សាលាខណ្ឌឫស្សីកែវ បើកកិច្ចប្រជុំស្តីពីការ ផ្តល់អត្តសញ្ញាណប័ណ្ណសញ្ជាតិខ្មែរ
06-April-2016 | ដោយ មែន កំសត់
ភ្នំពេញ៖ នៅព្រឹកថ្ងៃទី៦ ខែមេសា ឆ្នាំ២០១៦ នេះ សាលាខណ្ឌឫស្សីកែវ បានបើកកិច្ចប្រជុំស្តីពីការផ្តល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋក្នុង មូលដ្ឋានសង្កាត់ទាំង៦ នៃខណ្ឌឫស្សីកែវ ក្រោមអធិបតីភាព លោក ស៊ូ សោគន្ធ អភិបាលរងខណ្ឌ និងលោក លីន ញ៉ក់ អភិបាលរងខណ្ឌ តំណាង លោក ជា ពិសី អភិបាលខណ្ឌឫស្សីកែវ។
កិច្ចប្រជុំនេះ មានការចូលរួម ពី លោកលោកស្រីជា ក្រុមប្រឹក្សាសង្កាត់ទាំង៦ លោកអធិការនគរបាលខណ្ឌ នាយប៉ុស្តិ៍ នគរបាលនិងមន្ត្រីដែលពាក់ព័ន្ធ សរុប ប្រមាណ២៥នាក់។
យោងតាមរបាយការណ៍របស់នគរបាល ជំនាញទទួលផែនអត្តសញ្ញាណប័ណ្ណសញ្ជាតិខ្មែរ បានឲ្យដឹងថា៖ មូលដ្ឋានសង្កាត់ទាំង៦ នៃខណ្ឌឫស្សីកែវដែលត្រូវផ្តល់ជូន អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋ មានដូចជា សង្កាត់ទួលសង្កែ ផ្តល់ជូន ២,០០០សន្លឹក សង្កាត់ស្វាយប៉ាក ចំនួន៤៧៣សន្លឹក សង្កាត់គ.ម៦ ចំនួន១,០៧៨សន្លឹក សង្កាត់ច្រាំងចំរេះ១ ចំនួន១,១៤៧សន្លឹក សង្កាត់ច្រាំងចំរេះ២ ចំនួន១,១៦៧ សន្លឹក សង្កាត់ឫស្សីកែវ ចំនួន១,៧៥១សន្លឹក។អត្តសញ្ញាណប័ណ្ណសញ្ជាតិខ្មែរដែលចែកជូនប្រជាពលរដ្ឋនៅសង្កាត់ទាំង៦ នៃខណ្ឌឫស្សីកែវ សរុបមានចំនួន៧,៦១៦សន្លឹក ក្នុងនោះមានប្រុស៣,៧២០សន្លឹក។
នាឱកាសនោះ លោក ស៊ូ សោគន្ធ អភិបាលរងខណ្ឌបានបង្ហាញ គោលបំណងនៃការរៀបចំកិច្ចប្រជុំខាងលើនេះ គឺដើម្បីជូនដំណឹងដល់ ចៅសង្កាត់, នាយប៉ុស្តិ៍ និងមេភូមិទាំងអស់ យកអត្តសញ្ញាណប័ណ្ណដែលទទួលបាននាពេលនេះ ទៅចែកជូនប្រជាពលរដ្ឋ អោយបានដល់ដៃ និងតាមខ្នងផ្ទះ។
លោកអភិបាលរង បានផ្ដោត សំខាន់ជាពិសេសគឺស្នើឲ្យ អាជ្ញាធរភូមិ-សង្កាត់ សួរបងប្អូនប្រជាពលរដ្ឋបន្ថែមថា ពួកគាត់បានទៅចុះឈ្មោះធ្វើអត្តសញ្ញាណប័ណ្ណហើយឬនៅ? បើមិនទាន់មានសូមអាជ្ញាធរ ភូមិ-សង្កាត់ជួយដោះស្រាយបន្ទាន់៕
ចំនួនអ្នកទស្សនា
- ថ្ងៃនេះ4381
- ម្សិលមិញ7271
- សប្តាហ៍នេះ23851
- ខែនេះ11661
- ឆ្នាំនេះ994881
- សរុប20222327