លោកស្រី មិថុនា ភូថង ត្រូវបានតែងតាំងជាអភិបាលរង ខេត្តកោះកុង
09-May-2016 | ដោយ មែន កំសត់
កោះកុង៖ នៅព្រឹកថ្ងៃទី ៩ខែ ឧសភា ឆ្នាំ ២០១៦ នេះ ឯកឧត្តមសក់ សេដ្ឋា រដ្ឋលេខា ធិការក្រសួងមហាផ្ទៃតំណាងដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានអញ្ជើញធ្វើជាអធិបតី នៅក្នុងពិធីប្រកាសចូលកាន់តំណែង អភិបាលរងខេត្តកោះកុង នៅសាលមហោស្រពខេត្តកោះកុង។
លោកស្រី មិថុនា ភូថង ត្រូវជាកូនឯកឧត្តមយុទ្ធភូថងអតីតជាសមាជិកក្រុមប្រឹក្សាខេត្តនិងជាប្រធានសហភាព សហព័ន្ធយុវជនកម្ពុជាខេត្តកោះកុងត្រូវបានតែងតាំងជាអភិបាលរង ខេត្តកោះកុងជំនួសលោកជំទាវ អេង គឹមនាងដែលត្រូវចូលនិវត្តន៍។
នាឪកាសនោះឯកឧត្តម ប៊ុន លើត បានមានប្រសាសន៍ថា ការតែងតាំងអភិបាលខេត្តកោះកុងនាពេលនេះមិនមែនជាការដកតំណែងមន្ត្រី នរណាម្នាក់ទេ គឺដោយសារតែមានមន្ត្រីដែលត្រូវចូលនិវត្តតាមការកំណត់របស់ច្បាប់ ដូច្នេះត្រូវតែមានការតែងតាំងមន្ត្រីមកចូលជំនួសតំណែងនេះ។
ឯកឧត្តមអភិបាលខេត្តបានបន្តថា តាមរយៈការតែងតាំងអភិបាលថ្មីនេះលោកជឿជាក់ថាអភិបាលរងខេត្តដែលទើប ទទួលតំណែងថ្មីពិតជាអាចចូលរួមបន្តនូវការដឹកនាំគ្រប់ គ្រងរដ្ឋបាលខេត្តឲ្យសម្រេចបានលទ្ធផលល្អប្រសើរហើយសង្ឃឹមយ៉ាងមុតមាំ ថាការចូលកាន់តំណែងរបស់លោកជំទាវមិថុនា ភូថងពិតជាបាននាំយកនូវបទពិសោធន៍និងគំនិតច្នៃប្រឌិតថ្មីៗបន្ថែមទៀត ដោយបន្តប្រពៃណីដឹកនាំល្អ សាមគ្គីភាពទូលំទូលាយ ទំនាក់ទំនងល្អបន្តអនុវត្តគ្រប់កិច្ចការរដ្ឋបាលនិងសមត្ថកិច្ចជំនាញ ឲ្យកាន់តែល្អប្រសើរថែមទៀតសំដៅបង្កើនប្រសិទ្ធភាពការងារ រដ្ឋបាលដែនដីក្នុងបុព្វហេតុបម្រើដល់ការគ្រប់គ្រងរដ្ឋបាល តាមគោលការណ៍នៃរដ្ឋបាលឯកភាពដើម្បីបង្កើតជំរុញនិងឲ្យមានចីរភាព ដល់ការអភិវឌ្ឍតាមបែបប្រជាធិបតេយ្យតាមរយៈនយោបាយវិមជ្ឈការនិង វិសហមជ្ឈការស្របតាមការកំណត់នៃច្បាប់ស្តីពីការគ្រប់ គ្រងរដ្ឋបាលរាជធានី.ខេត្ត ក្រុង ស្រុក ខណ្ឌនិងលិខិតបទដ្ឋាននានាជាធរមាន។
ដោយឡែកលោកជំទាវ មិថុនា ភូថងដែលទើបតែងតាំងជាអភិបាលរងខេត្ត បានឡើងប្តេជ្ញាចិត្តថាខិតំយកចិត្តទុកដាក់បំពេញការងារប្រកបដោយ ការទទួលខុសត្រូវដោយអនុវត្តតាមច្បាប់ ព្រះរាជកិច្ច សេចក្តីណែនាំ គោលនយោបាយនិងលិខិតបទដ្ឋានគតិយុត្តិនានាឲ្យបានល្អប្រសើរ។ ខិតខំអនុវត្តការងារឲ្យបានល្អតាមការបែងចែកតួនាទី ភារកិច្ចនិងរបៀបរបបធ្វើការងាររបស់គណៈអភិបាលខេត្តជាមួយគ្នានោះ ខិតខំលើកកម្ពស់ស្មារតីសាមគ្គីភាពនិងកិច្ចសហប្រតិបត្តិការក្នុងជួរ មន្ត្រីរាជការនិងជាមួយមន្ទីរអង្គភាពនានាដើម្បីលើកកម្ពស់ការអនុវត្ត ការងារនិងផ្តល់សេវាជូនប្រជាពលរដ្ឋ។
នាឱកាសនោះឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃបានកោតសរសើរនិងទទួលស្គាល់នូវសមិទ្ធផលនិង ការអភិវឌ្ឍន៍របស់ខេត្តទាំងមូល។ ជាមួយគ្នានោះឯកឧត្តម សក់ សេដ្ឋា បានសំណូមពរអភិបាលខេត្តនិងអភិបាលរងខេត្តដែលទើបចូលកាន់តំណែង ព្រមទាំងមន្ត្រីបុគ្គលិកសាលាខេត្តទាំងអស់បន្តរួមសាមគ្គីគ្នាល្អ ដើម្បីបន្តអភិឌ្ឍន៍ខេត្តមួយនេះកាន់តែរីកចម្រើនឡើងថែមទៀត។
លោកបានមានប្រសាសន៍ថា ការតែងតាំងអភិបាលរងនៅពេលនេះគឺជាកូតាស្ត្រីគឺបានឆ្លើយតបទៅនឹង តម្រូវការរបស់របស់រាជរដ្ឋាភិបាលដែលតម្រូវឲ្យមានស្ត្រីយ៉ាងហោចណាស់ មួយរូបនៅក្នុងជួរថ្នាក់ដឹកនាំ។ ជាមួយគ្នានោះមួយរយៈចុងក្រោយ នេះគឺសង្កេតឃើញថាគោលនយោបាយលើកកម្ពស់សមភាពនិងសមធម៌យេនឌ័រដែលធានា ផ្តល់អំណាចដល់ស្ត្រីនៅក្នុងការធ្វើការសម្រេចចិត្តផ្នែកនយោបាយ មានការអភិវឌ្ឍន៍រីកចម្រើនជាបន្តបន្ទាប់៕
ចំនួនអ្នកទស្សនា
- ថ្ងៃនេះ1051
- ម្សិលមិញ7271
- សប្តាហ៍នេះ20521
- ខែនេះ8331
- ឆ្នាំនេះ991551
- សរុប20218997