ឯកឧត្តម ឃួន ស្រេង ថា មេបក្សដែលតវ៉ាឲ្យដោះលែងមន្ត្រីអាដហុកនិងគ.ជ.ប មិនយល់ពីច្បាប់
27-May-2016 | ដោយ មែន កំសត់
ភ្នំពេញ ៖ អភិបាលរងរាជធានីភ្នំពេញឯកឧត្តម ឃួង ស្រេង បានលើកជាចម្ងល់បែបសើចចំអកឲ្យប្រធានបក្សនយោបាយថ្មីមួយចំនួន ដែលចេញមុខទាមទារឲ្យដោះលែងមន្ត្រីអាដហុកនិងមន្ត្រីគ.ជ.ប ថាមិនយល់ពីច្បាប់ និងការបែងចែកអំណាចរវាងស្ថាប័នកំពូលទាំងបី ឬយ៉ាងណា? លោកថា សំណុំរឿងរបស់មន្ត្រីអាដហុកនិងមន្ត្រីគ.ជ.ប ស្ថិតនៅក្រោមអំណាចរបស់តុលាការ ដូច្នេះស្ថាប័នផ្សេងមិនអាចលូកដៃចូលបានទេ។
អភិបាលរង រាជធានីភ្នំពេញ ឯកឧត្តម ឃួង ស្រេង បានចាត់ទុកការចេញមុខទាមទារឲ្យដោះលែងមន្ត្រីអាដហុកនិងមន្ត្រីគ.ជ .ប ពីសំណាក់ប្រធានគណបក្សក្រៅរដ្ឋសភា ថាមិនសមស្របទៅនឹងរដ្ឋធម្មនុញ្ញ ដែលផ្តល់អំណាចដាច់ដោយឡែកពីគ្នារវាងអង្គការនីតិបញ្ញត្តិ អង្គការនីតិប្រតិបត្តិ និងអង្គការនីតិវិនិច្ឆ័យ។
ឯកឧត្តមលើកឡើង ថា “ក្នុងកាលៈទេសៈនេះ រឿងក្តីរបស់ជនជាប់ចោទទាំង៥រូប កំពុងស្ថិតក្នុងចំណាត់ការរបស់តុលាការនៅឡើយ ដូច្នេះមិនមានបុគ្គលណាមួយ មានសិទ្ធិជ្រៀតជ្រែកចូលក្នុងកិច្ចការនេះបានទេ។
ម្យ៉ាងទៀត ឯកឧត្តម ឃួង ស្រេង យល់ថា ការតវ៉ាឲ្យដោះលែងជនជាប់ចោទទាំង៥នាក់ ដែលតុលាការកំពុងបន្តនីតិវិធីដូច្នេះ គឺបានន័យថា គាំទ្រឲ្យមាននិទណ្ឌភាពនៅកម្ពុជា។ លោកបកស្រាយថា មានតែនាយករដ្ឋមន្ត្រីម្នាក់គត់ ដែលមានសិទ្ធិស្នើទៅកាន់ព្រះមហាក្សត្រ ដើម្បីប្រទានការលើកលែងទោសឲ្យទណ្ឌិត។ តែឯកឧត្តមបន្ថែមថា ការដែលនាយករដ្ឋមន្ត្រី អាចស្នើទៅព្រះមហាក្សត្របាន លុះត្រាតែតុលាការសម្រេចចេញសាលក្រមស្ថាពរជាមុនសិន។
ថ្លែង ប្រាប់សារព័ត៌មានក្នុងស្រុកមួយ លោកអភិបាលរងរូបនេះ បានលើកជាចម្ងល់របស់ខ្លួនដូច្នេះថា “ខ្ញុំចេះតែឆ្ងល់ថា ហេតុអ្វីបានជាប្រធានបក្សទាំងនោះ ចេញមុខស្នើទៅព្រះមហាក្សត្រ? មានតែនាយករដ្ឋមន្ត្រីទេ ទើបអាចស្នើបាន។ ពួកគាត់ មិនយល់ពីច្បាប់ឬយ៉ាងម៉េច?”
ការលើកឡើងរបស់មន្ដ្រី អ្នកនាំពាក្យរូបនេះ ទំនងជាឆ្លើយតបនឹងលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ លោក ពេជ្រ ស្រស់ ប្រធានគណបក្សយុវជនកម្ពុជានិងប្រធានគណបក្សយុត្តិធម៌ជាតិខ្មែរ លោកបណ្ឌិត ហ៊ាង ឫទ្ធី ដែលមានបំណងទាមទាមឲ្យដោះលែងមន្ត្រីអាដហុកនិងមន្ត្រីគ.ជ.ប។
គួររំលឹកថា លោក ម៉ម សូណង់ដូ បានដាក់លិខិតទៅកាន់សាលារាជធានីភ្នំពេញ ដើម្បីសុំធ្វើបាតុកម្ម នៅថ្ងៃទី៩ កក្កដា ឆ្នាំ២០១៦ ខាងមុខ ក្នុងគោលបំណងសុំឲ្យដោះលែងអ្នកទាំង៥រូប។ រីឯ លោក ពេជ្រ ស្រស់ បានស្នើសុំសាលារាជធានីភ្នំពេញ ដើម្បីដង្ហែញត្តិថ្វាយព្រះមហាក្សត្រ នៅថ្ងៃទី៣០ ខែឧសភា ដើម្បីសុំព្រះរាជអន្តរាគមន៍ ជុំវិញការឃុំខ្លួនមន្ត្រីអាដហុកនិងមន្ត្រីគ.ជ.ប។
ប្រធានគណបក្សយុវជនកម្ពុជា លោក ពេជ្រ ស្រស់ មិនកើតក្តីសៅហ្មងឬទោមនស្ស នឹងការលើកឡើងរបស់លោក ឃួង ស្រេង ឡើយ ដោយប្រធានបក្សវ័យក្មេងរូបនេះ ចាក់ទុកថា ជាសិទ្ធិបញ្ចេញមតិរបស់បុគ្គលម្នាក់ៗ ៕
ចំនួនអ្នកទស្សនា
- ថ្ងៃនេះ6061
- ម្សិលមិញ2931
- សប្តាហ៍នេះ18251
- ខែនេះ6061
- ឆ្នាំនេះ989281
- សរុប20216727