លោក អ៊ុក ប៊ុនធឿន មេភូមិ ស្មែត ស្រុកវាលវែង លួចដីព្រៃសហគមន៍លក់ឲ្យឈ្មួញ
31-March-2016 | ដោយ មែន កំសត់
ពោធិ៍សាត់៖ នគរបាលស្រុកវាលវែងកាលពីម្សិលមិញបានកសាងសំណុំរឿងចោទប្រកាន់មេភូមិ ម្នាក់ពីបទលួចលក់ដីព្រៃបម្រុងទុករបស់រដ្ឋដោយខុសច្បាប់ដើម្បី ដាក់ប្ដឹងទៅតុលាការខេត្តពោធិ៍សាត់ចាត់វិធានការតាមផ្លូវច្បាប់។
ការចោទប្រកាន់នេះបានធ្វើឡើងបន្ទាប់ពីសមត្ថកិច្ចចុះ ប្រតិបត្តិការបង្ក្រាបបទល្មើសនៅតាមដងព្រៃហើយបានឃាត់ខ្លួនបុរសបី នាក់ដែលកំពុងកាប់ទន្ទ្រានដីព្រៃដោយខុសច្បាប់នៅចំណុចភូមិស្មែត [ជាភូមិទើបបង្កើតថ្មីស្ថិតក្នុងឧបសម្ព័ន្ធភូមិសំឡាញ] ឃុំក្រពើពីរ ស្រុកវាលវែងកាលពីរសៀលថ្ងៃចន្ទ។
លោក ធាង ឡេង អធិការស្រុកវាលវែង បានប្រាប់ នៅព្រឹកថ្ងៃម្សិលមិញ ថាក្រោយពីបានឃាត់ខ្លួនពលរដ្ឋ ៣ នាក់ដែលកំពុងកាប់ទន្ទ្រានដីព្រៃក្នុងតំបន់នោះមកសួរពួកគេបាន ឆ្លើយថា «ដីនោះពួកគេបានទិញក្នុងតម្លៃចន្លោះពី ២០០ ដុល្លាទៅ ៥០០ ដុល្លារក្នុងមួយហិកតាពីឈ្មោះ អ៊ុក ប៊ុនធឿន ដែលជាមេភូមិស្មែត។ គាត់ថាមេភូមិថាដីនេះជាដីរបស់គាត់ទើបពួកយើងហ៊ានទិញ»។
បើតាមសម្ដីលោក ឡេង ជនសង្ស័យទាំង ៣ នាក់ដែលត្រូវបានចាប់ខ្លួនខាងលើនោះរួមមានឈ្មោះ គឹម ប្រុស អាយុ ២៦ ឆ្នាំ, សល់ សារួន អាយុ ២០ ឆ្នាំ និងឈ្មោះ ទីវ ប៊ុនហេង អាយុ ៤៥ ឆ្នាំ។ អ្នកទាំងបីរស់នៅភូមិសេកសក ឃុំផ្លូវមាស ស្រុករតនៈមណ្ឌល ខេត្តបាត់ដំបង។ ក្នុងការឃាត់ខ្លួននេះសមត្ថកិច្ចក៏បានរឹបអូសរណារយន្ត ៣ គ្រឿង វិទ្យុទាក់ទងមួយគ្រឿង និងកាំភ្លើងខ្យល់មួយដើមផងដែរ។ ផ្ទៃដីដែលពួកគេបានកាប់ឆ្ការរួចមានទំហំជាងពីរហិកតា។
លោកបានបញ្ជាក់ថា៖ «តាមចម្លើយសារភាពរបស់ពួកគេសមត្ថកិច្ចយើងក៏បានកសាងសំណុំរឿងចោទ ប្រកាន់មេភូមិឈ្មោះ អ៊ុក ប៊ុនធឿន ពីបទឆបោក និងជាមេគំនិតនាំឲ្យមានការកាប់ទន្ទ្រានកាន់កាប់ដីព្រៃរដ្ឋដោយ ខុសច្បាប់ និងបានបញ្ជូនទៅតុលាការខេត្តពោធិ៍សាត់ដើម្បីចាត់ការតាមនីតិវិធី ច្បាប់។ ចំណែកជនសង្ស័យទាំងបីខាងលើត្រូវបានដោះលែងវិញក្រោយពីធ្វើការ អប់រំ និងធ្វើកិច្ចសន្យាប្រគល់ដីនោះជូនរដ្ឋវិញ»។កាលពីម្សិលមិញ លោក អ៊ុក ប៊ុនធឿន មេភូមិ ស្មែត មិនអាចទាក់ទងសុំការអធិប្បាយបានទេ៕
ចំនួនអ្នកទស្សនា
- ថ្ងៃនេះ5591
- ម្សិលមិញ7271
- សប្តាហ៍នេះ25061
- ខែនេះ12871
- ឆ្នាំនេះ996091
- សរុប20223537