កិច្ចប្រជុំសាមញ្ញលើកទី២៤ របស់ក្រុមប្រឹក្សាខេត្តសៀមរាប
05-May-2016 | ដោយ មែន កំសត់
ខេត្តសៀមរាប ៖ នៅរដ្ឋបាលសាលាខេត្តសៀមរាប នាថ្ងៃទី០៤ ខែឧសភា ឆ្នាំ២០១៦នេះ មានបើកកិច្ចប្រជុំសាមញ្ញលើកទី២៤ របស់ក្រុមប្រឹក្សាខេត្តសៀមរាប អាណត្តិទី២ ក្រោមអធិបតីភាព របស់ឯកឧត្តម នូ ផល្លា ប្រធានក្រុមប្រឹក្សាខេត្ត ឯកឧត្តមបណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប
ក្នុងនោះពិធីនោះដែរក៏មានការអញ្ជើញ ចូលរួមពីសំណាក់ឯកឧត្តម លោកជំទាវជាសមាជិកក្រុមប្រឹក្សាខេត្ត គណៈអភិបាលខេត្ត អាជ្ញាធរជាតិអប្សរា និងអស់លោក លោកស្រី ថ្នាក់ដឹកនាំមន្ទីរ អង្គភាពជុំវិញខេត្ត នាយករងរដ្ឋបាលសាលាខេត្ត ទីចាត់ការទាំង៦របស់រដ្ឋបាលសាលាខេត្ត អាជ្ញាធរក្រុងចូលរួមផងដែរ។
ដើម្បីពិនិត្យ ពិភាក្សា អនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី២៣ របស់ក្រុមប្រឹក្សាខេត្ត និងពិនិត្យ ពិភាក្សា ការអនុម័តលើផែនការសកម្មភាពប្រចាំឆ្នាំ២០១៦ របស់ មណ្ឌលអភិវឌ្ឍន៍ធនធានមនុស្ស រដ្ឋបាលខេត្តសៀមរាប និងពិនិត្យ ពិភាក្សា អនុម័តលើសំណើសុំតែងតាំងមន្ត្រីរាជការស៊ីវិល ចំនួន០៥រូប មកពីរចនាសម្ព័ន្ធមន្ទីរក្នុងខេត្ត និងបញ្ហាផ្សេងៗ ។
បន្ទាប់ពីការពិនិត្យកូរ៉ុម សមាសភាពសមាជិកក្រុមប្រឹក្សាខេត្តរួចមក ឯកឧត្តម នូ ផល្លា ប្រធានក្រុមប្រឹក្សាខេត្តបានមានប្រសាសន៍ បើកកិច្ចប្រជុំសាមញ្ញលើកទី២៤ អាណត្តិទី២ របស់ក្រុមប្រឹក្សាខេត្ត សមាជិកកិច្ចប្រជុំក៏បានធ្វើការត្រួតពិនិត្យ និង ពិភាក្សាទៅតាមរបៀបវារៈនៃកិច្ចប្រជុំបានគ្រោងទុក ។
បន្ទាប់ពីការអនុម័តទៅលើសេចក្តីព្រាងកំណត់ហេតុកិច្ចប្រជុំ សាមញ្ញលើកទី២៣ របស់ក្រុមប្រឹក្សាខេត្ត អាណត្តិទី២រួចមក កិច្ចប្រជុំបានធ្វើការត្រួតពិនិត្យ ពិភាក្សា លើសេចក្តីព្រាងរបាយការណ៍ប្រចាំខែមេសា ឆ្នាំ២០១៦ ស្តីពីការអនុវត្តការងាររបស់រដ្ឋបាលខេត្ត ក្នុងនោះសមាជិកក្រុមប្រឹក្សាខេត្ត ក៏បានលើកឡើងនូវចំណុចមួយដោយផ្តោតអំពី បញ្ហាសន្តិសុខសណ្តាប់ធ្នាប់ ទៅលើល្បែងស៊ីសង គ្រឿងញៀន អំពីបញ្ហារង្វាន់លើកទឹកចិត្ត បញ្ហាទឹកស្អាត និង ការគ្រប់គ្រងបុរាណដ្ឋានជាដើម ។
