សាលា​បារាំង Insead ដែល​បង្រៀន​ថ្នាក់អនុបណ្ឌិត​គ្រប់គ្រង​ពាណិជ្ជកម្ម (MBA) បាន​ជាប់​ជា​សាលា​នាំមុខគេ​ប្រចាំឆ្នាំ​២០១៦ ។ នេះ​ជាការ​ទទួលបាន​ចំណាត់ថ្នាក់​លេខ​មួយ​លើ​ពិភពលោក​ជា​លើកដំបូង​របស់​សាលា​ ពាណិជ្ជកម្ម​បារាំង ដែល​ចាត់ថ្នាក់​ដោយសារ​ព័ត៌មាន​ដ៏​ល្បីល្បាញ​របស់​អង់គ្លេស Financial Times នា​រយៈពេល​ជិត​២០​ឆ្នាំ​កន្លងមកនេះ​។​

 

​ក្នុងចំណោម​សាលា MBA កំពូល​ចំនួន​១០០ បារាំង​មាន​សាលា​តែ​៤​ប៉ុណ្ណោះ ខណៈ​ចក្រភព​អង់គ្លេស​មាន​១៥ និង​សហរដ្ឋអាមេរិក​មាន​ចំនួន​៤៧ បន្ថែម​ពីលើ​នេះ សាលា​អាមេរិក​មាន​រហូតដល់​ទៅ​៧​ក្នុងចំណោម Top 10 ។​

 

​ក្រៅពី​មាន​ទីតាំងនៅ Fontainebleau ប្រទេស​បារាំង សាលា INSEAD ក៏មាន​សាខា​នៅ​សឹង្ហ​បុរី​និង Abu Dhabi ប្រទេស​អារ៉ាប់​រួម​អេ​មី​រ៉េត​ផងដែរ​។ សម្រាប់​ឆ្នាំនេះ INSEAD បាន​រុញ​ឲ្យ​សាលា​អាមេរិក Harvard Business School ដែល​គ្រប់គ្រង​ជើងឯក​៦​ឆ្នាំ​ជាប់ៗ​គ្នា ធ្លាក់​ទៅ​ចំណាត់ថ្នាក់​លេខ​២​វិញ​។​

 

​លោក Ilian Mihov សកលវិទ្យា​ធិ​ការ​សាលា Insead បានបង្ហាញ​ពី​មោទនភាព​ដែល​សាលា​លោក​ទទួលបាន​តាមរយៈ​ការជាប់​ចំណាត់ថ្នាក់​ កំពូល​នៅលើ​ពិភពលោក​។ លោក​បាន​បញ្ជាក់ថា មាន​សិស្ស​ជាង​៥០០០០​នាក់ ដែលមាន​១៥៧​សញ្ជាតិ និង​មកពី​១៧៤​ប្រទេស​ផ្សេងៗ​គ្នា បាន​បញ្ជ​ប់​ការសិក្សា​ថ្នាក់អនុបណ្ឌិត​គ្រប់គ្រង​ពាណិជ្ជកម្ម (MBA) នៅ Insead​។​

 

 

ការចាត់ថ្នាក់​របស់ Financial Times ផ្អែក​លើក​ត្តាសំខាន់ៗ​ចំនួន​២០ ដែល​ក្នុងនោះ​មានដូចជា អត្រា​មានការ​ងារ​ធ្វើ​របស់​សិស្ស​ដែល​បញ្ចប់​ការសិក្សា ចំនួន​សិស្សស្រី ចំនួន​ប្រទេស​ដែល​ប្រភពដើម​របស់​សិស្ស និង​ជាពិសេស​ប្រាក់បៀវត្សរ៍​ប្រចាំឆ្នាំ នា​រយៈពេល​៣​ឆ្នាំក្រោយ​បញ្ចប់​ការសិក្សា​។​

 

​បើទោះបីជា Insead ទទួលបាន​លេខ​១​លើ​ចំណាត់ថ្នាក់​រួម​ក៏ដោយ តែបើ​ផ្អែកលើ​ប្រាក់បៀវត្សរ៍​ប្រចាំឆ្នាំ សាលា​ពាណិជ្ជកម្ម​បារាំង​មួយ​នេះ ស្ថិតនៅ​ចំណាត់ថ្នាក់​លេខ​៧ (១៦៦ ៥១០​ដុល្លារ​អាមេរិក​ក្នុង​១​ឆ្នាំ​) សាលា Havard Business School ស្ថិតនៅ​លេខ​៤ (១៧២ ៥០១​ដុល្លារ​អាមេរិក​ក្នុង​១​ឆ្នាំ​) ខណៈ​សិស្ស​ដែល​រៀន​ចប់​នៅ​សាលា​អាមេរិក Graduate School of Business នៃ​សាកលវិទ្យាល័យ Stanford រដ្ឋកា​លី​ហ្វ​នីញ៉ា  ទទួល​បៀវត្សរ៍​រហូតដល់​ទៅ ១៨៥ ៩៣៩៣​ដុល្លារ​អាមេរិក​ក្នុង​មួយឆ្នាំ​៕

 

 

ប្រភព៖ thmeythmey