ឯកឧត្តម ប៉ា សុជាតិវង្ស៖បើបណ្តោយឲ្យក្រុមហ៊ុន អាយអិនជី ទោះ១០ឆ្នាំទៀតក៏ទៅមិនរួចដែរ
19-July-2016 | ដោយ មែន កំសត់
រាជធានីភ្នំពេញ ៖ឯកឧត្តម ប៉ា សុជាតិវង្ស អភិបាលរាជធានីភ្នំពេញបានលើកឡើងថា ជាការពិតណាស់ ក្រុមហ៊ុន អាយអិនជី ហូលឌីង ខូអិលធីឌី(ING HOLDING Co.Ltd) បានធ្វើកិច្ចការ និងដើរតួរនាទីឈានមុខគេ នៅក្នុងគម្រោងការសិក្សាការដោះស្រាយផលប៉ះពាល់ទាក់ទិនទៅនឹងគម្រោង អភិវឌ្ឍន៍តំបន់បឹងទំពុន និងបឹងជើងឯក តាមការពិតក្រុមហ៊ុននេះមានដីតែមួយផ្នែកក្នុងចំណោមគម្រោងទាំងអស់ ប៉ុន្តែត្រូវបានគេគិតថា ជាគម្រោងផ្តាច់មុខរបស់ក្រុមហ៊ុននេះទៅវិញ។
ឯកឧត្តមបន្តថា អាយអិនជី គ្រាន់តែគ្រប់គ្រងដីមួយចំណែកមិនដល់១ភាគ៣ផង ក្នុងចំណោមដីគម្រោងអភិវឌ្ឍន៍ទាំងអស់នោះ ចាប់ពីពេលនេះទៅ អាយអិនជី មិនមែនជាអ្នកដើរតួនាទីដូចមុនទៀតទេ គឺសាលារាជធានីភ្នំពេញ ជាម្ចាស់គម្រោង និងមានតួនាទីជាអ្នកសម្របសម្រួល ដើម្បីរក្សាឲ្យបាននូវផលប្រយោជន៍សាធារណៈ និងបង្កលក្ខណៈឲ្យភាគីពាក់ពន្ធ័ដែលជាម្ចាស់ដីទទួលបាននូវ ផលប្រយោជន៍បានសមស្រប តែត្រូវគោរពទៅតាមប្លង់ បើមិនកំណត់ឲ្យបានច្បាស់លាស់ទេ វានឹងជះឥទ្ធិពលដល់ការរៀបចំ។
ឯកឧត្តម ប៉ា សុជាតិវង្ស មានប្រសាសន៍ទៀតថា បើគ្រប់គ្នាយល់ឃើញដូចខាងលើនេះ ហើយក្រុមហ៊ុន នៅតែបន្តដឹកនាំនោះ ទោះ១០ឆ្នាំទៀតក៏ទៅមិនរួចដែរ បើញែកបញ្ហានេះមិនច្បាស់ទេ ការងារទៅមុខមិនរួចទេ គឺសាលារាជធានីភ្នំពេញជាម្ចាស់គម្រោង តែអត់ចេញលុយទេ តែក្រុងចេញគោលការណ៍ប្លង់ និងមន្ត្រីសម្រាប់ជួយរៀបចំដោះបញ្ហាប្រឈម ហើយទាំងអស់នេះជាដីរដ្ឋ ដែលរដ្ឋធ្វើលទ្ធកម្ម កម្មសិទ្ធជូនទៅប្រជាជន ហើយអ្នកដែលបានផលប្រយោជន៍គឺម្ចាស់ដី។
