ប្តី-ប្រពន្ធទាញដណ្តើមកូនគ្នាក្នុងតុលាការ
29-April-2016 | ដោយ មែន កំសត់
ភ្នំពេញ ៖ មានការភ្ញាក់ផ្អើលមួយកើតឡើងនៅក្នុងសាលាដំបូងរាជធានីភ្នំពេញ កាលពីថ្ងៃទី២៦ មេសា ២០១៦ ដោយគេឃើញបុរស-ស្ត្រីមួយ បានប្រទាញប្រទង់គ្នាដណ្ដើមយកក្មេងស្រីម្នាក់អាយុ៧ឆ្នាំ ប៉ុន្តែក្រោយមក ក្មេងស្រីនោះ ត្រូវចៅក្រមសាលាដំបូង សម្រេចប្រគល់ឱ្យម្តាយគ្រប់គ្រង នៅពេលដឹងថា ឪពុកមានស្រីថ្មីបានចាកចោលផ្ទះ ។
ពាក់ព័ន្ធករណីភ្ញាក់ផ្អើលខាងលើនេះ សាលាដំបូងរាជធានីភ្នំពេញត្រូវបានគេដឹងថា គឺជាករណីប្ដី-ប្រពន្ធឈ្លោះគ្នា ហើយភាគី
ម្ខាងៗ ដណ្ដើមចង់បានកូនយកទៅគ្រប់គ្រង ។
ប្រភពឱ្យទៀត កាលពីរសៀលថ្ងៃទី២៥ មេសា ២០១៦ លោកតេង ម៉ាប់ អាយុ៥១ឆ្នាំ និងស្ត្រីឈ្មោះតែ គឹមឆេង អាយុ៣១ឆ្នាំ ជាប្ដីប្រពន្ធស្របច្បាប់ បានទៅដណ្ដើមយកកូនស្រីឈ្មោះតេង ម៉ីលីង អាយុ៧ឆ្នាំ ដែលកំពុងនៅរៀនសាលាឯកជនមួយក្នុងសង្កាត់បឹងកេងកង១ ខណ្ឌចំការមន ។
ខណ:ឪពុកម្ដាយដណ្ដើមគ្នាយកកូនគ្រប់គ្រងដូច្នេះ គណ:គ្រប់គ្រងសាលាសម្រេចចិត្តមិនប្រគល់ភាគីណាមួយទេ ហើយក៏បានយកក្មេងស្រីអាយុ៧ឆ្នាំនោះ ទៅប្រគល់ឲ្យចៅក្រមសាលាដំបូងសម្រេចតាមផ្លូវច្បាប់វិញ ព្រោះឪពុកម្ដាយក្មេងស្រីនោះ កំពុងមានសំណុំរឿងប្តឹងលែងលះស្រាប់ផង ។ រហូតមកដល់ល្ងាចថ្ងៃទី២៦ មេសា ២០១៦ លោកសាន សុផាត ចៅក្រមស៊ើបសួរសាលាដំបូងរាជធានីភ្នំពេញ សម្រេចប្រគល់ក្មេងស្រី ទៅឱ្យម្តាយគ្រប់គ្រង តាមសំណូមពររបស់ក្មេងស្រីដែលមិនចង់រស់នៅជាមួយឪពុកមានស្រីថ្មី ទៀតនោះ ។
ប្រភពមន្ត្រីសាលាដំបូងបានបង្ហើបឲ្យដឹងថា កាលពីឆ្នាំ២០០៧ លោកតេង ម៉ាប់ និងលោកស្រីតែ គឹមឆេង បានរៀបការ និងបានចុះចំណងអាពាហ៍ពិពាហ៍ជាមួយគ្នា រហូតបង្កើតបានកូនប្រុសស្រីចំនួន៤នាក់ក្នុងបន្ទុក ។ ក្រោយមក លោកតេង ម៉ាប់ បានលួចលាក់ទៅទំនាក់ទំនងស្នេហាជាមួយស្ត្រីម្នាក់ទៀតឈ្មោះណី ខុំ ដែលរស់នៅខេត្តសៀមរាម និងមានកូនប្រុសស្រី៤នាក់ទៀត ។ ក្នុងទំនាក់ទំនងស្នេហាលួចលាក់នោះ លោកតេង ម៉ាប់ បានយកទ្រព្យសម្បត្តិមួយចំនួនធំចេញពីផ្ទះ ទៅទិញដីសង់លំនៅឋាន ឲ្យប្រពន្ធលួចលាក់ស្នាក់នៅជាច្រើនឆ្នាំ ។
