ប្រជាពលរដ្ឋរិះគន់អាជ្ញាធរ ខណ្ឌចំការមន គ្រប់គ្រងសំរាមមិនបានល្អ
23-May-2016 | ដោយ មែន កំសត់
ភ្នំពេញ ៖ ប្រជាពលរដ្ឋ ដែលរស់នៅក្នុងខណ្ឌចំការមន រាជធានីភ្នំពេញ នៅថ្ងៃទី២៣ ខែឧសភា នេះ បានរិះគន់អាជ្ញាធរ ខណ្ឌចំការមន និងក្រុមហ៊ុនស៊ិនទ្រីថា មិនបានប្រមូលសំរាមអោយបានល្អ និងគ្រប់គ្រង សំរាមអោយបានត្រឹមត្រូវ តែអាជ្ញាធរ និងក្រុមហ៊ុនចោទវិញថា ប្រជាពលរដ្ឋមិនបានដាក់ទុកដាក់ វិច ខ្ចប់ មិនបានល្អ និងបោះចោលពាលកាល ។
ប្រជាពលរដ្ឋនៅតាមមូលដ្ឋានខណ្ឌចំការមន រាជធានីភ្នំពេញ បានរិះគន់អាជ្ញាធរ ពិសេសសាលាខណ្ឌ អភិបាលខណ្ឌ លោក អ៊ុង សំខាន់ និងក្រុមហ៊ុនប្រមូល សំរាមមិនមានចំណាត់បានប្រមូលសំរាមនៅតាមមាត់លូ បឹងត្របែកខណ្ឌចំការមនមិនបានល្អដែលបណ្តាលអោយមានក្លិនស្អុយ ខូចបរិស្ថាន និងប៉ះពាល់សុខភាពប្រជាពលរដ្ឋដែលនៅតាមតំបន់នោះ ជាពិសេសគឺនៅពេលភ្លៀងធ្លាក់ម្តងៗបានធ្វើអោយសំរាមអណ្ដែតមកលើផ្លូវ សាធារណៈ។
ប្រជាពលរដ្ឋទាំង នោះបានលើកឡើងថា កន្លងមកអាជ្ញាធរមិនដែលបានណែនាំពន្យល់ប្រជាពលរដ្ឋអោយយល់ដឹងពីការ ទុកដាក់សំរាមក៏ដូចជាអោយមានអនាម័យល្អ ជាពិសេសខាងក្រុមហ៊ុនក៏មិនបានមកប្រមូលទាន់ពេលវេលាដែលធ្វើអោយ សំរាមរាយប៉ាយទាំងនៅក្នុងទឹក និងនៅលើដី និងខូចសណ្ដាប់ធ្នាប់ សោភណភាព ទីក្រុងភ្នំពេញ ព្រមទាំងសុខភាពរបស់ប្រជាពលរដ្ឋ។
បុគ្គលិកស៊ិនទ្រី លោក ប្រឹង ម៉ុត បានលើកឡើងថា បើទោះបីក្រុមរបស់លោកប្រឹងប្រែខិតខំប្រមូលសំរាមនៅតាមផ្ទះរបស់ ប្រជាពលរដ្ឋយ៉ាងណាក៏ដោយ លោកសង្កេតឃើញប្រជាពលរដ្ឋមួយចំនួនមិនបានវេចខ្ចប់ សំរាមអោយបានត្រឹមត្រូវនោះទេ ហើយថែមទាំងបោះសំរាមចូលលូទៀតផង ដែលពិបាកដល់ក្រុមការងាររបស់លោកក្នុងការប្រមូលសំរាមឲ្យបានស្អាត នោះទេ។
ករណីនេះ លោក ប៊ុន សុភ័ក្រ អភិបាលរងខណ្ឌចំការមន បានអោយដឹងថា ដោយមើលឃើញពីការយល់ដឹងនៃការវិចខ្ចប់សំរាមរបស់ប្រជាពលរដ្ឋមិនបាន ល្អនោះ អាជ្ញាធររាជធានីភ្នំពេញបានចុះកិច្ចព្រមព្រៀងជាមួយក្រុមហ៊ុនសិន ទ្រី ដើរប្រមូលសំរាមអនាធិបតេយ្យ និងមានក្រុមចុះណែនាំប្រជាពលរដ្ឋអោយមានការវិចខ្ចប់អោយបាន ត្រឹមត្រូវ និងបញ្ចេញសំរាមអោយបានទាន់ពេលវេលាទៀតផង។លោកក៏បានសំណូមពរឲ្យ ប្រជាពលរដ្ឋជួយវេចខ្ចប់សំរាម ឲ្យបានស្អាត និងទុកដាក់ឲ្យបានត្រឹមត្រូវ។សូមបញ្ជាក់ថា ក្នុងមួយថ្ងៃៗ ក្រុមហ៊ុន ស៊ីនទ្រី បានប្រមូលសំរាមពីការប្រើប្រាស់របស់ប្រជាពលរដ្ឋប្រមាណជាង ១ពាន់ ៨រយតោន ក្នុងរាជធានីភ្នំពេញ៕
ប្រភព៖BAYON TV
ចំនួនអ្នកទស្សនា
- ថ្ងៃនេះ5921
- ម្សិលមិញ2931
- សប្តាហ៍នេះ18111
- ខែនេះ5921
- ឆ្នាំនេះ989141
- សរុប20216587