ក្រោយពីបានទទួលបានចំណូលជាច្រើន ពីក្រុមហ៊ុនដែលមិនបានចុះបញ្ជីនៅ​ប្រ​ទេស​ចិន​ បាន​ធ្វើ​ឲ្យ​លោ​ក​មហា​សេដ្ឋី​ Wang​ Jianlin​ ក្លាយ​ជា​អ្នក​ជំនួញ​ដ៏ល្បីល្បាញ​មួយរូប​ ទាំងនៅ​ក្នុងស្រុក​ និង​នៅ​ក្រៅស្រុក​។ ជាងនេះ​ទៅទៀត​ ក្រោយ​ពី​ក្រុមហ៊ុន​របស់​លោក​ចំនួនពីរ​ បាន​បោះផ្សាយ​មូលបត្រ​ជា​សាធារណៈ​ជា​លើកដំបូង​ កាល​ពី​មួយ​ឆ្នាំ​កន្លង​ទៅ​ ដែល​រួម​មាន​ក្រុមហ៊ុន​​អចលនទ្រព្យ​ Wanda​ Commercial​ Properties​ និង​ ក្រុមហ៊ុន​​​កម្សាន្ត​ ​Wanda ​​Group​ បាន​ធ្វើ​ឲ្យ​លោក​ផ្លោះ​ពី​សេដ្ឋី​ជាប់​ចំណាត់​ថ្នាក់លេខ ៤​ មក​ជាប់​ចំណាត់​ថ្នាក់​លេខ ១​ ក្នុងឆ្នាំ​ ២០១៥​ នៃ​ចំណោម​មហាសេដ្ឋី​ចិន​ទាំង​ ១០០​រូប​ ដែល​មាន​ជាប់​នៅ​ក្នុង​បញ្ជី។​

ខាងក្រោមនេះ ពាណិជ្ជកម្ម កម្ពុជា នឹងលើកយកប្រវត្តិនៃការតស៊ូ​និង​ការ​អភិវឌ្ឍន៍​ខ្លួន​របស់​លោក​មក​ចែក​ជូន​ប្រិយ​មិត្ត​អ្នក​អាន៖

គេចចេញពីជួរកងទ័ព ងាកមកធ្វើជាអ្នកជំនួញ​

លោក Wang Jianlin កើតក្នុងឆ្នាំ ១៩៥៤ នៅខេត្ត ស៊ីឈួន ប្រទេសចិន ដែលឪពុករបស់លោក​ជា វីរៈបុរសយោធិនដ៏អង់អាចខ្លាហានមួយរូប ​ក្នុងបក្សកម្មុយនិស្តចិន។ ដោយសារតែអំណាចឥទិ្ធពលឪពុករបស់ខ្លួន​ ទើបលោក Wang អាចមានលទ្ធភាពចូលរួមបម្រើការងារ ក្នុងជួរកងទ័ពមួយឈ្មោះថា កងទ័ពរំដោះប្រជាជន (PLA) ដែលពេលនោះលោកស្ថិតក្នុងវ័យ ១៥ឆ្នាំ។ ដោយឈរលើស្មារតីក្តីស្រលាញ់ចង់ ធ្វើជាអ្នកជំនួញ ពីរឆ្នាំក្រោយមកលោក​បានសម្រេចចិត្តថា អនាគតរបស់លោកមិនមែនជាអគ្គមេបញ្ជាការកងទ័ពនោះទេ គឺលោកចង់ធ្វើជាអ្នកជំនួញ។

ឆ្លងកាត់បទពិសោធន៍កាងារកាន់តែច្រើន ជោគជ័យកាន់តែធំ

ក្រោយពីលោកបានបោះបង់ បម្រើកាងារក្នុងជួរកងទ័ព លោក​បានធ្វើការជា មន្រ្តីរដ្ឋបាលម្នាក់នៅស្រុក Xigang នៃក្រុង Dalian។ ក្នុងឆ្នាំ ១៩៨៩ លោកបានក្លាយជាអ្នកគ្រប់គ្រងទូទៅ នៃក្រុមហ៊ុន អភិវឌ្ឍលំនៅឋានស៊ីហ្គាំង។ ក្រោយមកក្នុងឆ្នាំ​ ១៩៩២ លោក​បានបន្ថែមកាងារមួយទៀត គឺលោកធ្វើការឲ្យក្រុមហ៊ុន Dalian Wanda Group ជានាយកគ្រប់គ្រងទូទៅ អស់រយៈពេលជាងមួយឆ្នាំ លោកក៏ត្រូវបានតម្លើងតំណែងជា នាយកប្រតិបត្តិក្នុងឆ្នាំ​ ១៩៩៣។ គួរជម្រាបថា លោក Wang ​Jianlin បានបញ្ចប់ការសិក្សានៅសាកលវិទ្យាល័យ Laioning University ក្នុងវ័យ ៣២​ឆ្នាំ​ ហើយបច្ចុប្បន្ន លោកមានអាយុ ៦១ ឆ្នាំ។

ទ្រព្យ​សម្បត្តិ​របស់​ លោក ​Wang ​Jianlin​​ នាពេលបច្ចុប្បន្ន ដែលគេស្គាល់ថាជា ស្ថាប​និក​ក្រុម​ហ៊ុន​អចលន​ទ្រព្យ ​និង សហស្ថាបនិកក្រុមហ៊ុន​​កម្សាន្ត ​Wanda ​Group ​បាន​កើន​ឡើង​​ពី​ ១៣.២​ ពាន់​លាន​ដុល្លារអាមេរិក ​ដល់ ​៣០​ពាន់​លាន​ដុល្លារអាមេរិក ​នៅ​ក្នុង​បញ្ជី​ឈ្មោះ​អ្នក​មាន​ទ្រព្យ​សម្បត្តិ​នៅ​ចិន ​ក្នុង​ឆ្នាំ ​២០១៥ ​នេះ។

បន្ថែមពីនេះ លោក ​Wang ​Jianlin ​មាន​ឈ្មោះ​ល្បី​នៅ​ក្រៅ​ប្រទេស​ចិន ​ដោយ​​សារ​ការ​ទិញ​យក​ក្រុម​ហ៊ុន​​នៅ​បរទេស​ជា​ច្រើន ​ដូច​ជា​​ក្រុម​ហ៊ុន​រៀប​​ចំ​ការ​ប្រកួត​ Ironman ​ក្រុម​ហ៊ុន​ធ្វើ​ទីផ្សារ​ផ្នែក​​កីឡា​របស់​ស្វ៊ីស ​Infront ​និង​​ភាគ​ហ៊ុន​នៅ​ក្នុង​ក្លឹប​បាល់​ទា​ត់​ Atletico Madrid របស់​អេស្ប៉ាញ​ជា​ដើម។​

លោក ​Wang ​បាន​ផ្លោះ​ពី​ចំណាត់​ថ្នាក់​ទី​៤​ ទៅ​ចំណាត់​ថ្នាក់​​ទី​១ ក្នុង​បញ្ជី​ឈ្មោះ​អ្នក​មាន​​​របស់​ទស្ស​នាវដ្តី​ Forbes ​ពោល​​គឺ​ជា​ មនុស្ស​មាន​ឥទ្ធិ​ពល​មួយ​រូប ​ក្នុង​ចំណោម​មនុស្ស​មាន​ឥទ្ធិ​ពលបំផុត​នៅ​​​ចិន​​៕

ប្រភព៖ businesscambodia