លោកនុត ពុធដារ៉ា ប្រកាសបន្តផ្តល់ប្រាក់រង្វាន់ លើកទឹកចិត្តដល់កងកម្លាំងប្រដាប់អាវុធដែលបង្ក្រាបបទល្មើសក្នុងមូលដ្ឋាន
24-June-2016 | ដោយ មែន កំសត់
ភ្នំពេញ៖ នៅព្រឹកថ្ងៃទី២៤ ខែមិថុនា ឆ្នាំ២០១៦នេះ លោក នុត ពុធដារ៉ា ប្រធានគណៈបញ្ជាការឯកភាពរដ្ឋបាលខណ្ឌដង្កោ បានប្រកាសបន្តផ្តល់ប្រាក់រង្វាន់ លើកទឹកចិត្តដល់កងកម្លាំងទាំងអស់ ដែលមានស្នាដៃក្នុងការបង្ក្រាបបានបទល្មើស នៅក្នុងមូលដ្ឋានខណ្ឌដង្កោនា កិច្ចប្រជុំប្រចាំខែរបស់ គណៈបញ្ជាការឯកភាពរដ្ឋបាលខណ្ឌដង្កោ ដោយមានការចូលរួមពីលោកអភិបាលរង អធិការនគរបាលខណ្ឌ មេបញ្ជាការរងកងរាជអាវុធហត្ថខណ្ឌ ការិយាល័យចំណុះជំនាញនានា ចៅសង្កាត់ ស្មៀន មេភូមិ និងលោក លោកស្រី ជានាយកសាលា ទាំងអស់ ក្នុងខណ្ឌជាច្រើននាក់ផងដែរ។
នៅក្នុងកិច្ចប្រជុំនេះ លោក នុត ពុធដារ៉ា បានប្រកាសបន្តផ្តល់ប្រាក់រង្វាន់លើកទឹកចិត្តដល់កងកម្លាំងទាំងអស់ ដែលមានស្នាដៃក្នុងការបង្ក្រាបបទល្មើស នៅក្នុងមូលដ្ឋានខណ្ឌដង្កោ ដើម្បីលើកទឹកចិត្តដល់កងកម្លាំងទាំងអស់ដែលព្យាយាម យកអស់កម្លាំងកាយចិត្ត ពេលវេលា និងស្មារតី ខិតខំព្យាយាមបង្ក្រាបបទល្មើសដែលកើតមានក្នុងមូលដ្ឋាន។ ក្នុងឱកាសនោះ លោក នុត ពុធដារ៉ា ក៏បានណែនាំអំពីការងារសំខាន់ៗមួយចំនួន ដើម្បីឲ្យអង្គប្រជុំអនុវត្ត៖
- សូមឲ្យអាជ្ញាធរ ភូមិ សង្កាត់ ប៉ុស្តិ៍ អធិការដ្ឋាននគរបាលខណ្ឌ មូលដ្ឋានកងរាជអាវុធហត្ថខណ្ឌ និងមូលដ្ឋានកងរាជអាវុធហត្ថខណ្ឌ រួមគ្នាលុបបំបាត់ឲ្យបាននូវរាល់បញ្ហាល្បែងស៊ីសងនានា ក្នុងមូលដ្ឋាន កុំឲ្យកើតមាន និងទប់ស្កាត់បទល្មើសគ្រឿងញៀន ឲ្យបានតឹងរ៉ឹង តាមគ្រប់រូបភាព ទាំងការចែកចាយ និងការប្រើប្រាស់គ្រឿងញៀន។
- ពង្រឹងការអនុវត្តគោលនយោបាយភូមិសង្កាត់ មានសុវត្ថិភាព ទាំង៩ចំណុច និងការធ្វើវេទិកាសាធារណៈឲ្យបានទៀងទាត់ ដើម្បីទទួលយកសំណើសំណួរ និងសំណូមពររបស់ប្រជាពលរដ្ឋយកមកដោះស្រាយបានទាន់ពេលវេលា។
- យកចិត្តទុកដាក់បម្រើសេវារដ្ឋបាលជូនប្រជាពលរដ្ឋ ឲ្យបាន លឿន និងមានតម្លាភាព។
- បន្តយកចិត្តទុកដាក់ក្នុងការស្រង់ស្ថិតិប្រជាពលរដ្ឋ នៅតាមភូមិ សង្កាត់ឲ្យបានឆាប់រហ័ស។
- បន្តពង្រឹងការអភិវឌ្ឍហេដ្ឋារចនាសម្ព័ន្ធ ផ្លូវ លូ ប្រឡាយ និងអនាម័យបរិស្ថាន នៅមូលដ្ឋាន
ក្នុងឱកាសនោះផងដែរ លោកប្រធានគណៈបញ្ជាការឯកភាពរដ្ឋបាលខណ្ឌ ក៏បានផ្តល់ប្រាក់រង្វាន់លើកទឹកចិត្តជូនដល់អធិការដ្ឋាននគរបាលខណ្ឌ ដែលមានស្នាដៃល្អក្នុងការបង្ក្រាបបទល្មើសចំនួន ០២ករណី ថវិកាចំនួន ១,២០០,០០០រៀល៕
ចំនួនអ្នកទស្សនា
- ថ្ងៃនេះ1781
- ម្សិលមិញ2931
- សប្តាហ៍នេះ13971
- ខែនេះ1781
- ឆ្នាំនេះ985001
- សរុប20212447