ឯកឧត្តម បានបញ្ជាក់ថា ដើម្បីឲ្យការងារអភិវឌ្ឍតំបន់បឹងជើងឯកនេះ អភិវឌ្ឍន៍បានលឿន គ្រប់ភាគីពាក់ព័ន្ធទាំងអស់ត្រូវចូលរួមកំណត់ឲ្យមានការឯកភាពគ្នាពី ទស្សនៈរួម ដឹកនាំឲ្យស្រុះស្រួលគ្នាជាមុនសិនទើបអាចដោះស្រាយបាន ដូច្នេះចាប់ពីពេលនេះទៅ អាជ្ញាធរមូលដ្ឋានត្រូវ ផ្សព្វផ្សាយដល់ប្រជាពលរដ្ឋ ដែលមានដីបឹងស្ថិតនៅក្នុងគម្រោងអភិវឌ្ឍន៏នោះ ត្រូវជំរុញឲ្យពួកគាត់មកចុះបញ្ជីក្បាលលដីឲ្យបានគ្រប់គ្នា ងាយស្រួលអាជ្ញាធរ ផ្ទៀងផ្ទាត់បញ្ជីឲ្យត្រូវគ្នា ទើបជំរុញល្បឿននៃដំណើរការងារអភិវឌ្ឍន៍តំបន់នេះបានលឿន។
ឯកឧត្តមប៉ា សុជាតិវង្ស មានប្រសាសន៍បែបនេះ នៅក្នុងកិច្ចប្រជុំ និងការធ្វើបទបង្ហាញពាក់ពន្ធ័ទៅនឹងលទ្ធផលនៃការងារដោះស្រាយផល ប៉ះពាល់តំបន់អភិវឌ្ឍន៍បឹងជើងឯក នៅសាលារាជធានីភ្នំពេញ នាព្រឹកថ្ងៃទី១៨ កក្កដា ២០១៦។ គួររំលឹកថា កាលពីពេលកន្លងមកនេះ តំណាងក្រុមហ៊ុន អាយអិនជី ហូលឌីងខូអិលធីឌី បានឲ្យដឹងថា ក្រុមហ៊ុនរបស់លោកបានទទួលសិទ្ធិធ្វើការអភិវឌ្ឍន៍បឹងទំពុន និងបឹងជើងឯកឲ្យក្លាយទៅជាទីក្រុងរណប ដែលមានផ្ទៃដីសរុបរួមចំនួន២៥៧២ ហិកតា ក្នុងនោះផ្ទៃដីសំរាប់ការសាងសង់អាគារផ្សេងៗមានចំនួន១៤២៣ហិកតា ស្មើនឹង៥៥,៣១%។
ផ្ទៃដីសម្រាប់បឹងប្រឡាយលំហបៃតង និងសំណង់អាគារសាធារណៈមានចំនួន១១៤៩ហិកតាស្មើនឹង៤៤,៦៧%នៃចំនួន ផ្ទៃដីសរុប និងតម្រូវឲ្យមានការចាក់ដីបំពេញបន្ថែម ចំណែកអ្នកដែលមានដីនៅតំបន់នោះក៏តម្រូវឲ្យបរិច្ចាកដីរបស់ខ្លួន ទៅក្នុងគំរោងអភិវឌ្ឍន៏នោះដែរ។ តំណាងក្រុមហ៊ុន បានបញ្ជាក់ថា ក្នុងតំបន់អភិវឌ្ឍន៍ទីក្រុងរណបនោះ មានផ្លូវសរុបចំនួន៦១ខ្សែ ក្នុងនោះមានមហាវិថីធំៗចំនួន២ គឺមហាវិថីសម្តេចតេជោហ៊ុនសែន និងមហាវិថីអ្នកឧកញ៉ាមហាភក្តីហ៊ុននាង ដែលមានទទឹង៦០ម៉ែត្រ និងបណ្តោយជាង៩គីឡូម៉ែត្រ ហើយការអភិវឌ្ឍន៍ប្រពន្ធ័ហេដ្ឋារចនាសម្ពន្ធ័រួមមានប្រពន្ធ័ ផ្លូវថ្នល់ ប្រឡាយ និងលូជាដើម បាននិងកំពុងចាប់ផ្តើមពីពេលនេះទៅ រហូតដល់ឆ្នាំ២០១៧ ហើយការស្ថាបនាឲ្យរួចរាល់ទាំងស្រុងនៅអំឡុងឆ្នាំ២០៣៥។
