អង្គភាពប្រឆាំងអំពើពុករលួយឃាត់ខ្លួនមន្ដ្រីក្រសួងការបរទេសម្នាក់ដល់ទីស្ដីការក្រសួង
01-April-2016 | ដោយ មែន កំសត់
ភ្នំពេញ ៖ អង្គភាពប្រឆាំងអំពើពុករលួយ (ACU)បាននាំខ្លួនមន្ត្រីម្នាក់បម្រើការនៅក្រសួងការបរទេស និងសហប្រតិបត្តិការអន្តរជាតិ ពាក់ព័ន្ធការប្រព្រឹត្តអំពុករលួយក្នុងការរត់ការឯកសារមិនប្រក្រតី មួយចំនួនឲ្យក្រុមហ៊ុនឯកជន នេះបើយោងតាមប្រភពពីមន្ត្រីមួយរូប ដែលសុំមិនបញ្ចេញឈ្មោះ។
តាមមន្ត្រីរូបនោះអះអាងថា ការចាប់ខ្លួនមន្ត្រីក្រសួងការបរទេសបានធ្វើឡើងកាលពីវេលាម៉ោង ១១ព្រឹក ថ្ងៃទី៣១ ខែមីនា ឆ្នាំ២០១៦នៅក្នុងទីស្ដីការក្រសួងការបរទេស និងសហប្រតិបត្តិការអន្តរជាតិ ខណៈពេលដែលឯកឧត្តមឧបនាយករដ្ឋមន្ដ្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កំពុងជួបជាមួយលោកស្រីTatyana Valovaya រដ្ឋមន្ត្រីទទួលបន្ទុកសមាហរណកម្មនិងមីក្រូសេដ្ឋកិច្ចរបស់សហភាព សេដ្ឋកិច្ចអឺរ៉ុបអាស៊ី ( Eurasian Economic Union)។
មន្ត្រី ខាងលើបានបង្ហើបឲ្យដឹងទៀតថា មន្ត្រីក្រសួងការបរទេស ដែលត្រូវខាងអង្គភាពប្រឆាំងអំពើពុករលួយចូលមកនាំខ្លួនដល់ក្នុង ក្រសួងនេះ មិនទាន់ត្រូវបានគេប្រាប់ឈ្មោះឲ្យដឹងនៅឡើយទេ គ្រាន់តែគេដឹងថា មានឋានៈជាប្រធានការិយាល័យ។
បន្ទាប់ពី ការចាប់ខ្លួនមន្ត្រី បម្រើការនៅក្រសួងការបរទេសពីសំណាក់ACUរួចមក ក្រសួងការបរទេស និងសហប្រតិបត្តិការអន្តរជាតិក៏បានចេញសេចក្ដីជូនព័ត៌មានមួយ ដោយប្រាប់កុំឲ្យមានការភ្ញាក់ផ្អើលចំពោះករណី«អង្គភាពប្រឆាំងអំពើ ពុករលួយ» ចាប់មន្ត្រីរូបនោះ៕
ចំនួនអ្នកទស្សនា
- ថ្ងៃនេះ3071
- ម្សិលមិញ12561
- សប្តាហ៍នេះ31021
- ខែនេះ52901
- ឆ្នាំនេះ52901
- សរុប20495357