អភិបាលខេត្តកណ្ដាល ស្នើដល់ក្រុមយុវជនកាយរឹទ្ធិបន្តចូលរួមអប់រំក្រៅប្រព័ន្ធ ជួយដល់យុវជនផ្សេងទៀត
08-June-2016 | ដោយ មែន កំសត់
កណ្ដាល៖ អភិបាលខេត្តកណ្តាលនិងជាប្រធានក្រុមប្រឹក្សាកាយរឹទ្ធិជាតិកម្ពុជាខេត្តកណ្ដាល បានស្នើដល់ក្រុមយុវជនកាយរឹទ្ធិរបស់ខ្លួនឲ្យបន្តចូលក្នុងសកម្មភាពអប់រំក្រៅប្រព័ន្ធឲ្យបានខ្លាំងថែមទៀត ដើម្បីជួយដល់យុវជនផ្សេងទៀតដែលកំពុងដើរផ្លូវខុស។
ឯកឧត្តម ម៉ៅ ភិរុណ បានឡើងដូចនេះ ក្នុងពិធីផ្សព្វផ្សាយលទ្ធផលមហាសន្និបាតកាយរឹទ្ធិជាតិកម្ពុជាលើកទី៣ដែលធ្វើនៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល នាថ្ងៃទី៧មិថុនានេះ។ ឯកឧត្តមបន្តថា យុវជនមួយកំពុងតែដើរខុសផ្លូវ ដូចជាអ្នកខ្លះញៀនថ្នាំ សេពគ្រឿងស្រវឹងអ្នកខ្លះប្រព្រឹត្តិអំពើឆក់ប្លន់និងអ្នកខ្លះទៀត នោះបានប្រព្រឹត្តិនូវអំពើអនាចារថែមទៀតផង ដែលទាមទារឲ្យមានអ្នកអប់រំបន្ថែមឲ្យក្លាយជាយុវជនល្អវិញ។
ឯកឧត្តម ម៉ៅ ភិរុណ បានបន្តទៀតថា ដើម្បីនាំយុវជនដែលដើរខុសផ្លូវទាំងអស់នោះ ឲ្យមកជាយុវជនល្អវិញបានលុះត្រាណាយុវជនកាយរឹទ្ធិទាំងអស់ចូលរួមធ្វើសកម្មភាពអប់រំក្រៅប្រព័ន្ធឲ្យបានខ្លាំងថែមទៀតព្រោះថាតាមរយៈសកម្មភាពនេះមានសារៈសំខាន់ក្នុងសង្គម។
ឯកឧត្តមបន្ថែមថា យុវជនកាយរឹទ្ធិគប្បីមានការរៀបចំចងក្រងប្រព័ន្ធល្បាត និងកងឯកភាពតាមលក្ខណៈបច្ចេកទេសក្នុងជួរយុវជនដោយបំផុសសកម្មភាពស្ម័គ្រចិត្ត ការពង្រីកសកម្មភាព ការធ្វើអំពើល្អនិងការអប់រំសីលធម៌ទន្ទឹមនឹងនេះ ក៏ត្រូវជំរុញឲ្យសមាជិកកាយរឹទ្ធិគ្រប់ៗរូបចូលរួមចំណែកឲ្យកាន់តែសកម្មក្នុងការកាត់បន្ថយអំពើអសកម្មនានានានៅក្នុងសង្គម។
យោងតាមរបាយការណ៍សកម្មភាពកាយរឹទ្ធិកម្ពុជាខេត្តកណ្ដាលបានឲ្យដឹងថា ចាប់ពីថ្ងៃបង្កើតសមាគមកាយរឹទ្ធិជាតិកម្ពុជាខេត្តកណ្ដាលនាខែធ្នូឆ្នាំ២០០៤មកពីមួយឆ្នាំទៅមួយឆ្នាំសកម្មភាពកាយរឹទ្ធិរបស់ខេត្តកណ្ដាល គឺមានការវិវឌ្ឍន៍ និងប្រែប្រួលជាបន្តបន្ទាប់ ពោល គឺកាយរឹទ្ធិមានចាប់ពីថ្នាក់ខេត្តរហូតដល់សាលារៀន។
គិតមកដល់បច្ចុប្បន្ននេះ នៅខេត្តកណ្ដាលមានកាយរឹទ្ធិសរុបចំនួន១៧,១២៣នាក់។ នៅក្នុងរបាយការណ៍ដដែលនេះបានឲ្យដឹងថា យោងតាមតម្រូវការនិងឲ្យកាន់តែមានកម្លាំងគ្រប់គ្រាន់ក៏ដូចសមត្ថភាពសម្រាប់បំពេញនិងចូលរួមបានគ្រប់សកម្មភាពសង្គមនោះ ចាំបាច់ត្រូវពង្រីកសមាជិកកាយរឹទ្ធិឲ្យបាន៥,៥០០ផងដែរ៕
ចំនួនអ្នកទស្សនា
- ថ្ងៃនេះ4621
- ម្សិលមិញ2931
- សប្តាហ៍នេះ16811
- ខែនេះ4621
- ឆ្នាំនេះ987841
- សរុប20215287