមាគមសិស្ស និស្សិតអាហារូបករណ៍ សម្ដេចអគ្គមហាសេនាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត រួមសហការ និងអាជ្ញាធរថ្នាក់មូលដ្ឋាន ចុះជួយពិនិត្យជំងឺ និងផ្ដល់ថ្នាំព្រមទាំងចែកជូន មីក្នុងម្នាក់៤កញ្ចប់ ជូនប្រជាពលរដ្ឋដល់លំនៅដ្ឋាន តាមបន្ទប់ជួលនីមួយៗផងដែរ។ ក្នុងឱកាសនោះដែរ លោក សឹម សូយេង បានពាំនាំនូវគំនិតផ្ដួចផ្ដើមរបស់លោក បណ្ឌិត ហ៊ុន ម៉ាណែត ថា៖ បច្ចុប្បន្នសមាគមបាន និងកំពុងខិតខំប្រឹងប្រែងពង្រីកបន្ថែមលើវិសាលភាពឲ្យកាន់តែទូលាយ ក្នុងការចុះពិនិត្យជំងឺជូនបងប្អូនប្រជាពលរដ្ឋតាមបណ្ដាខណ្ឌទូទាំងរាជធានី ភ្នំពេញផងដែរ៕
ចំនួនអ្នកទស្សនា
- ថ្ងៃនេះ7841
- ម្សិលមិញ7271
- សប្តាហ៍នេះ27311
- ខែនេះ15121
- ឆ្នាំនេះ998341
- សរុប20225787