ក្រុមការងារ សាលាខណ្ឌ ៣(ខណ្ឌ មានជ័យ ចំការមន និងខណ្ឌព្រែកព្នៅ)ចុះសួរសុខទុក្ខកងទ័ពកងវរៈសេនាតូចលេខ៣៩២ព្រំដែននៅទិសព្រះវិហារ
19-March-2016 | ដោយ មែន កំសត់
ភ្នំពេញ ៖ នាព្រឹកថ្ងៃទី ១៨ ខែ មិនា ឆ្នាំ ២០១៦ នេះ គណៈប្រតិភូខណ្ឌមានជ័យ ខណ្ឌច្បារអំពៅ និងខណ្ឌចំការមន ដែលបានចងសម្ព័ន្ធមេត្រីភាពជាមួយកងទ័ពកងវរៈសេនាតូចលេខ៣៩២ ចំណុះកងពលតូចអន្តរាគមន៍លេខ៩ ភូមិអូរជុញ ស្រុកជាំក្សាន្ត ខេត្តព្រះវិហារ បានចុះសួរសុខទុក្ខ និងនាំយកសំភារៈ ថវិកា គ្រឿងឧបភោគ បរិភោគចែកជូនកងទ័ពដែលកំពុងឈរជើងការពារព្រំដែននៅទិសព្រះវិហារ ចំនួន ៤៥០នាក់ ។
ថ្លែងទៅកាន់ វរៈកងទ័ព នាឱកាសនោះ លោក ពេជ្រ កែវមុនី អភិបាលខណ្ឌ មានជ័យ លោក អៀង ស៊ីផាន អភិបាលខណ្ឌ ច្បារអំពៅ និងលោក ព្រុំ សំខាន់ អភិបាលខណ្ឌ ចំការមន បានលើកឡើងថា៖ ទោះបីស្ថានភាពនៅតាមបណ្តោយព្រំដែនមានស្ថានភាពស្ងប់ស្ងាត់យ៉ាងណាក្តី ប្រជាជននៅរាជធានីភ្នំពេញទាំងមូល ពិសេសប្រជាជន និងមន្ត្រីរាជការក្នុងទូទាំងខណ្ឌមានជ័យ ខណ្ឌច្បារអំពៅ និងខណ្ឌចំការមន នៅតែបន្តយកចិត្តទុកដាក់អំពីជីវភាពកងទ័ពនៅឯសមរភូមិមុខមិនដែលភ្លេចឡើយ ដែលនេះសរបញ្ជាក់អោយឃើញថា ការចងសម្ព័ន្ធមេត្រីភាពរវាងសមរភូមិក្រោយជាមួយនឹងសមរភូមិមុខ គឺមានឆន្ទះតែមួយក្នុងបុព្វហេតុជាតិ និងមាតុភូមិ ក្នុងគោលបំណង គឺការពារបូរណភាពទឹកដីមិនអោយបាត់បង់សូម្បីតែមួយមីលីម៉ែត្រ ។
បញ្ហាព្រំដែនជាបញ្ហាសម្រាប់ជាតិ ដែលត្រូវយកចិត្តទុកដាក់បំផុត កន្លងមកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវនយោបាយ កសាងប្រែក្លាយតំបន់ព្រំដែនរបស់ប្រទេសកម្ពុជា ជាតំបន់សន្តិភាព មិត្តភាព និងសហប្រតិបត្តិការ ។
ជាមួយគ្នានេះដែរ សម្តេចតែងបានលើកទឹកចិត្តកងទ័ពគ្រប់កម្រិត គ្រប់ផ្នែក និងគ្រប់ជំនាញទាំងអស់ ទាំងកម្រិតជីវភាពរស់នៅរបស់កងទ័ព ក៏ដូចជាកម្រិត៍ជីវភាពស្នូលរបស់កងទ័ព ។
យើងខ្ញុំទាំងអស់គ្នា សូមធ្វើការកោតសរសើរ និងវាយតម្លៃខ្ពស់ ចំពោះស្មារតីលះបង់ ពុះពាររាល់ការលំបាកគ្រប់បែបយ៉ាងរបស់កម្លាំងវរឈរជើងនៅទិសប្រាសាទព្រះវិហារនេះ ដែលបានបូជាសាច់ស្រស់ ឈាមស្រស់ ដើម្បីរក្សាបានសុខសន្តិភាពរហូតមក ដែលនេះគឺជាបុព្វហេតុដ៏ធំធេងសម្រាប់ជាតិ និងមាតុភូមិរបស់យើង ។
សំភារៈ ថវិកា និងគ្រឿងឧបភោគ បរិភោគដែលបានយកមកផ្តល់ជូនកងទ័ពកងវរសេនាតូចលេខ ៣៩២ រួមមាន ៖អង្ករផ្កាខ្ញី៥០០គីឡូ, ប្រហុក ៨០គីឡូ, ផ្អក២០គីឡូ, ទឹកដោះគោឆៅផ្អែម ANGKOR MILK ៧០កេស, បារីសេក២៥០០កញ្ចប់, មីម៉ាម៉ា ៥៤០កញ្ចប់, សៀង០៣ពីដុង, ទឹកផ្លែឈើកំប៉ុង, ត្រីខកំប៉ុង, ទឹកត្រី, ទឹកស៊ីអ៊ីវ, ម៉ាស៊ីនបូមទឹក០១គ្រឿង, ម៉ាស៊ីនភ្លើង០១គ្រឿង, ត្រង់ទីន័រ០២គ្រឿង, ប្រេង១០០០លីត្រ ។
ចំពោះកងទ័ពទាំង ៤៥០នាក់ ក្នុងម្នាក់ៗទទួលបានថវិកា ៥០,០០០រៀល និងផ្តល់ជូនកងវរសេនាតូចលេខ៣៩២ ចំនួន ២០,០០០,០០០រៀល ផងដែរ៕
ដោយ៖សីហា
ចំនួនអ្នកទស្សនា
- ថ្ងៃនេះ6271
- ម្សិលមិញ7271
- សប្តាហ៍នេះ25741
- ខែនេះ13551
- ឆ្នាំនេះ996771
- សរុប20224217