អាជ្ញាធរខណ្ឌសែនសុខ ដឹកនាំកម្លាំងចុះមកវាយទម្លុះរបង ដើម្បីស្ថាបនាផ្លូវមួយខ្សែ ជូនបងប្អូនប្រជាពលរដ្ឋ
03-January-2017 | ដោយ ពល បញ្ញា
ភ្នំពេញ: អាជ្ញាធរខណ្ឌសែនសុខ សហការជាមួយមន្ត្រីជំនាញ របស់សាលារាជធានីភ្នំពេញ នៅព្រឹកថ្ងៃទី២ ខែមករា ឆ្នាំ២០១៧ បានសម្រេចដឹកនាំកម្លាំងចុះមកវាយទម្លុះរបង ដើម្បីស្ថាបនាផ្លូវមួយខ្សែ ជូនបងប្អូនប្រជាពលរដ្ឋ ប្រើប្រាស់ បន្ទាប់ពីផ្លូវនេះ ត្រូវបានឧកញ៉ាម្នាក់ធ្វើរបងបិទផ្លូវ ប៉ងរំលោភយកធ្វើ ជាកម្មសិទ្ឋិផ្ទាល់ខ្លួន ទាំងបំពាន អស់រយៈពេលជាច្រើនឆ្នាំ មកហើយ ដោយភាពចំរូងចំរាស់។
ផ្លូវដែលរងការរំលោភបំពាន នឹងត្រូវបានរំដោះបានមកវិញ ពីឧកញ៉ាកំហូចម្នាក់ យកមកកសាងជាផ្លូវបេតុង ជូនប្រជាពលរដ្ឋ ប្រើប្រាស់វិញ នៅពេលនេះ គឺផ្លូវលេខ១៩៧៤ មានទីតាំងភ្ជាប់ពីផ្លូវលេខ១០០៣ ដល់ផ្លូវលេខ៥៩៨ មានទទឹងប្រវែង១០ម៉ែត្រ និងបណ្តោយប្រវែង ៤៦០ម៉ែត្រ ស្ថិតក្នុងភូមិទំនប់ សង្កាត់ភ្នំពេញថ្មី។
លោក ប៉ឹល កុសល អភិបាល នៃគណៈអភិបាល ខណ្ឌសែនសុខ បានមានប្រសាសន៍ថា ការស្នើសុំធ្វើផ្លូវ របស់បងប្អូនប្រជាពលរដ្ឋ រស់នៅសហគមន៍ ភូមិទំនប់ សង្កាត់ភ្នំពេញថ្មី ខណ្ឌសែនសុខ ប្រមាណជាង ១០០ គ្រួសារនេះ គឺតាំងពីមិនទាន់ កកើតខណ្ឌសែនសុខ មកម្ល៉េះ ។
ដោយឡែក សម្រាប់ ខណ្ឌសែនសុខ ទើបតែបង្កើតឡើង ក្នុងអំឡុង ឆ្នាំ២០០៩ ដែលបំបែកចេញពីភូមិសាស្ត្រ ខណ្ឌឫស្សីកែវ ដូច្នេះបងប្អូនតវ៉ា ចង់បានផ្លូវតាំងពីមុននេះ ទៅទៀតមកម្ល៉េះ ដូចដែលយើងទាំងអស់គ្នា បានដឹងហើយថា រាល់ការអភិឌ្ឍន៍អ្វីក៏ដោយ គឺត្រូវមានផលប៉ះពាល់ និងត្រូវដោះស្រាយជាច្រើន ដែលធ្វើឲ្យការស្ថាបនានេះ មានកាយឺតយ៉ាវបន្តិច ប៉ុន្តែទន្ទឹមនិងនេះ អាជ្ញាធរពាក់ព័ន្ធទាំងអស់ បានធ្វើការដោះស្រាយ រួចរាល់អស់ហើយ នៅថ្ងៃនេះ (ថ្ងៃទី២ ខែមករា ឆ្នាំ២០១៧ ) ដោយមានការចូលរួមពីមន្ត្រី អាជ្ញាធរពាក់ព័ន្ធទាំងអស់ ដាក់គ្រឿងចក្រ ឈួសឆាយ និងវាយរបងប៉ះពាល់ មួយកន្លែង ដើម្បីស្ថាបនា ជាផ្លូវនេះ ជូនប្រជាពលរដ្ឋ តាមសំណូមពរ៕
ចំនួនអ្នកទស្សនា
- ថ្ងៃនេះ1251
- ម្សិលមិញ3151
- សប្តាហ៍នេះ31081
- ខែនេះ16471
- ឆ្នាំនេះ16471
- សរុប20458927