អ្នកឧកញ៉ា សៀង ណាំ ចំណាយប្រាក់ខែផ្ទាល់ខ្លួនដល់ក្រុមគ្រួសារទទួលមរណៈភាព និងស្ត្រី ទើបសម្រាលកូន
06-April-2016 | ដោយ មែន កំសត់
សៀមរាប ៖ អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប របស់គណបក្សប្រជាជនកម្ពុជាបានចំណាយប្រាក់ខែតំណាងរាស្ត្ររបស់ខ្លួន ផ្តល់ជូនដល់ប្រជាពលរដ្ឋដែលទើបសម្រាលកូន និងសមាជិកគ្រួសារទទួលមរណៈភាព មកពី៧ភូមិ នៅក្នុងសង្កាត់ស្រង៉ែក្រុងសៀមរាប ចំនួន១៥០គ្រួសារ ។ វប្បធម៌ចែករំលែកនេះបានធ្វើឡើងចាប់តាំងពីឆ្នាំ២០១៣មក ដោយក្នុង១ឆ្នាំៗ នាថ្ងៃទី៥ ខែមេសា ឆ្នាំ២០១៦ ដែលស្ថិតនៅក្នុងបុរីរបស់អ្នកឧកញ៉ា ផ្ទាល់ គឺបុរី សៀងណាំ ទី២ ។
អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងក្រុមការងារ បានជួបសំណេះសំណាលជាមួយគ្រួសារប្រជាពលរដ្ឋ ដែលមានប្រសូត្របុត្រ និងអ្នកទទួលមរណភាព ក្នុងសង្កាត់ស្រង៉ែ ក្រុងសៀមរាប ចំនួន១៥០គ្រួសារ ។ ជាមួយគ្នានេះដែរ អ្នកឧកញ៉ា សៀង ណាំ បានឧបត្ថម្ភជូនមួយគ្រួសារចំនួន២៥ម៉ឺនរៀល ជាការរួមចំណែក និងរំលែកទុក្ខលំបាកដល់ពួកគាត់បានមួយចំណែកតូចផងដែរ ។ ថវិការសរុបទាំងអស់ចំនួន៣៧លានរៀល ការឧបត្ថម្ភជូនដល់ពលរដ្ឋ និងអ្នកដែលទើបនឹងប្រសូត្របុត្ររួចនេះគីជាលើកទី៧ ហើយក្នុងនោះសរុបមានអ្នកស្លាប់១៤៣គ្រួសារ និងប្រសូត្របុត្របាន៧២២គ្រួសារ ។
អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានធ្វើការបញ្ជាក់ជាមួយពលរដ្ឋថា ប្រាក់បៀវត្សរ៍ និងប្រាក់ឧបត្ថម្ភប្រចាំខែរបស់លោក ដែលបានមកពីរដ្ឋសភា គឺលោក មិនដែលបានយកមកប្រើប្រាស់ក្នុងប្រយោជន៍ផ្ទាល់ខ្លួន ឬប្រគល់ជូនក្រុមគ្រួសារនោះទេ គឺលោក តែងតែចំណាយទាំងស្រុងសម្រាប់ជួយដល់ប្រជាពលរដ្ឋ ដែលជួបការលំបាក និងជួយឧបត្ថម្ភសម្រាប់កិច្ចការអភិវឌ្ឍសង្គម ទាំងក្នុងវិស័យពុទ្ធិចក្រ និងអាណាចក្រជាពិសេសគឺប្រជាពលរដ្ឋដែលទើបសម្រាលកូន និងសមាជិកគ្រួសារទទួលមរណៈភាពនៅក្នុងសង្កាត់ស្រង៉ែ នេះតែម្តង ។ ប្រជាពលរដ្ឋនៅក្នុងសង្កាត់ស្រង៉ែដែលទទួលបានការឧបត្ថម្ភបានចាត់ ទុកអ្នកឧកញ៉ា សៀងណាំ តំណាងរាស្ត្រមណ្ឌលសៀមរាប ដ៍ល្អ និងជាគំរូសម្រាប់ពួកគាត់ទាំងអស់គ្នា ដោយសារតែលោកតែងតែមាននូវវប្បធម៌ចែករំលែក និងគិតគូរពីសុខទុក្ខរបស់ប្រជាពលរដ្ឋជានិច្ចទាំងផ្នែក ហេដ្ឋារចនាសម្ព័ន្ធ វិស័យអប់រំ សុខាភិបាល និងជីវភាពរស់ប្រចាំថ្ងៃរបស់ប្រជាពលរដ្ឋជាដើម ។
ក្រុមប្រជាពលរដ្ឋបានបន្តទៀតថា ពួកគេចង់ឱ្យមានតំណាងដ៍ល្អបែបនេះ ឱ្យបានច្រើនដើម្បីជួយធ្វើការអភិវឌ្ឍប្រទេសឱ្យមានការរីកចម្រើន និងកាត់បន្ថយបាននូវភាពក្រីក្ររបស់ប្រជាពលរដ្ឋ ។ នៅក្នុងឱកាសសំណេះសំណាលជាមួយបងប្អូនប្រជាពលរដ្ឋមកពី៧ភូមិ ក្នុងសង្កាត់ស្រង៉ែ ក្រុងសៀមរាប នាថ្ងៃនេះ អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប សូមជូនពរប្រជាពលរដ្ឋទូទាំងខេត្តសៀមរាប ក្នុងឱកាសបុណ្យចូលឆ្នាំថ្មី ប្រពៃណីជាតិ ឆ្នាំវក អដ្ឋស័ក ព.ស២៥៦០ ខាងមុខនេះ សូមឱ្យបានប្រកបដោយសេចក្តីសុខ សុភង្គលនិងពុទ្ធិពរ ទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
ចំនួនអ្នកទស្សនា
- ថ្ងៃនេះ4301
- ម្សិលមិញ7271
- សប្តាហ៍នេះ23771
- ខែនេះ11581
- ឆ្នាំនេះ994801
- សរុប20222247