ចំពោះផ្ទៃដីដែលក្រុមហ៊ុនទទួលសិទ្ធិអភិវឌ្ឍន៍នោះមានចំនួន២៥៧២ ហិកតា ក្នុងនោះត្រូវចំណាយទៅលើផលប៉ះពាល់នៃមហាវិថី៣ខ្សែចំនួន១៥០ហិ កតា ការសិក្សាគម្រោងអភិវឌ្ឍន៍១ហិកតា ការសាងសង់ច្រាំងបឹងរក្សាទុក១៣,៤៧៥ហិកតា ចំណាយការសាងសង់ច្រាំងប្រឡាយមេ ២ខ្សែ ១៦,៥៩១ហិកតា ការរៀបចំបណ្តាញអគ្គិសនីក្រោមដី៨,៩០០ហិកតា ការរៀបចំតំបន់បៃតង និងសាធារណៈ ២៨១,៧៥ហិកតា ការស្ថាបនាហេដ្ឋារចនាសម្ពន្ធ័៩៥,៧៥ មហាវិថីសម្តេចហ៊ុន សែន៩,១៦ហិកតា មហាវិថីអ្នកឧកញ៉ាមហាភក្តីហ៊ុននាង២,៧៤ហិកតា មហាវិថីកាត់ទទឹង៥,៥២ហិកតា ផ្លូវមេរងមានទទឹង៣៥ម៉ែត្រ៣៤,៩៨ហិកតា ផ្លូវមេរងមានទទឹង២៦ម៉ែត្រ៤៣,៣៤ហិកតា ផ្លូវរងមានទទឹង១៦ម៉ែត្រ០,៣៦ហិកតា ការស្ថាបនាស្ពាននៅមហាវិថីសម្តេចហ៊ុន សែន១៤០,០០ហិកតា ការស្ថាបនាស្ពាននៅមហាវិថីលោកតាហ៊ុន នាង៦០,០០ហិកតា ការស្ថាបនាស្ពាននៅមហាវិថីកាត់ទទឹង៨០,០០ហិកតា ការស្ថាបនាផ្លូវមេរង១៦០,០០ហិកតា ការស្ថាបនាស្ពាននៅផ្លូវទទឹង២៦ម៉ែត្រ ១០០,០០ហិកតា ការសាងសង់បណ្តាញលូទឹកភ្លៀង១៩៨,៤៨៨ហិកតា ការសាងសង់លូជ្រុងកាត់ទទឹងមហាវិថីសម្តេចតេជោ១៨០,០០ហិកតា និងការសាងសង់បណ្តាញលូសំអុយ១៩៥,៩៣៦ហិកតា ដែលមានតំលៃប៉ាន់ស្មានសរុបចំនួន៦៩៦,៤៥៤,០៩៣ ដុល្លាសហរដ្ឋអាមេរិក។
សូមរំលឹកថា ការអភិវឌ្ឍន៍បឹងទំពុន និងបឹងជើងឯកនោះប៉ះពាល់ និងចូលដីខេត្តកណ្តាលចំនួន៣៧៦ហិកតា តាមសេចក្តីជូនដំណឹងរបស់គណៈរដ្ឋមន្ត្រី ឲ្យបញ្ចូលក្រោមការគ្រប់គ្រងរដ្ឋបាលរាជធានីភ្នំពេញ ហើយការងារអភិវឌ្ឍន៍នោះ ត្រូវចាក់ខ្សាច់បំពេញមានចំនួនសរុបចំនួន១៤៦,២២៥,៦៤០ម៉ែត្រគូបផង ដែរ៕
ចំនួនអ្នកទស្សនា
- ថ្ងៃនេះ1561
- ម្សិលមិញ12561
- សប្តាហ៍នេះ29511
- ខែនេះ51391
- ឆ្នាំនេះ51391
- សរុប20493847