រដ្ឋបាលបាលខណ្ឌទួលគោករៀបចំពិធីវាយកម្ទេចទូហ្គេមល្បែងស៊ីសង
12-May-2016 | ដោយ មែន កំសត់
ភ្នំពេញ៖នៅព្រឹកថ្ងៃទី១២ខែឧសភាឆ្នាំ២០១៦ដោយមានការនែនាំពីលោក ឯក ឃុនដឿន អភិបាលនៃគណអភិបាលខណ្ឌទួលគោក លោក ប៉ាង លីដា អភិបាលរងខណ្ឌបានដឹកនាំមន្ត្រីសាលាខណ្ឌនិងប្រជាការពារខណ្ឌ វាយកម្ទេចទូហ្គេមល្បែងស៊ីសងចំនួនសរុប១២ទូហ្គេមបាញ់ត្រីនិងទូបៀរចំនួន១០ សរុប២២ទូ។
ការ វាយកម្ទេចទូហ្គេមខុសច្បាប់ខាងលើនេះ គឺជាលើកទី២ហើយសម្រាប់ខណ្ឌទួលគោក ដែលលើកទី១ អាជ្ញាធរបានធ្វើការដុតបំផ្លាញទូហ្គេមបាញ់ត្រីចំនួន ០៦គ្រឿង កាលពីព្រឹកថ្ងៃទី០៥ ខែសីហា ឆ្នាំ២០១៥ កន្លងទៅ ។
លោក ប៉ាង លីដា អភិបាលរងខណ្ឌបានមានប្រសាសន៍ជុំវិញការវាយកម្ទេចទូហ្គេមខាងលើ នេះថា ទូហ្គេមទាំងនេះ គឺជាប្រភេទល្បែងស៊ីសងខុសច្បាប់ ដោយប្រើប្រាស់លុយទើបអាចលេងបាន ។ វាជាហ្គេមមួយប្រភេទ ដែលច្បាប់ហាមប្រាមមិនឲ្យបើកដំណើរការបានជាដាច់ខាត មិនថា ក្នុងរូបភាពបែបណានោះទេ ។
បន្ថែមពីនេះទៅទៀត វាមិនត្រឹមតែជាប្រភេទល្បែងស៊ីសងនោះទេ វាក៏ជាប្រភេទហ្គេមដែលពង្វក់ និងចូលជ្រាបទៅដល់ស្រទាប់ស្មារតីយុវជន យុវសិស្ស និងក្មេងៗជាសិស្សសាលាតូចៗ អោយបោះបង់ការរៀនសូត្រចោល ហើយនាំគ្នាមកពពាក់ពពួនគ្នាលេងយ៉ាងសប្បាយ ។ និងពេលខ្លះ អាចបែកគំនិត រហូតប្រព្រឹត្តិនូវបទល្មើសលួច ឆក់ ប្លន់ និងសកម្មភាពអសន្តិសុខផ្សេងៗជាដើម ដើម្បីយកលុយមកបំពេញ ចំណង់ចិត្តខ្លួនក្នុងការលេងហ្គេមមួយនេះ ។
ក្នុងឱកាសខាងលើដដែលនេះ លោកអភិបាលរង បានធ្វើការអំពាវនាវដល់បងប្អូនប្រជាពលរដ្ឋ អ៊ុំមីងពូ ទាំងអស់ ដែលរស់នៅក្នុងមូលដ្ឋានខណ្ឌទួលគោកទាំងមូល អោយមេត្តាចូលរួមសហការជាមួយអាជ្ញាធរយើងគ្រប់ពេលវេលា ក្នុងការផ្តល់នូវព័ត៌មាន ឬ មុខសញ្ញាមួយចំនួនទាក់ទងទៅនឹងទីតាំងដែលពាក់ព័ន្ធ អំពើល្មើសច្បាប់ មិនថា តែទីតាំងដែលកំពុងលួចលាក់បើកហ្គេមបាញ់ត្រីឡើយ គឺរាល់បទល្មើស មានដូចជា បៀរ អាប៉ោង កន្ទុយលេខ ជល់មាន់ ជាដើម ។ សូមបងប្អូនចូលរួមអោយបានគ្រប់ៗគ្នា ដើម្បីមានភាពងាយស្រួលសម្រាប់អាជ្ញាធរក្នុងការទប់ស្កាត់ បង្ការ និងបង្ក្រាប ឲ្យសមស្របទៅនឹងគោលនយោបាយទាំង០៩ចំណុចរបស់រាជរដ្ឋាភិបាលកម្ពុជា និងដើម្បីធានាបាននូវសន្តិសុខសុវត្ថិភាពជូនបងប្អូនរស់នៅប្រកបដោយ ភាពសុខសាន្ត ។
ជំនួសមុខអោយអាជ្ញាធរ ក៏ដូចជាគណៈបញ្ជាការឯកភាពខណ្ឌទួលគោកទាំងមូល លោកអភិបាលរង ក៏ បានសន្យាថា និងបន្តសកម្មភាពបង្ក្រាបជាបន្តបន្ទាប់ទៅថ្ងៃមុខបន្ថែមទៀត ទៅលើទីតាំងទាំងឡាយណាដែលកំពុងព្រហើនប្រព្រឹត្តិសកម្មភាពល្មើសនឹង ច្បាប់ ដែលតែងតែបង្កជាភាពជ្រួលច្របល់ដល់សង្គមជាតិ ដោយអាជ្ញាធរមិនគិតពីបក្ខពួក ណាម្នាក់ឡើយ ព្រោះអាជ្ញាធរជា មាតាបិតាប្រជាពលរដ្ឋ និងជាអ្នកបម្រើរាស្ត្រ បើរវល់គិតតែខ្លាចអំណាច ឬបុណ្យសក្តិរបស់អស់លោកជាអ្នកធំៗមួយចំនួន តើប្រជារាស្ត្រផ្ញើក្តីរំពឹង និងសេចក្តីទុកចិត្តទៅលើអ្នកណាបានទៀតទៅថ្ងៃមុខ
ចំនួនអ្នកទស្សនា
- ថ្ងៃនេះ81
- ម្សិលមិញ7271
- សប្តាហ៍នេះ19551
- ខែនេះ7361
- ឆ្នាំនេះ990581
- សរុប20218027