សាលាដំបូងដោះលែងជនជាប់ចោទលួចបន្លំឯកសារដីធ្លីឲ្យនៅក្រៅឃុំយ៉ាងតក់ក្រហល់
25-February-2016 | ដោយ មែន កំសត់
ភ្នំពេញ៖ជនជាប់ចោទ លោកស្រី ប៉ែន រ័ត្នថេត ភរិយាឧកញ៉ា ឌុច សារ៉ែម មន្ត្រីជាន់ខ្ពស់ នៅទីស្តីការគណៈរដ្ឋមន្ត្រី ដែលជាប់ពន្ធនាគារបណ្តោះអាសន្នរឿងលួចក្លែងបន្លំឯកសារដីធ្លី និងលួចលក់អចលនទ្រព្យតម្លៃរាប់លានដុល្លារអាមេរិក ត្រូវបានចៅក្រមស៊ើដបសួរសាលាដំបូងរាជធានីភ្នំពេញ លោក ឆែ វីរៈ ដោះលែងឲ្យនៅក្រៅឃុំបណ្តោះអាសន្នទាំងតក់ក្រហល់បំផុត នាព្រលប់ថ្ងៃទី២៤ ខែកុម្ភះ ឆ្នាំ២០១៦ ។
ជនជាប់ចោទរូបនេះធ្លាប់មានមន្ត្រីអ្នកមានអំណាច ក្នុងជួររាជរដ្ឋាភិបាល អន្តរាគមន៍ តាំងពីដំណាក់ការឃាត់ខ្លួនដោយនគរបាលយុត្តិធម៍ និងដំណាក់ការចោទប្រកាន់របស់តំណាងអយ្យការ ។ ក្រោយមកចៅក្រមស៊ើបសួរបានសម្រេចឃុំខ្លួនជនត្រូវចោទបណ្តោះអាសន្ន បន្ទាប់ពីករណីនេះល្បីសុះសាយ អាចខ្លាចថានិងមានប្រតិកម្ម តែចុងក្រោយលោកចៅក្រម ឆែ វីរៈ ដោះលែងឲ្យនៅក្រៅឃុំដដែរ ។
សូមបព្ជាក់ថា លោកស្រី ប៉ែន រ័ត្នថេន ភរិយាលោកឧកញ៉ា ឌុច សារ៉ែម ត្រូវបានកម្លាំងនគរបាល ព្រហ្មទណ្ឌក្រសួងមហាផ្ទៃ បានធ្វើការឃាត់ខ្លួនកាលពីថ្ងៃទី០៤ ខែកុម្ភៈ ឆ្នាំ២០១៦ ហើយត្រូវបាន អយ្យការអមសាលាដំបូងរាជធានីភ្នំពេញ ធ្វើការស៊ើបសួរនៅថ្ងៃទី០៦ ខែកុម្ភៈ ដែលសំណុំរឿងនេះ គឺស្ថិតលើដៃលោកព្រះរាជអាជ្ញរង សៀង សុខ ។
ប្រភពដដែលបន្តថា លោកស្រី ប៉ែន រ័ត្នថេត បាននិយាយថា ខ្លួននឹងមិនខ្លាចនឹងចំណាត់ការ របស់ខាងតុលាការអ្វីនោះទេ ពីព្រោះថា ខ្លួនមានលុយរាប់លានដុល្លារអាមេរិក ដើម្បីអាចឲ្យខ្លួននៅក្រៅឃុំ ដោយគ្មានការបារម្ភអ្វីនោះទេ ។
លោកស្រី ប៉ែន រ័ត្នថេត គឺជាឈ្មួញរកស៊ីជំនួញដីធ្លីដ៏ល្បីមួយ និងជាភរិយារបស់លោកឧកញ៉ា ឌុច សារ៉ែម ដែលត្រូវបានគេដឹងថា ជាមន្ត្រីជាន់ខ្ពស់ នៃទីស្តីការគណៈរដ្ឋមន្ត្រី។ លោកស្រី ប៉ែន រ័ត្នថេត មានទីលំនៅរស់នៅផ្ទះលេខ ២៩ហ្សេ ភូមិកែវចន្ថា ភូមិ៣ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
គួររំលឹកថា សម្ដេចនាយករដ្ឋមន្ត្រី ហ៊ុន សែន ធ្លាប់លើកឡើងថា វប្បធម៌អន្តាគមន៍ គឺមិនត្រូវឲ្យកើត មាននោះទេ ចំពោះរឿងដែលខុសហើយ ហើយប្រែជាត្រូវទៅវិញ ដែលបញ្ហានេះ គឺវាស្របទៅការធ្វើ កំណែទម្រង់ របស់រាជរដ្ឋាភិបាល ហើយប្រសិនបើកើតមានមែននោះ មន្ត្រីនោះនឹងត្រូវបកស័ក្តិ និងអស់តួនាទី ជាដើម ។
ប៉ុន្តែកាលពីល្ងាចថ្ងៃទី២៤ខែកុម្ភៈម្សិញមិញនេះ សំណុំរឿងរបស់ភរិយារបស់លោកឧកញ៉ា ឌុច សារ៉ែម រឿងក្លែងបន្លំឯកសារដីធ្លី និងលួចលក់អចលនទ្រព្យ ត្រូវបានលោកចៅក្រម ឆែ វីរៈ ដោះលែងឲ្យជនជាប់ចោទនៅក្រៅឃុំ ដោយមិនខ្វល់ពីកំណែរទម្រង់ប្រព័ន្ធតុលាការរបស់រាជរដ្ឋាភិបាលឡើយ ដោយជ្រកក្នុងរូបភាពអំណាចឆន្ទានុសិទ្ធរបស់ខ្លួន ៕
ចំនួនអ្នកទស្សនា
- ថ្ងៃនេះ3421
- ម្សិលមិញ2931
- សប្តាហ៍នេះ15611
- ខែនេះ3421
- ឆ្នាំនេះ986641
- សរុប20214087