គម្រោងសាងសង់ផ្លូវ របស់ឃុំកៀនជ្រៃនិងឃុំរអាងស្រុកកំពង់សៀម ត្រូវបានដាក់ឲ្យដេញថ្លៃ មិនប្រក្រតីខុសពីគោលការណ៍នៃកិច្ចលទ្ធកម្ម
29-April-2016 | ដោយ មែន កំសត់
កំពង់ចាម៖ បន្ទាប់ពីមានការតាមប្រមាញ់របស់អ្នកសារព័ត៌មាន លើគម្រោងដាក់ឲ្យដេញថ្លៃ សម្រាប់កិច្ចសន្យាការងារសាងសង់ផ្លូវបេតុង ចំនួន២ខ្សែ របស់ក្រុមប្រឹក្សា ឃុំកៀនជ្រៃ និងឃុំរអាង ស្រុកកំពង់សៀម ខេត្តកំពង់ចាម ដែលបានប្រព្រឹត្តឡើងកាលពីព្រឹកថ្ងៃទី២៧ មេសា ២០១៦នេះ ត្រូវបានគេមើលឃើញថា មានភាពមិនប្រក្រតី ដោយមានការឃុបឃិតគ្នាជាប្រព័ន្ធ ដើម្បីទាញយកផលប្រយោជន៍ទៀតផង ។
នាព្រឹកថ្ងៃទី២៨ មេសា ២០១៦នេះ នៅសាលាសង្កាត់សំបូរមាស ក្រុងកំពង់ចាម មានការដាក់ឲ្យដេញថ្លៃ សម្រាប់កិច្ចសន្យាការងារសាងសង់ផ្លូវបេតុង ចំនួន២ខ្សែ និងនៅសាលាឃុំព្រែកបាក់ ស្រុកស្ទឹងត្រង់ ខេត្តកំពង់ចាម ផ្លូវក្រាលគ្រួសក្រហម ចំនួន២ខ្សែ ត្រូវបានដាក់ឲ្យដេញថ្លៃយ៉ាងសុក្រឹត មានអ្នកចូលរួមធ្វើការដេញថ្លៃជាច្រើន ដែលមានអ្នកសារព័ត៌មានចូលរួមផងនោះ ឃើញថា ផ្លូវបេតុងអារមេ ២ខ្សែនៅក្នុងសង្កាត់សំបូរមាស មានប្រវែង២២៩ម៉ែត្រ ដាក់ឲ្យដេញថ្លៃតម្លៃប៉ាន់ស្មាន ៦៤,៩៧៦,៣២៤៛ ហើយត្រូវរ៉ូវគ្នាក្នុងតម្លៃ ២៦,៨២០,០០០៛ និងផ្លូវបេតុងអារមេ១ខ្សែទៀត នៅក្នុងសង្កាត់វាលវង់ មានប្រវែង២០៥ម៉ែត្រ ដាក់ឲ្យដេញថ្លៃតម្លៃប៉ាន់ស្មាន ៨១,២២៣,០៥៥៛ ហើយត្រូវរ៉ូវគ្នាក្នុងតម្លៃ ៤៥,៩៩៩,៥០០៛ ក្នុងនោះនៅស្រុកស្ទឹងត្រង់ ការជួសជុលផ្លូវក្រាលគ្រួសក្រហម ១ខ្សែមានប្រវែង ១,0៧ គីឡូម៉ែត្រ ក្នុងឃុំព្រែកបាក់ ដែលមានតម្លៃប៉ាន់ស្មាន ៥៤,៧៥៩,៦០០៛ ហើយត្រូវរ៉ូវគ្នាក្នុងតម្លៃ ៨,៧៥៨,២០០៛ និងផ្លូវក្រាលគ្រួសក្រហម ១ខ្សែទៀតមានប្រវែង ១,៨៥ គីឡូម៉ែត្រ ក្នុងឃុំពាមកោះស្នា ដែលមានតម្លៃប៉ាន់ស្មាន ១១៥,៤៤៨,៣០០៛ ហើយត្រូវរ៉ូវគ្នាក្នុងតម្លៃ ១៤,៨១៤,៥០០៛ ការដាក់ឲ្យដេញថ្លៃ ការសាងសង់និងជួសជុលផ្លូវ នៅថ្ងៃទី២៨ មេសានេះ ក្រោមការតាមដានរបស់អ្នកសារព័ត៌មាន ឃើញថា តម្លៃដែលក្រុមហ៊ុនដេញថ្លៃយកបាន មានភាពខុសគ្នាដូចមេឃនិងដី ជាមួយតម្លៃប៉ាន់ស្មាន ដូច្នេះសាលាឃុំសង្កាត់ អាចនៅសល់លុយជាច្រើនទៀត សម្រាប់កសាងផ្លូវក្នុងមូលដ្ឋានរបស់ខ្លួន ។
វាខុសប្លែកអីតែ នៅសាលាឃុំកៀនជ្រៃ ដែលផ្លូវបេតុងអារមេ១ខ្សែ មានប្រវែង ១៤៥ម៉ែត្រ តម្លៃប៉ាន់ស្មាន ៥៣,២៨៥,៨០០៛ ហើយត្រូវរ៉ូវគ្នាក្នុងតម្លៃប្រកៀកប្រកិតគ្នា គឺ៥២,២០០,០០០៛ និងឃុំរអាងផ្លូវបេតុងអារមេ ១ខ្សែមានប្រវែង ១៩៤ម៉ែត្រ តម្លៃប៉ាន់ស្មាន ៧២,៤00,៦00៛ ហើយត្រូវរ៉ូវគ្នាក្នុងតម្លៃប្រកៀកប្រកិតគ្នា គឺ ៧១,០០០,០០០៛ ដែលការដេញថ្លៃនេះ ត្រូវបានគេសង្ស័យថា មានការឃុបឃិតគ្នាជាប្រព័ន្ធ ដើម្បីទាញយកផលប្រយោជន៍រៀងៗខ្លួនទៀតផង ហេតុនេះស្នើមន្ត្រីលទ្ធកម្មខេត្ត ដែលជាភ្នែកច្រមុះឲ្យអភិបាលខេត្តមេត្តាពិនិត្យមើលការដេញថ្លៃនេះ វាខុសពីគោលការណ៍ណែនាំរបស់ថ្នាក់ជាតិ«គជអប»ហើយ៕
ដោយ៖អ៊ាមហ៊ុយ
ចំនួនអ្នកទស្សនា
- ថ្ងៃនេះ3331
- ម្សិលមិញ7271
- សប្តាហ៍នេះ22801
- ខែនេះ10611
- ឆ្នាំនេះ993831
- សរុប20221277