តុលាការចុះអនុវត្តសាលក្រមរុះរើផ្ទះយកដី ម្ចាស់ស្រែកយំថា អយុត្តិធម៌ណាស់
25-February-2016 | ដោយ មែន កំសត់
ព្រៃវែង ៖ លោកឈឿន សុផុន ព្រះរាជអាជ្ញារងអមសាលាដំបូងខេត្តព្រៃវែង កាលពីវេលាម៉ោង៩ព្រឹកថ្ងៃទី២៥ កុម្ភៈ ២០១៦ ដឹកនាំកម្លាំងអាវុធហត្ថប្រមាណ២០នាក់ចុះទៅបង្ខំរុះរើផ្ទះ ប្រជាពលរដ្ឋ១គ្រួសារ ក្នុងនៅភូមិឧត្តម ឃុំព្រែកខ្សាយ(ក) ស្រុកពាមរក៍ ខេត្តព្រៃវែង ដើម្បីយកដីប្រគល់ទៅឱ្យភាគីម្ចាស់បំណុល ។
សកម្មភាពចុះ រុះរើនេះ ត្រូវបានលោកព្រះរាជអាជ្ញារងអះអាងថា គឺជាការចុះអនុវត្តសាលក្រមស្ថាពររបស់តុលាការកំពូលលេខ៤១១(គ) ចុះថ្ងៃទី១៥ កញ្ញា ២០១៣ ដែលតម្រូវឱ្យភាគីម្ចាស់ផ្ទះ ដែលជាកូនបំណុលឈ្មោះសុខ នី សងលុយទៅម្ចាស់បំណុលឈ្មោះប្រាក់ ហោលី ចំនួន៩.៦០០ដុល្លា ប៉ុន្តែម្ចាស់ផ្ទះមិនព្រមសងតាមអំណាចសាលក្រម ទើបសាលាដំបូងខេត្តអនុវត្តនីតិវិធីបង្ខំ ដោយយកដីទៅលក់ឡៃឡុងយកប្រាក់ទៅសងម្ចាស់បំណុល និងរុះរើផ្ទះយកដីទៅឱ្យអ្នកដែលបានទិញពីតុលាការ ។
ស្ត្រី ឈ្មោះសុខ នី ព្រមទាំងក្រុមគ្រួសារបានប្រាប់ឱ្យដឹងថា ការចុះមករុះរើផ្ទះរបស់ពួកគាត់យកដីប្រគល់ទៅឱ្យគេនេះ គឺអយុត្តិធម៌ណាស់ សំរាប់ពួកគាត់ព្រោះពួកគាត់សុខចិត្តសងលុយឱ្យគេហើយ ប៉ុន្តែម្ចាស់បំណុលខ្លួនឯងមិនព្រមទទួលយក គឺទាមទារយក តែដីរបស់គាត់ ហើយពេលនេះមករុះរើផ្ទះរបស់គាត់អស់ តើអោយគាត់ទៅរស់នៅឯណា។
បងស្រី សុខ នី បានរៀបរាប់ប្រាប់ពីប្រវត្តិរឿងរ៉ាវរបស់គាត់ថា ដំបូងឡើយគាត់ជំពាក់លុយឈ្មោះប្រាក់ ហោលី តែ៨ពាន់ដុល្លាប៉ុ ណ្ណោះ ហើយគាត់បានបង់លុយថ្លៃការប្រាក់ឱ្យជារៀងរាល់ថ្ងៃ ដោយក្នុង១ថ្ងៃ៦ម៉ឺនរៀល គាត់បង់ការឱ្យបាន២ឆ្នាំ ប្តីគាត់ឈឺស្លាប់គាត់គ្មានលទ្ធភាពបង់បន្ត ក៏សុំម្ចាស់បំណុលបង់១ខែ១០០ដុល្លាវិញ ។ ហើយគាត់បង់បាន១ឆ្នាំ ក៏អស់លទ្ធភាពរកលុយមកបង់បន្តលែងបាន ស្រាប់តែម្ចាស់បំណុលឈ្មោះប្រាក់ ហោលី មកដេញឱ្យគាត់និងគ្រួសារចេញពីផ្ទះប្រគល់ផ្ទះ និងដីឱ្យគេ តែគាត់មិនព្រមចេញទើប គេដាក់ពាក្យប្តឹងទៅតុលាការ ។
