​ភ្នំពេញ ៖ មេឃុំ​ស្រក ស្រុក​កំពង់សៀម ខេត្តកំពង់ចាម មកពី​គណបក្ស​សម រង្ស៊ី គឺ​លោក ស៊ា​ង ចែត បាន​ត្រូវ​អង្គភាព​ប្រឆាំង​អំពើពុករលួយ (ACU) ដឹកនាំ​ដោយ​លោក​ទេសរដ្ឋមន្ត្រី ឱម យ៉ិនទៀង ចាប់ខ្លួន​នៅវេលា​ម៉ោង​១០​និង​៣០​នាទី​ព្រឹក​ថ្ងៃទី​២៤ មេសា ២០១៦ ។​

​នេះ បើ​យោងតាម​លោក អេង ឆៃអ៊ាង អ្នកនាំពាក្យ​គណបក្ស​សង្គ្រោះ​ជាតិ​ដែល​សរសរ​នៅលើ​បណ្តាញ​ទំនាក់ទំនង​សង្គម (Facebook) បង្ហោះ​នៅវេលា​ថ្ងៃត្រង់​ថ្ងៃអាទិត្យ​ដដែល​នេះ ។​

​ នៅពេលនេះ​លោក​ស៊ា​ង ចែត បាន​ត្រូវ ACU នាំយកមក​សាកសួរ​នៅ​ភ្នំពេញ ពាក់​ព័​ន្ឋ​នឹង​លុយ​៥០០​ដុល្លារ ដែល​ឈ្មោះ ខុម ចាន់​តារា​ទី​ហៅ​ស្រីមុំ បាន​ឆ្លើយ​ដាក់ ។​​ជាមួយ គ្នា​នេះដែរ ​ការចាប់ខ្លួន​លោក ស៊ា​ង ចែត​នេះ ធ្វើឡើង​តាម​ការឆ្លើយ​ របស់​​ឈ្មោះ ខុម ចាន់​តារា​ទី​ហៅ​ស្រីមុំមកដល់​វេលា​ម៉ោង​២​និង​១៤​នាទី​រសៀល​នេះ មិនទាន់មាន​ប្រតិកម្ម​តប​ភ្លាមៗ​នៅឡើយ​ទេពី​មន្ត្រី​ACU ។

​គួរបញ្ជាក់ផងដែរថា៖កញ្ញា ស្រីមុំ បានសរសេរថា «ចំណែកឪពុកម្តាយខ្ញុំដែលកំពង់រស់នៅ ភូមិណ្តក ឃុំស្រក ស្រុកកំពង់សៀម ខេត្តកំពង់ចាម ក៏ត្រូវរកការអូសទាញ បញ្ចុះបញ្ចូលពួកគាត់ ពីសំណាក់មេឃុំស្រក ឈ្មោះ ស៊ាង ចែត ហើយបង្គាប់ឱ្យមែឪនាងខ្ញុំ ណែនាំដល់នាងខ្ញុំ កុំឱ្យនិយាយការពិត ដែលប៉ះពាល់ដល់ លោក កឹម សុសា។ មេឃុំ បានយកលុយមកឱ្យម្តាយនាងខ្ញុំ ចំនួន៥០០ដុល្លារអាមេរិក ហើយបានសន្យាឱ្យនាងខ្ញុំ និងម្តាយនាងខ្ញុំ ទៅរស់នៅ ក្រៅប្រទេស»។

កញ្ញាបានបន្ថែមថា «នៅថ្ងៃទី២១ ខែមេសា ឆ្នាំ២០១៦ នាងខ្ញុំបានធ្វើដំណើរទៅផ្ទះ នៅស្រុកកំណើត ពេលនោះ មេឃុំ ស៊ាង ចែត និងសកម្មជនមួយចំនួនរបស់គណបក្សសង្រ្គោះជាតិ បានមកផ្ទះនាងខ្ញុំ ហើយសួរនាំនាងខ្ញុំថា តើចង់ទៅរស់នៅក្រៅប្រទេសឬអត់ បើចង់ទៅ គឺអាចទៅទាំងគ្រួសារ ហើយបើទៅម្នាក់ឯងក៏បានដែរ។ នាងខ្ញុំបានសួរមេឃុំ ស៊ាង ចែត អំពីលុយ ដែលយកមកឱ្យម្តាយខ្ញុំចំនួន៥០០ដុល្លារ តើបានមកពីណា? មេឃុំ ស៊ាង ចែត បានឆ្លើយថា លុយនេះ គឺជាលុយរបស់ លោក កឹម សុខា ផ្ញើមកឱ្យគ្រួសារនាងខ្ញុំ។ មេឃុំ ស៊ាង ចែត ក៏បានប្រាប់នាងខ្ញុំថា លោក កឹម សុខា បានទូរស័ព្ទមកសួរថា តើឪពុកម្តាយ យល់ព្រមទទួលយកប្រាក់របស់គាត់ ឬអត់។ មេឃុំបានប្រាប់ទៅវិញថា ម្តាយនាងមិនទាន់ទទួលយកទេ ដោយសុំធ្វើការពិចារណា ហើយលោក កឹម សុខា បានប្រាប់មេឃុំថាលុយនៅទីនោះចុះ»។

កញ្ញា ខុម ចាន់តារ៉ាទី ហៅស្រីមុំ ដែលបានលាក់បាំងការពិតក្រោយផ្ទុះរឿងអាស្រូវ រយៈពេលជាង១ខែមកនេះ ក៏បានដាក់ពាក្យប្តឹង លោក កឹម សុខា អនុប្រធានគណបក្សសង្រ្គោះជាតិ និងបក្ខពួក ក្នុងរឿងនេះ ដើម្បីទាមទារសំណងជំងឺចិត្ត ៣០ម៉ឺនដុល្លារផងដែរ ចំពោះការលួងលោមធ្វើឱ្យបាត់បង់កិត្តិយសរបស់នាង កន្លងមក៕