សាលាខណ្ឌជ្រោយចង្វារ បានជួបជុំមន្ត្រីរាជការនិមន្តព្រះសង្ឃសូត្រមន្តសុំសេចក្តីសុខ
07-April-2016 | ដោយ មែន កំសត់
ភ្នំពេញ ៖ មន្ត្រីរាជការជុំវិញសាលាខណ្ឌជ្រោយចង្វារ កាលពីព្រឹកថ្ងៃទី0៦ ខែមេសា ឆ្នាំ ២០១៦ បាននិមន្តព្រះសង្ឃសូត្រមន្ត និងប្រោះព្រំ ដើម្បីសុំសេចក្តីសុខ ព្រមទាំងទទួលអំណរសាទរទេវតាឆ្នាំថ្មី ឆ្នាំវកអដ្ឋស័ក ព.ស ២៥៦០ ត្រូវនឹង គ.ស ២០១៦ ដែលនឹងឈានចូលមកដល់នៅថ្ងៃខាងមុខនេះ។
ពិធីសូត្រមន្ត ដោយមានការអញ្ជើញចូលរួមទទួលពរជ័យពីសំណាក់ លោក ឃ្លាំង ហួត អភិបាលខណ្ឌជ្រោយចង្វារ ព្រមទាំងភរិយា និងមន្ត្រីកងកម្លាំងប្រដាប់អាវុធរួមទាំងមន្រ្តីសាលាខណ្ឌ សង្កាត់ យ៉ាងច្រើនកុះករ។
លោក ឃ្លាំង ហួត បានឱ្យដឹងថា ៖ តាមទំនៀមទម្លាប់ឱ្យតែដល់ពិធីបុណ្យចូលឆ្នាំថ្មីប្រពៃណីជាតិ មន្ត្រីរាជការគ្រប់ក្រសួងមន្ទីរ ក៏ដូចជាស្ថាប័ននានា និងនៅតាមគេហដ្ឋានតែងតែនិមន្តព្រះសង្ឃមកសូត្រមន្តប្រោះព្រំ ដើម្បីសុំសេចក្តីសុខ និងសូមខមាទោស កំហុសទាំងឡាយណាដែលបានធ្វើខុសដោយចេតនាក្តី អចេតនាក្តីពីទេវតា ឆ្នាំថ្មី និងសូមឲ្យកូនចៅបានរួចផុតពីទុក្ខទោសទាំងនោះ និងមានសេចក្តីសុខសប្បាយ។
បន្ទាប់ពីព្រះសង្ឃចំនួន៥អង្គ បានសូត្រធម៌ប្រោះព្រំដល់ លោក ឃ្លាំង ហួត និងមន្ត្រីសាលាខណ្ឌទាំងអស់ ឱ្យមានសេរីមង្គល វិបុលសុខ និងមានសេចក្តីសុខសប្បាយក្នុងឆ្នាំថ្មី លោកអភិបាលក៏បានវេទយ្យទាន និងបច្ច័យដល់ព្រះសង្ឃ និងឧទ្ទិកុសលជូនដល់មាតា បិតា និងជីដូនជីតា និងញាតិការទាំង៧សន្តាន ដែលបានចែកឋាន ព្រមទាំងឧទ្ទិសកុសលជូនដល់វីរបុរសអ្នកស្នេហាជាតិ ដែលបានបូជាសាច់ស្រស់ឈាមស្រស់ ដើម្បីបុព្វហេតុជាតិ និងមាតុភូមិ។
នៅក្នុងពិធីនោះដែល ក្នុងនាមគណៈបញ្ជាការឯកភាព លោកអភិបាលបានថ្លែងអំណរអគុណចំពោះមន្ត្រីរាជការគ្រប់លំដាប់ថ្នាក់ដែលបានយកចិត្តទុកដាក់អស់ពីកម្លាំងកាយចិត្ត និងធនធានក្នុងការបំពេញភារកិច្ចតាមជំនាញស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលមាន សម្ដេចតេជោ ហ៊ុន សែន ជាប្រមុខដឹកនាំ៕
ចំនួនអ្នកទស្សនា
- ថ្ងៃនេះ4521
- ម្សិលមិញ7271
- សប្តាហ៍នេះ23991
- ខែនេះ11801
- ឆ្នាំនេះ995021
- សរុប20222467