ឯកឧត្តម ជា សុមេធី ៖ ត្រូវលុបបំបាត់ឱ្យអស់រាល់ភាពអសកម្មនានា ជាពិសេស ការផាកពិន័យលើសច្បាប់កំណត់ និងត្រូតពិនិត្យរថយន្តដឹកលើសទម្ងន់ ដែលធ្វើឱ្យខូចផ្លូវ និងស្ពាន
18-March-2016 | ដោយ មែន កំសត់
ខេត្តព្រៃវែង៖ នៅព្រឹកថ្ងៃទី១៧ មីនា ២០១៦ ម្សិលមិញនេះ អាជ្ញាធរខេត្តបានបើកកិច្ចប្រជុំគណៈកម្មការសុវត្ថិភាពចរាចរណ៍ ផ្លូវគោក ដើម្បីដាក់ផែនការ សកម្មភាព និងកំណត់គោលដៅ សម្រាប់ចុះអនុវត្តច្បាប់ចរាចរណ៍ផ្លូវគោកថ្មី នៅតាមដងផ្លូវសំខាន់ៗនានាក្នុងខេត្ត ។
ឯកឧត្តម យុន ឈុន្នី អនុរដ្ឋលេខាធិការក្រសួងមហាផ្ទៃ បានមានប្រសាសន៍ថា កិច្ចប្រជុំនេះមានគោលបំណង ដើម្បីរឹតបន្តឹងការអនុវត្តច្បាប់ចរាចរណ៍ផ្លូវគោក ក្នុងន័យដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិត ទាបបំផុត ដែលយន្តការនេះធ្វើឡើងតាមរយៈការអប់រំផ្សព្វផ្សាយ ការផាកពិន័យ និងការផ្តន្ទាទោសទៅតាមច្បាប់ ដែលធ្វើឱ្យប្រជាពលរដ្ឋកាន់តែមានការយល់ដឹងច្បាស់ ហើយងាកមកចូលរួមគោរពច្បាប់ចរាចរណ៍ទាំងអស់គ្នា ។
នៅក្នុងកិច្ចប្រជុំនេះដែរ ឯកឧត្តម ជា សុមេធី អភិបាលខេត្តព្រៃវែង បានណែនាំដល់មន្ត្រីអនុវត្តច្បាប់ចរាចរណ៍ទាំងអស់ ត្រូវលុបបំបាត់ឱ្យអស់រាល់ភាពអសកម្មនានា ជាពិសេស ការផាកពិន័យលើសច្បាប់កំណត់ ដែលធ្វើឱ្យប្រជាពលរដ្ឋមានការថ្នាំងថ្នាក់ និងជះឥទ្ធិពលមិនល្អដល់ថ្នាក់ដឹកនាំ ដែលបាននិងកំពុងខិតខំប្រឹងប្រែងដឹកនាំប្រទេសឆ្ពោះទៅរកការរីក ចម្រើនថែមទៀតនោះ ។
ជាមួយគ្នានេះ គឺត្រូវធ្វើយ៉ាងណាទប់ស្កាត់ឱ្យខាងតែបាន ចំពោះក្រុមរថយន្តដឹកលើសទម្ងន់ ដែលធ្វើឱ្យខូចផ្លូវ និងស្ពាន ទាំងសម្ថកិច្ច អាជ្ញាធរ និងស្ថាប័នពាក់ព័ន្ធទាំងអស់ ត្រូវតែរួមគ្នាគិត រួមគ្នាគូរ និងរួមគ្នាទទួលខុសត្រូវ ក្នុងការទប់ស្កាត់ និងបង្ក្រាបក្រុមរថយន្តទាំងនោះ ៕
អត្ថបទដោយ៖ សីហា
ចំនួនអ្នកទស្សនា
- ថ្ងៃនេះ7151
- ម្សិលមិញ7271
- សប្តាហ៍នេះ26621
- ខែនេះ14431
- ឆ្នាំនេះ997651
- សរុប20225097