អភិបាលរាជធានី នាំយកអំណោយរបស់សម្តេចតេជោ និងសម្តេចកិត្តិព្រឹទ្ធ ចែកជូនយោធានៅតំបន់ប្រាសាទព្រះវិហារ
21-March-2016 | ដោយ មែន កំសត់
ព្រះវិហារ៖ អភិបាលរាជធានីភ្នំពេញ ឯកឧត្តម ប៉ា សុជាតិវង្ស និងប្រតិភូសាលាខណ្ឌទាំង១២ នៅព្រឹកថ្ងៃទី១៩ ខែមីនា ឆ្នាំ២០១៦នេះ បាននាំយកអំណោយជាគ្រឿងឧបភោគ បរិភោគ និងថវិកា របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ជាច្រើនលានរៀលទៅចែកជូនមន្ត្រីយោធា ដែលកំពុងឈរជើងការពារទឹកដី នៅតំបន់សមរភូមិប្រាសាទព្រះវិហារ ដែលបានចងសម្ព័ន្ធភាពរវាងសមរភូមិជួរមុខ និងសមរភូមិខាងក្រោយ។
ពិធីចែកជូនមន្ត្រីនាយទាហាន ពលទាហាន បានធ្វើឡើង នៅទីបញ្ជាការកងពលតូចអន្តរាគមន៍លេខ៩ ស្ថិតនៅតំបន់អូរជុញ ភូមិសែនរុងរឿង ឃុំទឹកក្រហម ស្រុកជាំក្សាន្ត ខេត្តព្រះវិហារ ដោយមានការទទួលស្វាគមន៍គណ:ប្រតិភូ ពីសំណាក់នាយឧត្តមសេនីយ៍ គីម ប៊ុនថាន អគ្គបញ្ជាការរង នៃកងយោធពលខេមរភូមិន្ទ លោកឧត្តមសេនីយ៍ ស្រី ឌឹក មេបញ្ជាការកងពលធំអន្តរាគមន៍លេខ៣ ព្រមទាំងមន្ត្រីយោធាជាន់ខ្ពស់ជាច្រើនរូបផ្សេងទៀត។
នៅចំពោះមុខនាយទាហាន ពលទាហាន ឯកឧត្តម ប៉ា សុជាតិវង្ស បានថ្លែងថា៖ «យើងបានប្រែក្លាយតំបន់សមរភូមិមុខ ក្លាយជាតំបន់អភិវឌ្ឍន៍ក្រោមការដឹកនាំដ៏ឈ្លៀសវៃ របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ហើយសម្តេចក៏បានណែនាំឲ្យមានការចុះអនុស្សារណរវាងសមរភូមិជួរមុខ និងសមរភូមិជួរក្រោយ ដើម្បីបង្កើនកិច្ចសហការ និងចំណងមិត្តភាពកាន់តែខ្លាំងឡើង» ។
ក្រៅពីការចែកអំណោយខាងលើនេះ ឯកឧត្តមអភិបាលរាជធានីភ្នំពេញ បានផ្តល់ម៉ាស៊ីនច្រូតស្រូវ ១គ្រឿង និងត្រាក់ទ័រ ២គ្រឿង ជូនកងពលសម្រាប់បង្កបង្កើនផលក្នុងអង្គភាពផងដែរ៕
ចំនួនអ្នកទស្សនា
- ថ្ងៃនេះ6651
- ម្សិលមិញ7271
- សប្តាហ៍នេះ26121
- ខែនេះ13931
- ឆ្នាំនេះ997151
- សរុប20224597