មន្ទីរអប់រំ ខេត្ត ដកតំណែងលោកនាយកវិទ្យាល័យ ហ៊ុន សែន ពាមរក៍
24-March-2016 | ដោយ មែន កំសត់
ព្រៃវែង ៖ នៅវេលាម៉ោង២រសៀលថ្ងៃទី២៣ មីនា មន្ទីរអប់រំ យុវជន និងកីឡាខេត្ត បានកោះប្រជុំលោកគ្រូ អ្នកគ្រូ ប្រមាណជិត១០០រូប នៅក្នុងវិទ្យាល័យ ហ៊ុន សែន ពាមរក៍ ដើម្បីប្រកាសសេចក្តីសម្រេចរបស់មន្ទីរអប់រំខេត្ត ។
ពិធីប្រកាស ខាងលើនេះ បានប្រព្រឹត្តទៅក្រោមអធិបតីភាពលោក ឈុន សុផល អនុប្រធានមន្ទីរអប់រំខេត្ត បានប្រកាសដកលោក ហាក់ នីន ចេញពីតួនាទីជានាយកវិទ្យាល័យ ហ៊ុន សែន ពាមរក៍ ដើម្បីទៅបម្រើការងារនៅក្នុងមន្ទីរអប់រំខេត្តវិញ ។ ការដកលោកនាយក ហាក់ នីន ចេញពីតួនាទីនេះ ធ្វើទៅតាមសំណូមពររបស់លោកគ្រូ អ្នកគ្រូ និងសិស្សានុសិស្សនៅក្នុងវិទ្យាល័យនេះ ដែលប្តឹងចោទលោក ហាក់ នីន ថា ធ្វើការគ្មានតម្លាភាព និងបានធ្វើឱ្យបាត់លុយសាលាអស់រាប់ម៉ឺនដុល្លារ ជាពិសេសការគ្រប់គ្រងមានលក្ខណៈតឹងរឹងមិនអាចទទួលយកបាន ។
លោក ឈុន សុផល បានបញ្ជាក់ថា ដោយសារតែសាលាមិនអាចគ្មានអ្នកដឹកនាំ និងគ្រប់គ្រងបាន ទើបមន្ទីរសម្រេចបង្កើតគណៈគ្រប់គ្រងបណ្តោះអាសន្នមួយសម្រាប់ គ្រប់គ្រងកិច្ចការងារនៅក្នុងវិទ្យាល័យពាមរក៍នេះ ទម្រាំតែជ្រើសរើសនាយកថ្មីបាន ។ គណៈគ្រប់គ្រងថ្មីនេះមាន លោក ឈិត វណ្ណី អនុប្រធានការិយាល័យអធិការកិច្ចមន្ទីរអប់រំខេត្តជាប្រធាន អនុប្រធានការិយាល័យអប់រំស្រុកពាមរក៌ ជាអនុប្រធាន និងលោកគ្រូ-អ្នកគ្រូ នៅវិទ្យាល័យពាមរក៍៥រូបទៀត ជាអនុប្រធាន និងសមាជិក ៕
ចំនួនអ្នកទស្សនា
- ថ្ងៃនេះ6441
- ម្សិលមិញ7271
- សប្តាហ៍នេះ25911
- ខែនេះ13721
- ឆ្នាំនេះ996941
- សរុប20224387