ប្រធានសហគមន៍ឃុបឃិតគ្នាបូមពង្រីងបឹងអភិរក្សសត្វត្រី ដើម្បីកាយយកដីលក់យ៉ាងអនាធិបតេយ្យ
14-May-2016 | ដោយ មែន កំសត់
បន្ទាយមានជ័យ ៖ បឹងអភិរក្សសត្វត្រីមួយកន្លែងនៅឃុំសំបួរ ត្រូវបានឈ្មួញលួចបូមយកត្រីអស់ពីបឹង ហើយកាយយកដីលក់បែបអនាធិបតេយ្យទៀតផង។ ប៉ុន្តែក្រុមឈ្មួញទាំងនោះនិយាយថា មុននឹងឈានដល់ការកាយយកដីបឹង សម្រាប់អភិរក្សសត្វត្រីទៅលក់នោះគឺបានប្រាប់ថ្នាក់លើពីភូមិដល់ ខេត្តអស់ហើយ។
បឹងអភិរក្សសត្វត្រីនោះ ស្ថិតនៅក្នុងភូមិឃុំសំបួរ ស្រុកមង្គលបូរី ខេត្តបន្ទាយមានជ័យ ត្រូវបានក្រុមឈ្មួញ រួមជាមួយអាជ្ញាធរ មន្ត្រីជំនាញ ឃុបឃិតគ្នាបូមយកត្រី ពីក្នុងបឹងអភិរក្សទៅលក់ដោយគ្មានវិធានការទប់ស្កាត់ឡើយ។
ប្រភពពីពលរដ្ឋបានឲ្យដឹងថា បឹងអភិរក្សនោះ គឺមានទំហំ២០០០ម៉ែត្រ គុណនឹង៣០០០ម៉ែត្រ ស្មើនឹងផ្ទៃដីទំហំជាង៥ហិកតាកន្លះឯណោះ។ បឹងនេះ ស្ថិតក្រោមការគ្រប់គ្រង ដោយសហគមន៍អភិរក្ស និងអង្គការអភិរក្សមួយចំនួនផងដែរ។
ប្រភពបន្តថា គេបានសង្កេតឃើញលោកប្រធានសហគមន៍ក្នុងដែនអភិរក្សខាងលើ បានលួចបូមត្រីក្នុងបឹងនោះ បើទោះជាមាន ការជួយធ្វើអន្តរាគមន៍ពីអង្គការនានាប្រចាំនៅទីនោះក៏ដោយ ក៏លោកប្រធានសហគមន៍អភិរក្សនោះមិនស្តាប់ដែរ។
ប្រភពបានបន្តទៀតថា ដីបាតបឹងនោះ គេលក់ក្នុងមួយរថយន្តតម្លៃ២៥០០០រៀលឯណោះ។ នេះគឺជាការបំផ្លាញធនធានមច្ឆជាតិទាំងស្រុង ហើយមិនគួរមន្ត្រីជំនាញ និងអាជ្ញាធរលួចឃុបឃិតគ្នាបំផ្លាញបឹងអភិរក្សបែបនេះសោះ។
ទាក់ទិននឹងករណីខាងលើនេះ កម្ពុជាថ្មីបានទៅដល់កន្លែងកើតហេតុ ហើយលោកសៀនប្រធានសហគមន៍អភិរក្សខាងលើនោះបានបំភ្លឺថា លោកបានឯកភាពគ្នាជាមួយថ្នាក់ដឹកនាំសំខាន់ៗអស់ហើយ ពីភូមិដល់ខេត្ត ក្នុងនោះក៏មានមន្ត្រីជលផលចូលរួមទៀតផង ដើម្បីស្តារបឹងអភិរក្សសត្វត្រីនេះ។
លោកបានបន្តថា លោកបានកាយយកអាចម៍ដី ក្នុងបឹងទៅលក់ជូនប្រជាពលរដ្ឋជាង១០០គ្រួសារឯណោះ ដោយក្នុង១ឡានតម្លៃ ២៥០០០រៀល ក្នុងនោះ១៥០០០រៀល លោកឲ្យប្រជាពលរដ្ឋ ដែលទិញអាចម៍ដីនោះសងថ្លៃរថយន្ត និងត្រាក់ទ័រ ឯ១០០០០រៀលទៀតគឺលោក មិនបានយកពីពលរដ្ឋទេ ដោយយល់ថាប្រជាពលរដ្ឋក្រីក្រ។ លោកបានបន្តទៀតថា លោកត្រូវឲ្យកាយដីបាតបឹងនោះចំនួន១០០០ឡាន ស្មើនឹងតម្លៃ ១០លានរៀន ឯណោះ។ តែអ្វី ដែលលោកកំពុងធ្វើនោះគឺ ពុំមានក្រដាសស្នាមអនុញ្ញាតពីថ្នាក់លើណាឲ្យធ្វើនោះទេ គឺគ្រាន់តែឯកភាពមាត់ទទេតែប៉ុណ្ណោះ។
លោកសេង ធូ ប្រធានរដ្ឋបាលជលផលស្រុកមង្គលបូរី បានឲ្យដឹងថា គួរតែឲ្យលោកប្រធានសហគមន៍ ធ្វើការអភិវឌ្ឍបឹងនោះចុះ ដើម្បីឲ្យធានាទឹកអុកបានយូរ សម្រាប់អភិរក្សសត្វព្រៃបន្តនៅឆ្នាំក្រោយៗទៀត ប៉ុន្តែរឿងច្បាប់ទម្លាប់ពិតជាគ្មានលិខិតស្នាមបញ្ជាក់ជូននោះទេ ហើយលោកក៏មិនដឹងថាអ្នកណាជាអ្នកអនុញ្ញាតឲ្យប្រធានសហគមន៍នោះធ្វើ ដែរ ចាំលោកស្រាវជ្រាវរឿងនេះតទៅទៀត។
ដោយឡែកលោកឡុង ពុន អភិបាលស្រុកមង្គលបូរី បញ្ជាក់ថា លោកពុំបានដឹងរឿងកាយបាតបឹងនោះទេ ខណៈពេលនេះលោកកំពុងជាប់រវល់ខ្លាំងណាស់ ចាំពេលលោកទំនេរលោកនឹងរៀបរាប់ឲ្យបានច្បាស់ជូនអ្នកកាសែត៕
ចំនួនអ្នកទស្សនា
- ថ្ងៃនេះ271
- ម្សិលមិញ7271
- សប្តាហ៍នេះ19741
- ខែនេះ7551
- ឆ្នាំនេះ990771
- សរុប20218217