ផែងវណ្ណៈ៖ ទឹកភ្នែករាស្ត្រហូរគ្មានស្រាកស្រានដោយសារតែមន្ត្រីតុលាការមួយចំនួននៅតែបន្តប្រើនឆន្ទានុសិទ្ធិតាមអំណាចទឹកលុយ
15-March-2016 | ដោយ មែន កំសត់
ភ្នំពេញ ៖ ទឹកភ្នែករាស្ត្រហូរគ្មានស្រាកស្រានដោយសារតែមន្ត្រីតុលាការមួយចំនួននៅតែបន្តប្រើនឆន្ទានុសិទ្ធិតាមអំណាចទឹកលុយ និងតាមបុគ្គលមានអំណាចខ្លះដែលចូលចិត្តប្រើអំណាចធ្វើបាបអ្នកទន់ខ្សោយ ។ ករណីចាប់រាស្ត្រពីរនាក់ដាក់គុកពាក់ព័ន្ធនឹងបទល្មើសដីធ្លីនៅខេត្តកំពង់ស្ពឺ គ្រាន់តែជារឿងមួយនៃរឿងអយុត្តិធម៌រាប់រយ រាប់ពាន់រឿងឯណោះ ។
យោងតាមមតិនិងការលើកឡើងរបស់លោក ផែង វណ្ណៈកាលពីយប់ថ្ងៃទី១៤ខែមិនាឆ្នាំ២០១៦កន្លងទៅនេះ នៅលើទំព័រហ្វេសបុករបស់លោកក្នុងនាមលោកជាមន្រ្តីនគរបាលនិងជាក្រុមការងារនៅក្នុងស្រុកមួយនៃខេត្តព្រៃវែង
លោកបានលើកឡើងថា៖« ប្រជាពលរដ្ឋទូទាំងប្រទេសបាននិយាយពេញៗមាត់ថា៖ ពួកគាត់នៅតែគោរពស្រលាញ់គាំទ្រ និងត្រូវការសម្ដេចតេជោ ហ៊ុន សែន ជាមេដឹកនាំជារៀងរហូត ។ ប៉ុន្តែទង្វើអាក្រក់របស់មន្ត្រីខិលខូច មន្ត្រីពុករលួយ និង មន្ត្រីតុលាការខ្លះ បានធ្វើអោយប្រជាពលរដ្ឋមានការថ្នើងថ្នាក់រហូតឈានទៅដល់ការខឹងគោទៅវាយរទេះទៀតផង »។
«ជារួមលទ្ធផលឆ្នោតឆ្នាំ ២០១៣ គឺជាសារមួយបញ្ជាក់យ៉ាងច្បាស់ទៅកាន់ពួកមន្ត្រីខិលខូច និង មន្ត្រីពុករលួយ មន្ត្រីតុលាការកាត់ក្ដីតាមទឹកលុយអោយចេះភ្ញាក់រលឹកកែខ្លួនជម្រុះទង្វើអាក្រក់កន្លងមកចោលហើយខិតខំសាងអំពើល្អដើម្បីឆក់យកបេះដូងរាស្ត្រមកវិញ ។ ប៉ុន្តែក្រុមពួមន្ត្រីអស់សាច់មួយចំនួនតូចខាងលើនៅតែមិនកែហើយបន្តប្រព្រឹត្តរឿងអាក្រក់កាន់តែច្រើនទៅៗ ។ ពួកមន្ត្រីខិលខូចនិងមន្ត្រីតុលាការទាំងនោះពូកែណាស់ខាងលូនក្រាបលុតជង្គង់នៅចំពោះមុខថ្នាក់ដឹកនាំ តែនៅពីក្រោយខ្នងថ្នាក់ដឹកនាំវិញជាន់ករមន្ត្រីតូចតាចនិងរាស្ត្រទន់ខ្សោយគ្មានប្រណី »។
ហើយលោកក៏បានបន្តផងដែរ ថា៖ ប្រជាពលរដ្ឋយល់ឃើញថាដល់ពេលវេលានេះ គួរតែចាប់ផ្ដើមដុះក្អែលមន្ត្រីខិលខូចហើយជាពិសេសដល់ពេលត្រូវកាត់សាច់ស្អុយក្រវាត់ចោលហើយ ។ បើសិនជាអាចកាត់សាច់ស្អុយចេញ និងកែទម្រង់ប្រព័ន្ធយុត្តិធម៌ និងអាចដោះស្រាយបញ្ហាអយុត្តិធម៌សង្គមបាន នៅឆ្នាំ ២០១៧ និង ២០១៨ មិនបាច់ឃោសនាក៏ឈ្នះដែរ ៕
ចំនួនអ្នកទស្សនា
- ថ្ងៃនេះ941
- ម្សិលមិញ12561
- សប្តាហ៍នេះ28891
- ខែនេះ50771
- ឆ្នាំនេះ50771
- សរុប20493227