ក្នុងនោះដែរឯកឧត្តម បណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប ក៏បានធ្វើការបកស្រាយបំភ្លឺដល់កិច្ចប្រជុំក្រុមប្រឹក្សាខេត្ត ដោយបានគូសបញ្ជាក់ថា ក្នុងនាមប្រធានគណៈបញ្ជាការឯកភាពខេត្ត បានយកចិត្តទុកដាក់ខ្ពស់ លើការបង្ក្រាបនូវល្បែងស៊ីសង និងគ្រឿងញៀនដូចភ្លៀងរលឹម ព្រមទាំងបានធ្វើការបង្ក្រាបទីតាំងកាស៊ីណូដ៏ធំមួយនៅកណ្តាលក្រុង សៀមរាប ហើយចំពោះការផ្តល់ប្រាក់រង្វាន់ដល់មន្ត្រីរាជការសាលាខេត្ត ក៏បានធ្វើការបែងចែកជូនដល់មន្ត្រីរាជការរួចរាល់ផងដែរ ។ ក្នុងនោះលោកបណ្ឌិតក៏បានអនុញ្ញាតឲ្យបណ្តាថ្នាក់ដឹកនាំមន្ទីរ អង្គភាពដែលមានការពាក់ព័ន្ធបានធ្វើការបកស្រាយ បំភ្លឺនូវរាល់បញ្ហា ដែលបានលើកឡើងរបស់សមាជិកក្រុមកិច្ចប្រជុំក្រុមប្រឹក្សាខេត្ត ក្នុងកិច្ចប្រជុំសាមញ្ញលើកទី២៤ អាណត្តិទី២នេះផងដែរ ។
ឆ្លងតាមការបកស្រាយរបស់អស់លោកជាថ្នាក់ដឹកនាំមន្ទីរ អង្គភាពរួចមក មានមតិបូកសរុបនៃកិច្ចប្រជុំនោះ ឯកឧត្តម នូ ផល្លា ក៏បានបញ្ជាក់អំពីលទ្ធផលដែលកិច្ចប្រជុំសាមញ្ញលើកទី២៤ របស់ក្រុមប្រឹក្សាខេត្ត អាណត្តិទី២ ដែលបានអនុម័តទៅលើលទ្ធផលនៃកិច្ចពិនិត្យ ពិភាក្សាទៅតាមរបៀបវារៈដែលបានគ្រោងទុក ដោយក្នុងសង្កត់ធ្ងន់ចំពោះមន្ទីរមានការពាក់ព័ន្ធ ត្រូវមានវិធានការធ្វើការដោះស្រាយប្រកបទៅដោយសន្តិវិធី ។ ដោយឡែកចំពោះ របៀបវារៈមួយចំណុច ស្តីពីការពិនិត្យ ពិភាក្សា អនុម័តលើសំណើសុំតែងតាំងមន្ត្រីរាជការស៊ីវិល ក្នុងរចនាសម្ព័ន្ធមន្ទីរអង្គភាពចំនួន០៥រូប ដោយបានធ្វើការប្រជុំជាសម្ងាត់ផងដែរ ។
ក្នុងនោះឯកឧត្តមក៏បានធ្វើការជម្រុញ ដល់មន្ទីរ អង្គភាពមានសមត្ថកិច្ចត្រូវបង្កើនការយកចិត្តទុកដាក់ខ្ពស់លើការងារ សន្តិសុខទេសចរណ៍ ការផ្តល់អត្តសញ្ញាណប័ណ្ណដល់ប្រជាពលរដ្ឋឲ្យបានទាន់ពេលវេលា និងបំបាត់នូវល្បែងស៊ីសង និងគ្រឿងញៀន នៅតាមមូលដ្ឋានផងដែរ ។ លោក ក៏បានថ្លែងអំណរគុណចំពោះគណៈអភិបាលខេត្ត និងថ្នាក់ដឹកនាំមន្ទីរ អង្គភាព អាជ្ញាធរជាតិអប្សរា និង អាជ្ញាធរក្រុង ដែលបានចូលកិច្ចប្រជុំរបស់ក្រុមប្រឹក្សាខេត្តលើកទី២៤នេះ ដែលកាន់ធ្វើឲ្យមានការប្រសើរឡើងថែមទៀត ក្នុងការអនុវត្តលទ្ធិប្រជាធិបតេយ្យនៅកម្ពុជា សំដៅឆ្លើយតបទៅនឹងតម្រូវការប្រជាពលរដ្ឋ និងរួមចំណែកកាត់បន្ថយភាពក្រីក្រ ៕
ចំនួនអ្នកទស្សនា
- ថ្ងៃនេះ1871
- ម្សិលមិញ7271
- សប្តាហ៍នេះ21341
- ខែនេះ9151
- ឆ្នាំនេះ992371
- សរុប20219817