ប្រភពដដែលបន្តទៀតថា សាលាដំបូងខេត្តបានកាត់ឱ្យគាត់សងលុយទៅឈ្មោះប្រាក់ ហោលី ចំនួន៩.៦០០ដុល្លា តែគាត់ជំទាស់ក៏ប្តឹងបន្តទៅឧទ្ធរណ៍ សាលាឧទ្ធរណ៌កាត់ឱ្យគាត់សងលុយគេទៀត ។ គាត់ក៏ប្តឹងទៅកំពូលទៀត ហើយសាលាកំពូលក៏បានកាត់ដំកល់សាលក្រមសាលាឧទ្ធរណ៍ទុកជាបានការ ដដែល ទើបគាត់សុំចរចាជាមួយឈ្មោះប្រាក់ ហោលី សុំសងរំលោះម្តងបន្តិចៗគ្រោះគ្មានលុយសងទាំងដុំ ប៉ុន្តែគេមិនព្រមទាមទារអោយសងទាំងអស់ក្នុងពេលតែម្តង។
លុះក្រោយមកស្រាប់តែឮដំណឹងថា តុលាការខេត្ត បានយកដីគាត់ទៅលក់ឡៃឡុង យកប្រាក់សងម្ចាស់បំណុលហើយ ហើយអ្នកដែលទិញដីពីតុលាការនោះ គឺជា ប្រាក់ ហោលី ម្ចាស់បំណុលនេះតែម្តង ហើយរហូតមកដល់ថ្ងៃទី១៩ កុម្ភៈ លោកព្រះរាជអាជ្ញា ឈឿន សុផុន បានដឹកនាំកម្លាំងប៉ូលិស អាវុធហត្ថចុះមករុះរើផ្ទះរបស់គាត់ យកដីឱ្យទៅឈ្មោះប្រាក់ ហោលី តែដោយសារពួកគាត់រារាំងមិនព្រមអោយរុះរើ ទើបលោកព្រះរាជអាជ្ញាដកថយទៅវិញ រហូតមកដល់ថ្ងៃទី២៥ កុម្ភៈ នេះ ក៏ដឹកនាំកំលាំងអាវុធហត្ថមកជាលើកទី២ទៀត ពេលនេះគេរុះរើផ្ទះរបស់គាត់បានសម្រេចហើយ ហើយពួកគាត់ក៏អស់ផ្ទះរស់នៅដែរ តើអោយពួកគាត់ទៅនៅឯណា សូមជួយគាត់ផង ។
ដោយឡែកលោក ប្រាក់ ហោលី ភាគីខាងម្ចាស់បំណុលវិញបានប្រាប់អោយដឹងថា ដំបូង ឡើយឈ្មោះ សុខ នី បានលក់ផ្ទះនិងដីអោយគាត់ក្នុងតម្លៃ៨២ដុល្លារ ប៉ុន្តែមានលក្ខណ័២ គឺ ក្នុងរយៈពេល២ខែបើគាត់មានលុយអាចទិញយកផ្ទះនិងដីវិញបាន ហើយក្នុងអំឡុងពេល២ ខែនេះគាត់សុំជួលផ្ទះនេះរស់នៅសិន ដោយអោយថ្លៃឈ្នួល៦ម៉ឺនរៀលក្នុង១ថ្ងៃ ប៉ុន្តែគាត់ បង់លុយថ្លៃជួលផ្ទះបានតែ១ខែ ស្រាប់តែលែងបង់អោយ ហើយពេលគាត់ទៅដេញអោយ ចេញពីផ្ទះវិញ បែរជាគេមិនព្រមចេញទើបគាត់( ប្រាក់ ហោលី )ដាក់ពាក្យប្តឹងទៅតុលាការ ហើយទាំងសាលាដំបូង សាលាឩទ្ធរណ៌ និងសាលាកំពូល បានកាត់អោយឈ្មោះ សុខ នី នេះសងលុយអោយគាត់ដូចគ្នា តែឈ្មោះ សុខ នី មិនព្រមសងរហូតអស់ជំរើសចុងក្រោយ លោកព្រះរាជអាជ្ញាសាលាដំបូងខេត្ត អនុវត្តនិតិវិធីបង្ខំដោយយកដីនោះទៅលក់ឡាយឡុង ដើម្បីយកប្រាក់មកសងគាត់ ហើយមកដល់ពេលនេះរឿងប្រាក់ដែល សុខ នី ត្រូវសងគាត់ នោះ គឹតុលាការបានកាត់សងរួចអស់ហើយ។
ទោះជា យ៉ាងណាក៏ដោយ ភាគីខាងម្ចាស់ផ្ទះ បានបង្ហាញពីឯកសាររបស់ក្រសួងយុត្តិធម៌ ដែលជំរាបជូនលោកប្រធានសាលាដំបូង និងលោកព្រះរាជអាជ្ញាអមសាលាដំបូងខេត្តព្រៃវែង អោយផ្អាកសកម្មភាពចុះរុះរើផ្ទះរបស់ឈ្មោះ សុខ នី នេះសិនប៉ុន្តែមិនដឹងមានហេតុផលយ៉ាងម៉េចនោះទេ ទើបលោកព្រះរាជអាជ្ញា នៅតែបន្តដឹកនាំកំលាំងចុះមករុះរើផ្ទះខាងលើនេះដដែល គឺធ្វើទាល់តែបានសំរេច។ ហើយនៅក្នុងសកម្មភាពចុះរុះរើ នាព្រឹកថ្ងៃទី២៥ កុម្ភៈនេះ ដំបូងគេឃើញក្រុមគ្រួសារម្ចាស់បានគំរាមថា នឹងយកកាំបិទអាករសម្លាប់ខ្លួន បើ សិនជាសមត្ថកិច្ចនៅតែជំនះចូលរុះរើផ្ទះរបស់គាត់ទៀត ប៉ុន្តែនៅពេលដែលលោកព្រះរាជអាជ្ញាបញ្ជាអោយកំលាំងអាវុធហត្ថ ចូលចាប់ស្ត្រី៣នាក់វាយខ្នោះញាត់បញ្ចូលឡានដឹកយក ទៅឃុំនៅបញ្ជាការដ្ឋានអាវុធហត្ថស្រុកពាមរក៌ និងបញ្ជាអោយចាប់វាយខ្នោះអ្នកផ្សេងៗទៀតបើនៅតែរឹងទទឹងនោះ ទើបក្រុមគ្រួសារម្ចាស់ផ្ទះ៧-៨នាក់ទៀត លែងហ៊ានប្រឆាំង ហើយសុខចិត្តដើរចេញ ជាមួយនឹងសំឡេងយំយែកស្រែកថា អយុត្តិធម៌ណាស់។
គួរ បញ្ជាក់ថា ក្រោយពីមិនអាចតតាំងជាមួយកំលាំងសមត្ថកិច្ចបាន ក្រុមគ្រួសារម្ចាស់ផ្ទះ បាននាំគ្នាឡើងជិះម៉ូតូរ៉ឺម៉ក ធ្វើដំណើរទៅរាជធានីភ្នំពេញចំនួនជាង២០នាក់ ដែលតាមប្រភពច្បាស់ការបានអះអាងថា គឺទៅកាន់ខុទ្ធកាល័យនាយករដ្ឋមន្ត្រី ស្នើសុំអោយសម្តេចតេជោជួយអន្តរាគមរកយុត្តិធម៌អោយពួកគាត់ផង៕
ចំនួនអ្នកទស្សនា
- ថ្ងៃនេះ2771
- ម្សិលមិញ2931
- សប្តាហ៍នេះ14961
- ខែនេះ2771
- ឆ្នាំនេះ985991
- សរុប20213437