ប៉ុន្តែស្នេហាលួចលាក់នោះជាមួយស្រីថ្មីនោះ មិនអាចបិទបាំងជិតរហូតបានទេ ក្រោយមកបែកធ្លាយដល់អ្នកស្រីតែ គឹងឆេង ដែលជាប្រពន្ធស្របច្បាប់ដឹង ហើយអ្នកស្រីបានសួរនាំពីបញ្ហានេះ ជាហេតុធ្វើឱ្យលោកតេង ម៉ាប់ ខឹង ទើបលោកតេង ម៉ាប់ ដាក់ពាក្យប្តឹងចូលសាលាដំបូងរាជធានីភ្នំពេញ សុំចេញដីការក្សាការពារឱ្យផ្អាកអាជីវកម្ម និងមុខរបររកស៊ីផ្សេងៗរបស់អ្នកស្រីតែ គឹមឆេង ថែមទៀតផង ។
មន្ត្រីសាលាដំបូងបន្តថា ក្រោយមកឆ្លៀតឱកាសពេលប្រពន្ធមិននៅផ្ទះ លោកតេង ម៉ាប់ បានទៅយកកូនប្រុស-ស្រីទាំង៤នាក់ ចុះចេញពីផ្ទះទៅរស់នៅជាមួយប្អូនស្រីនៅសង្កាតបឹងត្របែក ខណ្ឌចំការមន អស់រយ:ពេល២ខែ ។ ដោយសាតែទង្វើរបស់ប្ដីបង្កបញ្ហាលំបាកដល់កូនៗ និងក្រុមគ្រួសារ ទើបនៅថ្ងៃទី៥ មេសា ២០១៦ អ្នកស្រីតែ គឹមឆេង សម្រេចចិត្តដាក់ពាក្យបណ្តឹងប្ដឹងលែងលះលោកតេង ម៉ាប់ ទៅកាន់សាលាដំបូងរាជធានីភ្នំពេញ ដើម្បីកុំឱ្យមានបញ្ហាជាមួយប្ដី និងស្រីកំណាន់របស់ប្ដីនោះ ។
ចន្លោះពេលនោះអ្នកស្រីតែ គឹមឆេង បានដើរស្វែងរកកូនគ្រប់ទិសទី រហូតដល់ថ្ងៃទី២៥ មេសា ២០១៦ ទើបប្រទះឃើញកូនស្រីច្បងឈ្មោះ តេង ម៉ីលីង នៅក្នុងសាលាឯកជនមួយ ស្ថិតក្នុងសង្កាត់បឹងកេងកង១ ខណ្ឌចំការមន ក៏មានបំណងចូលយកកូនទៅផ្ទះ ហើយលោកតេង ម៉ាប់ ទៅទាន់ និងមិនព្រមឲ្យ ក៏កើតមានការប្រទាញប្រទង់គ្នា ដណ្ដើមកូនបានជាខាងគណ:គ្រប់គ្រងសាលារៀន សម្រេចយកក្មេងស្រីនោះ មកប្រគល់ឲ្យចៅក្រមសម្រេចតាមអង្គច្បាប់ ។
បន្ទាប់មកចៅក្រមស៊ើបសួរសាលាដំបូងរាជធានី សម្រេចប្រគល់កូនប្រុស-ស្រីទាំង៤នាក់ ឱ្យរស់នៅជាមួយម្ដាយគ្រប់គ្រងវិញ ។ ការសម្រេចរបស់លោកចៅក្រមនោះ ដោយសម្អាងលើក្មេងស្រីរៀបរាប់ពីផលលំបាក ដែលឪពុកនាំពួកគេចេញពីផ្ទះទៅនៅជាមួយមីង ខ្វះការថែទាំឱ្យបានកក់ក្តៅ និងថ្ងៃណា ក៏ត្រូវអ្នកបម្រើវាយតប់ គំរាមកំហែង និងមិនឱ្យអាហារហូបចុកគ្រប់គ្រាន់ដែរ ទើបពួកគេចុះស្គមស្គាំង ហើយឈឺស្កាត់មិនឈប់ឈថែមទាំងរៀនសូត្រដិតដល់ ដូចអ្វីដែលរស់នៅក្នុងបន្ទុកម្តាយគ្រប់គ្រងនោះឡើយ ៕
ចំនួនអ្នកទស្សនា
- ថ្ងៃនេះ3381
- ម្សិលមិញ15191
- សប្តាហ៍នេះ46531
- ខែនេះ68411
- ឆ្នាំនេះ68411
- សរុប20510867