អនុសាខាកាកបាទក្រហមខណ្ឌ៧មករា នាំអំណោយចែកជូនគ្រួសារទីទ័លក្រ៥៤គ្រួសារ
02-June-2016 | ដោយ មែន កំសត់
ភ្នំពេញ៖ អំណោយជាសំភារៈ ស្បៀងអាហារ និងថវិកា បានមកពីការជួយឧបត្ថម្ភ ពីព្រះសង្ឃ សប្បុរសជននានា តាមរយៈកាកបាទក្រហមកម្ពុជា ត្រូវបានអនុសាខាកាកបាទក្រហមខណ្ឌ ៧មករា នាំយកទៅចែកជូនប្រជាពលរដ្ឋទីទ័លក្រ ចំនួន ៥៤គ្រួសារ មកពីសង្កាត់វាលវង្ស,បឹងព្រលិត និងសង្កាត់មនោរម្យ ។
ការនាំយកអំណោយចែកជូន នៅរសៀលថ្ងៃទី៣១មិថុនា នៅវត្តថ្វាយដង្គុំ ក៏ដូចជាពេលកន្លងមកជាកាយវិការសប្បុរសធម៌ ដ៏ប្រពៃដែលកាកបាទក្រហមកម្ពុជា ក្រោមការដឹកនាំរបស់សម្តេច កិត្តិព្រឹទ្ធបណ្ឌិត ប៊ុនរ៉ានី ហ៊ុន សែន តែងតែផ្តោតការយកចិត្តទុកដាក់គិតគូអំពីសុខទុក្ខជីវភាពរស់នៅរបស់ ប្រជាពលរដ្ឋទីទ័លក្រ និងរងគ្រោះដោយប្រការផ្សេងៗនៅគ្រប់ទីកន្លែង មិនថា នៅទីក្រុង ឬជនបទដាច់ស្រយាល។
អំណោយចែកជូននៅពេលនេះ គ្រួសារនីមួយៗ ទទួលបានអង្ករ, មី,ត្រីខ,និងឃីត១កញ្ចប់ រួមមានក្រមា មុង ភួយ។ ព្រមជាមួយនេះ ព្រះគ្រូចៅអធិការវត្តថ្វាយដង្គុំ ,វត្តសំពៅមាស,និងវត្តព្រះពុទ្ធមានបុណ្យ ក៏បានចូលរួមផ្តល់អំណោយបន្ថែម មានអង្ករ ឃីត ,មី,ត្រីខ,ទឹកក្រូច,ទឹកដោះគោ,តែ ,ស្កសរ,និងថវិកាដល់គ្រួសារនីមួយៗចំនួន ២៥,០០០រៀលនិងបានចែកជូនសីលវ័ន សីលវត្តី ចំនួន២៧នាក់ ម្នាក់ៗទទួលបានឃីត១កញ្ចប់ និងថវិកា ២៥.០០០រៀល។
លោក លឹម សុភា ប្រធានកិត្តិយស អនុសាខា កាកបាទក្រហមខណ្ឌ និងជាអភិបាលខណ្ឌ៧មករា បានថ្លែងអាណិតអាសូរ ចំពោះបងប្អូនប្រជាពលរដ្ឋទីទ័លក្រដែលកំពុងជួបការលំបាកខ្វះខាត។ លោកបន្តថា អំណោយដែលនាំមកចែកជូននៅពេលនេះ ទោះបី មានចំនួនតិចតួច មិនអាចដោះស្រាយឆ្លើយតបនឹងកង្វះខាត នៃសេចក្តីត្រូវការជាច្រើនក៏ពិតមែន ប៉ុន្តែ បានជួយសម្រាលនូវការលំបាកចំពោះមុខបានមួយគ្រាផងដែរ។
ទោះជាយ៉ាងណាក៏ដោយ លោកអភិបាលខណ្ឌ បានលើកទឹកចិត្តឱ្យបងប្អូនខិតខំក្នុងការរកទទួលទានជាបន្តទៀត។
លោកបាន លើកឡើងអំពីការយកចិត្តទុកដាក់របស់ថ្នាក់ដឹកនាំរាជរដ្ឋាភិបាល និងកាកបាទក្រហមកម្ពុជា ដែលជានិច្ចកាលតែងតែគិតគូអំពីសុខទុក្ខជីវភាពរស់នៅនិងការអភិវឌ្ឍន៍ លើគ្រប់វិស័យ ដើម្បីកាត់បន្ថយភាពក្រីក្រ របស់បងប្អូន ប្រជាពលរដ្ឋយើង ជាពិសេសបងប្អូនប្រជាពលរដ្ឋទីទ័លក្រ រងគ្រោះនិងងាយរងគ្រោះផ្សេងៗ ដោយមិនមានការអើសអើង ប្រកាន់និន្នាការនយោបាយ ព័ណ៌សម្បុរ ឬជាតិសាសន៍អ្វីឡើយ។ លោកអភិបាល បានផ្តាំផ្ញើសូមឱ្យមានការយកចិត្តទុកដាក់គិតគូរអំពីបញ្ហាអនាម័យ បរិស្ថាន និងថែទាំសុខភាពឱ្យបានល្អ៕
ចំនួនអ្នកទស្សនា
- ថ្ងៃនេះ5161
- ម្សិលមិញ2931
- សប្តាហ៍នេះ17351
- ខែនេះ5161
- ឆ្នាំនេះ988381
- សរុប20215827