សម្ដេចតេជោ ៖ ខ្ញុំចាំមើលបក្សនយោបាយណាខ្លះចេញមុខមកដោះស្រាយបញ្ហាទឹក
26-April-2016 | ដោយ មែន កំសត់
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាល នៅព្រឹកថ្ងៃទី២៦ ខែមេសា ឆ្នាំ២០១៦នេះបានបោះសម្ដីទៅកាន់គណបក្សនយោបាយ មួយចំនួនដែលបានតែនិយាយ តែមិនធ្វើសកម្មភាពក្នុងការដោះស្រាយបញ្ហាជាតិ ថា "តើមានគណបក្សប្រឆាំងណាខ្លះដែលនឹងចេញ មកដោះស្រាយបញ្ហាទឹក ឲ្យប្រជាពលរដ្ឋជាមួយរាជរដ្ឋាភិបាល"។
ថ្លែងក្នុងពិធីសម្ពោធ បើកឲ្យប្រើប្រាស់ផ្លូវជាតិលេខ៥៦ និងផ្លូវចូលប្រាសាទ បន្ទាយឆ្មារ ពីក្រុងសិរីសោភ័ណ ខេត្ដបន្ទាយមានជ័យទៅដល់ក្រុងសំរោង ខេត្ដឧត្ដរមានជ័យ នៅព្រឹកថ្ងៃទី២៦ ខែមេសា ឆ្នាំ២០១៦ សម្តេចនាយករដ្ឋមន្ដ្រីបានមានប្រសាសន៍ថា “ខ្ញុំរង់ចាំមើលបក្ស នយោបាយណាខ្លះចេញមកដោះស្រាយបញ្ហាទឹក។ អាចបក្សខ្លះឆ្លើយថា ខ្លួនមិនមែនជាបក្សកាន់អំណាច អីចឹងបើដោះស្រាយបញ្ហាទឹកមិនបានផងមានតែលោកឯង សន្យាខ្យល់”។
ជាមួយគ្នានេះដែរ សម្តេចនាយករដ្ឋមន្ត្រី ហ៊ុន សែន បានចេញបញ្ជាដាច់ណាត់ឲ្យមន្ត្រីទាំងអស់ ប្រើយុទ្ធនាការដឹកទឹកចែកជូនប្រជាពលរដ្ឋមិនត្រូវឲ្យប្រជាពលរដ្ឋ រងគ្រោះដោយសារខ្វះទឹកនោះទេ ហើយសម្តេចប្រកាសមិនឲ្យក្រសួងនានា កោះហៅអភិបាលខេត្តឡើងទៅប្រជុំនោះដោយទុកពេលវេលាឲ្យអភិបាលខេត្ត ទាំងអស់ ប្រើយុទ្ធនាការដឹកទឹកចែកជូនប្រជាពលរដ្ឋ។
សម្តេច តេជោ ហ៊ុន សែន បានកោតសរសើរដល់លោក កែ កឹមយ៉ានដែលបានប្រើប្រាស់យុទ្ធនាការដឹកទឹកចែកជូនប្រជាពលរដ្ឋបាន ល្អសូមឲ្យអភិបាលខេត្តនានាយកគំរូតាមលោក។សម្តេចតេជោ ក៏បានអំពាវនាវឲ្យក្រុមហ៊ុនផលិតទឹកសុទ្ធនានា ចូលរួមបរិច្ចាគទឹកជូនប្រជាពលរដ្ឋដែលកំពុងរងការខ្វះខាត។ក្រៅពីនោះ សម្តេចតេជោ បានស្នើឲ្យកាកបាទក្រហមកម្ពុជា បង្វែទិសដៅពីការជួយជំនួយផ្សេងៗ មកជាការផ្តល់ជំនួយជាទឹកដល់ប្រជាពលរដ្ឋវិញ។
បន្ថែមពីលើ នេះទៀតនោះ សម្តេចតេជោ អំពាវនាវឲ្យក្រុមការងារគណបក្សប្រជាជនកម្ពុជា ទម្លាក់ចោលការងារផ្សេងទៀតមកចុះជួយលើកិច្ចការនេះជាបន្ទាន់ និងបានប្រាប់សម្តេចសេនាវិបុល សាយ ឈុំ ប្រធានព្រឹទ្ធសភា និងអនុប្រធានគណបក្សប្រជាជនកម្ពុជា ធ្វើសេចក្តីណែនាំនេះ ដើម្បីអោយមានការចូលរួមក្នុងក្របខណ្ឌទាំងបក្ស និងរាជរដ្ឋាភិបាល។
សម្ដេចនាយករដ្ឋមន្ត្រីបន្តថា ខេត្តស្វាយរៀង កំពត កំពង់ស្ពឺ និងតាកែវ ជួបប្រទះការខ្វះខាតទឹក។ អភិបាលខេត្តត្រូវម្ចាស់ខ្លួនឯង។ហេតុនេះក្រសួងធនធានទឹកត្រូវ ពិនិត្យមើល កន្លែងណាអាចស្តុកទឹកបាន ត្រូវពិនិត្យមើលថា អាចជីកស្រះទឹក ប្រឡាយទឹក នៅកន្លែងណា? សម្តេចតេជោ ក៏បានដោះស្រាយសំណូមពរមួយចំនួនរបស់ប្រជាពលរដ្ឋ៕
ចំនួនអ្នកទស្សនា
- ថ្ងៃនេះ3201
- ម្សិលមិញ7271
- សប្តាហ៍នេះ22671
- ខែនេះ10481
- ឆ្នាំនេះ993701
- សរុប20221147