លោក ប៉ឹល កុសល អញ្ជើញចែកសៀវភៅគ្រួសារ និងអត្តសញ្ញាណ ជូនពលរដ្ឋ១៨៣នាក់
17-May-2016 | ដោយ មែន កំសត់
ភ្នំពេញ ៖នៅព្រឹកថ្ងៃទី១៧ ខែឧសភា ឆ្នាំ២០១៦នេះ លោក ប៉ឹល កុសល អភិបាលនៃគណៈអភិបាលខណ្ឌសែនសុខបានអញ្ជើញចុះមកចែកសៀវភៅស្នាក់នៅ និងអត្តសញ្ញាណប័ណ្ណ ជូនប្រជាពលរដ្ឋចំនួន១៨៣នាក់ នៅក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ដោយមានការចូលរួមហែហមអមដំណើរដោយលោកអភិបាលរង លោកចៅសង្កាត់ នាយប៉ុស្តិ៍ អាវុធហត្ថនិងមន្ត្រីសាលាខណ្ឌ សង្កាត់ មេភូមិ ជាច្រើនរូបទៀត។
ថ្លែងទៅកាន់ប្រជាពលរដ្ឋ ដោយការសំណេះសំណាល សួរសុខទុក្ខ និងបង្កើនការទំនាក់ទំនងនៅក្នុងពិធីនោះ លោក ប៉ឹល កុសល អភិបាលខណ្ឌបានមានប្រសាសន៍ថា មនុស្សគ្រប់រូបក្នុងសម័យនេះ ចាំបាច់ណាស់ ត្រូវមានលេខសំគាល់ខ្លួន ឬឯកសារសំគាល់ខ្លួនតាំងពីកើត រហូតដល់ស្លាប់ ដែលឯកសារទាំងនោះ រួមមាន៤ប្រភេទដូចជា – ១/ សំបុត្រកំណើត ឬលិខិតអត្រានុកូលដ្ឋាន ,២/ លិខិតអាពាហ៍ពិពាហ៍, ៣/ លិខិតមរណភាព , ៤/ សៀវភៅស្នាក់នៅ និងអត្តសញ្ញាណប័ណ្ណសំគាល់ខ្លួន។
លោកអភិបាលបានបញ្ជាក់ថា អត្តសញ្ញាណប័ណ្ណ គឺជាលេខសំគាល់ខ្លួនរបស់យើង ដូចយានយន្តដែរ ហើយអត្តសញ្ញាណប័ណ្ណស៊េរីថ្មីនេះគឺវាទំនើបណាស់ លេខក្នុងអត្តសញ្ញាណប័ណ្ណគឺជាលេខសំគាល់របស់យើងម្នាក់ ហើយក្នុងលេខកូដអត្តសញ្ញាណប័ណ្ណនោះ វាបានកត់ត្រាឯកសារជីវប្រវត្តិរស់នៅរបស់យើងទាំងអស់។ យើងចង់រកស៊ី ប្រកបការងារអ្វីមួយ ឬធ្វើដំណើរទៅប្រទេសក្រៅ និងកិច្ចការធំៗផ្សេងៗ ជាពិសេសក្នុងពេលបោះឆ្នោតជាតិ ដើម្បីសម្រេចវាសនាអនាគតនៃប្រទេសជាតិយើង បើគ្មានអត្តសញ្ញាណប័ណ្ណគឺមិនអាចបោះឆ្នោតបានឡើយ ពោលគឺបើគ្មានអត្តសញ្ញាណប័ណ្ណសំគាល់ខ្លួន មិនអាចធ្វើអ្វីបាននោះទេ គេមិនទទួលស្គាល់យើងឡើយ។ លោកអភិបាលបានអំពាវនាវឲ្យប្រជាពលរដ្ឋទាំងអស់ ជួយផ្សព្វផ្សាយឲ្យរូតរះ មកធ្វើអត្តសញ្ញាណប័ណ្ណសំគាល់ខ្លួនជាសញ្ជាតិខ្មែរ។
ក្រៅពីការសំណេះសំណាលពន្យល់ឲ្យប្រជាពលរដ្ឋយល់ដឹងអំពីផលប្រយោជន៍ តម្លៃនៃអត្តសញ្ញាណប័ណ្ណរួចមក លោកអភិបាល ក៏បានព្រមានដល់លោកចៅសង្កាត់ និងលោកមេភូមិ ទាំងអស់ មេត្តាចេះយកចិត្តទុកដាក់ ចំពោះប្រជាជនក្នុងមូលដ្ឋានធ្វើការ បម្រើ ទំនាក់ទំនងល្អ ជាមួយពួកគាត់ ត្រូវចេះសំពះគោរពពួកគាត់ ព្រោះប្រជាជន ជាម្ចាស់ឆ្នោតរបស់អស់លោក នាពេលកន្លងមក។
លោក សឿន សួ ចៅសង្កាត់ក្រាំងធ្នង់បានឡើងរាយការណ៍ជូនគណៈអធិបតីក្នុងពិធីនោះថា កន្លងមកមានប្រជាជនចំនួន៥៩០៩នាក់ បានទទួលអត្តសញ្ញាណប័ណ្ណ ហើយបូករួមទាំងពេលនេះចំនួន១៨៣នាក់ទៀត សរុបកើនដល់ចំនួន ៦០៩៣នាក់។ លោកបានបន្តថា នៅមានប្រជាជន ដែលអាយុគ្រប់គ្រាន់ ត្រូវធ្វើអត្តសញ្ញាណប័ណ្ណចំនួន ១៧៧២នាក់ទៀត ដែលមិនទាន់បានចុះឈ្មោះធ្វើ។
ក្រោយពីបញ្ចប់ការចែកសៀវភៅស្នាក់នៅ និងសៀវភៅគ្រួសារ ជូនប្រជាពលរដ្ឋនៅសង្កាត់ក្រាំងធ្នង់ លោកអភិបាល បានអញ្ជើញត្រួតពិនិត្យមើលផ្លូវ ដែលមានបញ្ហារំលោភបំពាន ត្រូវរកវិធីដោះស្រាយ និងការពិនិត្យមើលផ្លូវ ដែលកំពុងស្ថាបនា និងដាក់ប្រព័ន្ធលូថ្មីទៀត នៅក្នុងសង្កាត់ភ្នំពេញថ្មី៕
ចំនួនអ្នកទស្សនា
- ថ្ងៃនេះ7061
- ម្សិលមិញ2931
- សប្តាហ៍នេះ19251
- ខែនេះ7061
- ឆ្នាំនេះ990281
- សរុប20217727